PETRUS okwa li a lila neenghono konima eshi a li e lidimbika Jesus. Nonande okwa li e na okuninga eenghendabala a xwepopaleke oupamhepo waye, Jesus okwa li a hala oku mu longifa a kwafele vakwao. Onghee hano, Jesus okwe mu lombwela ta ti: “Ngenge wa aluka, pameka oovakweni.” (Luk. 22:32, 54-62) Petrus okwa ka ninga umwe womwaavo va li eengudi deongalo lopaKriste lomefelemudo lotete. (Gal. 2:9) Sha faafana, omulumenhu oo a li a kanifa oshinakuwanifwa shoukulunhuongalo ota dulu oku shi alulilwa nokumona ehafo mokupameka ovaitaveli vakwao pamhepo.

Vamwe ovo va li ovapashukili ova kufwa oshinakuwanifwa osho notashi dulika va kale ve udite kutya itava dulu vali okupondola. Julio * wokuAmerika lokOlukadi, oo a kala omukulunhuongalo oule womido di dulife 20, okwa ti: “Onda kala ndi hole okulilongekida oipopiwa, oku ka talela po ovamwatate nokuninga omatalelepo oufita. Ndele ombadilila, onda kanifa omaufembanghenda aeshe oo, nonda fyaala po hautuka. Onda li nda nyika oluhodi neenghono.” Paife, Julio okwa ninga vali omukulunhuongalo.

Omuhongwa Jakob okwa shanga ta ti: “Ovamwatate, hafeni shili, ngenge tamu hangika komahongaulo opahapu.” (Jak. 1:2) Jakob okwa li ta popi kombinga yomahongaulo oo haa etifwa komahepeko nokokuhawanenena kwetu. Okwa popya shi na sha nomahalo okuliholamwene, onhondo nosho tuu. (Jak. 1:14; 2:1; 4:1, 2, 11) Ngeenge Jehova te tu pe outekuduliko, otashi dulika shi tu nyemateke. (Heb. 12:11) Ashike osho kashi na oku tu imba tu kale twa hafa.

Nokuli nonande otwa kufwa oufembanghenda wonhumba meongalo, otu na natango omhito yokutala kutya eitavelo letu ola kola shi fike peni nokuulika kutya otu hole Jehova. Ohatu dulu yo okudilonga ketomheno kutya omolwashike twa li twa lalakanena oufembanghenda  oo. Mbela omolwouwa wetu vene ile ohole yokuhola Kalunga oyo ya li ye tu linyengifa nosho yo kutya otwa tomhwa ngoo kutya eongalo olaKalunga nola pumbwa okufilwa oshisho pahole? (Oil. 20:28-30) Ovo va li nale ovakulunhuongalo ndele otava twikile nehafo okulonga oilonga iyapuki ova ulikila keshe umwe, mwa kwatelwa Satana, kutya ove hole shili Jehova.

Ohamba David oya li ya pewa outekuduliko eshi ya nyona omanyono a kwata moiti, noya li ya tambula ko epukululo noya diminwa po. David okwa imba ta ti: “Omunelao ou omanyono aye a dimwa po nomatimba aye a tuvikwa. Omulumenhu omunelao oye ou Omwene ite mu valulile owii waye, nomomhepo yaye ngenge kamu na ekonda.” (Eps. 32:1, 2) Outekuduliko owa kwafela David nokwa li a ninga omufita muwa woshiwana shaKalunga.

Luhapu, ovamwatate ovo hava alulilwa oshinakuwanifwa shavo shoukulunhuongalo ohava kala ve shii nawa okulifa oufita shi dulife nale. Umwe womuvo okwa ti: “Paife ondi shii nawa nghee ndi na okuungaunga naavo va ninga omapuko.” Omukulunhuongalo umwe vali okwa ti: “Paife onda lenga filufilu oufembanghenda wange wokuyakula ovamwatate.”

Omupsalme okwa ti kutya Jehova “iha handuka alushe.” (Eps. 103:9) Onghee hano, inatu diladila nande kutya Kalunga ke na fiku a ka kale vali e lineekela omunhu oo a ninga epuko la kwata moiti. Ricardo oo a kala omukulunhuongalo oule womido dihapu ndele okwa li a kanifa oufembanghenda oo okwa ti: “Onda li nda fula onya omolwepuko lange mwene. Oule wefimbo lile, onda kala ndi udite kutya inandi wana, naasho osha imba nge ndi lalakanene vali oshinakuwanifwa shokukwafela ovamwatate ndi li omukulunhuongalo. Kanda li ndi na elineekelo kutya ohandi dulu vali okuulika kutya ondi shii okulineekelwa. Ndele molwaashi ondi hole okukwafela vamwe, onda li handi ningi omakonakonombibeli, handi tu omukumo ovamwatate pOlupale lOuhamba nokulonga pamwe navo moukalele. Osho osha kwafela nge ndi kale vali ndi na omukumo, nopaife onda ninga vali omukulunhuongalo.”

 Okukwata onghone otaku dulu okwiimba omumwatate a ninge omukulunhuongalo. Itashi ka kala tuu pandunge okukala twa fa omupiya waJehova, David, oo a li a ya onhapo ohamba inandubo Saul! David ina alulila Saul owii waye nokuli naashi eemhito doku shi ninga da li da holoka po. (1 Sam. 24:4-7; 26:8-12) Eshi Saul a fila molwoodi, David okwe mu lila, nokwa ti kutya Saul nomonamati Jonatan “ovaholafani novahokwafani.” (2 Sam. 1:21-23) David ka li a kwata onghone.

Ngeenge ou wete ovakulunhuongalo va fa inava uda ko onghalo yoye ile inava ungaunga naave pauyuki, ino kala u na onghone. Pashihopaenenwa, William oo a kala omukulunhuongalo oule womido 30 lwaapo muBritania, okwa li a kufwa oshinakuwanifwa osho, nokwa li a kwatela onghone ovakulunhuongalo vamwe. Oshike sha li she mu kwafela a efe po oikala ya tya ngaho? Okwa ti: “Okulesha embo laJob oko kwa twa nge omukumo. Ngeenge Jehova okwa li a kwafela Job a pange ombili nookaume kaye vatatu, osