ESHI oshiwana shaKalunga sha dja muBabilon mo 537 K.O.P., Kalunga okwa li e na ko nasha nondjila omo va li tava ende okuya kuJerusalem. Okwe va lombwela a ti: “Longekidileni ovanhu ondjila. Yelakanifeni, yelakanifeni [oshitauwa], kufeni mo omamanya mondjila.” (Jes. 62:10) Diladila kunghee Ovajuda vamwe tashi dulika va li va ninga po shi na sha naasho. Eengudu odo da li da tetekela otashi dulika da li da longekida opate, tashi dulika da li da fila omifya noku i lalakanifa nawa. Kungaho ova li va kwafela ovamwaxe ovo va li tave ke va landula eshi tava shuna koshilando shavo.

Ohatu dulu okulongifa oshimoniwa osho onga efaneko li na sha nondjila yopafaneko oyo tai twala kokulalakanena oinima yopamhepo. Jehova okwa hala ovapiya vaye aveshe va ende mondjila oyo nopehe na omainda. Eendjovo daye ode tu ladipika tadi ti: “Elila lomhadi yoye li yelakanifa neendjila doye adishe nadi kale da pama.” (Omayel. 4:26) Kutya nee ou li omushanya ile owa ehe na ko kanini, oto dulu okumona ounongo wokutula moilonga omayele oo opakalunga.

Otashi dulika wa uda ovanhu tava popi ngaha kombinga yovanyasha: ‘Oku na omaano, ota dulu okupondola monghalamwenyo.’ Ovanyasha luhapu ohava kala ve na oukolele, omadiladilo haa endelele nova halelela okupondola. Ombibeli oya popya sha yela ya ti: ‘Ewapalo lovamati, olo eenghono davo.’ (Omayel. 20:29) Omunyasha oo ha longifa ounghulungu neenghono daye mokulongela Jehova ota dulu okuhanga omalalakano opamhepo nokumona ehafo lashili.

Ndele ngaashi we shi didilika, okudula kwovanyasha vetu okwa lengwa neenghono mounyuni. Ngeenge Ondombwedi inyasha ohai shi endifa nawa kofikola, ovayandjimayele, ovahongifikola ile ovanafikola vakwao otashi dulika ve i fininike i lalakanene ehongo lopombada li li onghatu yokupondola monghalelo ei  yoinima. Ile omumwatate ile omumwameme omunyasha oo e li dingi mokutondoka otashi dulika omudeuli waye e mu heke opo a lalakanene eifano la tya ngaho. Mbela owe lihangele monghalo ya tya ngaho, ile u shii umwe oo a taalela omafininiko a tya ngaho? Oshike tashi dulu okukwafela Omukriste a ninge ehoololo lopandunge?

Omahongo Ombibeli otaa dulu okukwafela umwe a ende mondjila ya longekidwa nawa mokukalamwenyo. Omuudifi 12:1 oya ti: “Dimbuluka Omushiti woye momafiku ounyasha woye.” Ongahelipi ove ile omunyasha umwe oo u shii ta dulu ‘okudimbuluka nawa Omushiti waye’?

Natu ka taleni kutya oshike sha li sha ningwa po shi na sha naEric * wokoAfrika lokOuninginino. Okwa li e hole okudana etanga lokeemhadi. Eshi Eric a li e na omido 15, okwa li a hoololwa a ka danene ongudu yopashiwana. Osho osha li sha hala kutya meni lefimbo lixupi, okwa li ngeno a teelela a ka deulilwe oudano koEuropa, osho tashi dulika ngeno she ke mu ningifa a kale e na eifano la denga mbada. Ndele mbela ngeno omayele ‘okudimbuluka Omushiti woye’ okwe a tula ngoo moilonga? Osho otashi dulika tashi tu hongo shike ile ookaume ketu vamwe ovanyasha?

Pefimbo Eric e li mofikola natango, okwa li a hovela okukonakona Ombibeli nEendombwedi daJehova. Onghee hano, okwa li a hovela okulihonga kutya Omushiti waye ota ka kandula po filufilu omaupyakadi ovanhu. Eric okwa li a mona kutya osha fimana okulongifa efimbo neenghono daye mokulonga ehalo laKalunga. Omolwexulifodiladilo olo lopandunge, Eric ka li a lalakanena eifano la denga mbada momaudano, ndele ponhele yaasho, okwa li a ninginifwa nokulitulila po omalalakano opamhepo. Mokweendela ko kwefimbo, okwa ka ninga omuyakuliongalo nolwanima okwa ka shivwa kOfikola yOmbibeli yOkudeula Ovamwatate Inava Hombola.

Ngeno Eric okwa lalakanene eifano momaudano, otashi dulika ngeno a likola oupuna netumba. Ashike okwa li a didilika mo oushili wefinamhango lOmbibeli olo kutya: “Emona loshipuna olo oshilando shasho sha pama ngaashi ohotekuma ile momadiladilo asho.” (Omayel. 18:11) Osha yela kutya eameno loupuna olo omunhu ha kala a fa e wete, eheka longaho. Onghee hano, ovo va hala okupunapala luhapu oha ve ‘lityuulifa nomaudjuu mahapu.’ — 1 Tim. 6:9, 10.

Shihafifa, ovanyasha vahapu ova mona ehafo neameno lashili mokuya moilonga yefimbo li yadi. Eric okwa ti: “Onda waimina ongudu yakula yovalongeli vaJehova vefimbo li yadi. Oyo ongudu ya denga mbada omo ndi na okukala nohandi pandula Jehova eshi a ulikila nge onghedi omo handi dulu okumona ehafo lashili nondi pondole monghalamwenyo.”

Ongahelipi kombinga yoye? Ponhele yokulitulila po omalalakano omounyuni, omolwashike ito kanghamekele ‘eendjila doye’ kuJehova mokuninga omukokolindjila?—Tala oshimhungu,“ Mona omauwa oo ito dulu okumona kounivesti.”

Ovalihomboli vamwe ovo va li va ka talela po oshitaimbelewa shokOilongo ya Hangana, ova li va mona kutya Ovabetel ovo tava longele Jehova moshitaimbelewa osho ova hafa. Omumwameme okwa ka shanga lwanima ta ti: “Otwa li tu wete twa wanenwa komalipyakidilo etu.” Ovalihomboli ovo ova li va tokola opo va lande efimbo neenghono omolwomaufembanghenda oilonga manene.

Pomhito imwe, ovalihomboli ovo ova li ve wete omalunduluko oo ve na okuninga taa monika a fa maadjuu kanini. Ndele efiku limwe, ova li va dilonga komushangwa wefiku, wefiku olo. Omushangwa oo oJohannes 8:31 omo Jesus a popya ta ti: “Ngenge tamu kala meendjovo dange, onye ovalongwa vange shili.” Ve na omushangwa oo momadiladilo, ova tomhafana tava ti: “Keshe osho hatu ningi opo tu nangwafapaleke onghalamwenyo yetu, otashi ti sha.” Ova li va landifa po eumbo lavo la kula, tave likufa omikundu dimwe, nokutembukila keongalo oko ku na omhumbwe. Paife otava kokola ondjila, hava kwafele yo mokutunga Omalupale Ouhamba nohave liyambe poyoongalele yoshitukulwa. Mbela ove udite ngahelipi? Ova ti: “Otwa kuminwa ehafo olo tu na eshi tu na onghalamwenyo i li paunafangwa, twa ninga naanaa ngaashi ehangano laJehova tali tu ladipike tu ninge.”

Salomo okwa ti: “Omesho oye naa tale a yukilila, neemhafu doye nadi yukilile.” (Omayel. 4:25) Ngaashi omushingi ha yandje elitulemo filufilu eshi ta shingi, nafye otu na okuhenuka oinima oyo tai tu imbi tu litulile po omalalakano opamhepo noku a hanga.

Omalalakano opamhepo elipi tashi dulika u litulile po noku a hanga? Elalakano la denga mbada olo okuya  moilonga yefimbo li yadi. Limwe vali okuyakula eongalo lopoushiinda ngeenge ola pumbwa ovaudifi va pyokoka opo li dule okumana ko oshitukulwa shalo osho sha kula. Ile eongalo otashi dulika li na ovaudifi vahapu va pyokoka, ndele kali na ovakulunhuongalo novayakuliongalo va wana. Mbela ito dulu okukwafela muimwe yomeenghedi odo? Omolwashike ito popi nomupashukilishikandjo opo u tale ngeenge oto dulu okukwafela monghedi imwe? Ngeenge owa halelela oku ka kwafela komaongalo okokule oko ku na omhumbwe, oto dulu okupula ouyelele kombinga yaasho. *

Natu shuneni koshiningwanima osho sha popiwa muJesaja 62:10. Ovajuda vamwe otashi dulika va li va longa noudiinini mokulalakanifa nokuwapaleka oshitauwa eshi tava shuna keduumbo lavo opo oshiwana shaKalunga shi fike kolukalwa lasho. Ngeenge oto longo noudiinini opo u hange omalalakano oye moilonga iyapuki, ino sholola. Kekwafo laKalunga, naave oto dulu yo okuhanga omalalakano a tya ngaho. Twikila okupula Jehova e ku pe ounongo eshi to kendabala okukufa omainda mondjila yoye. Mokweendela ko kwefimbo, oto ka mona nghee Jehova te ku kwafele u ‘yelakanife elila lomhadi yoye.’ — Omayel. 4:26.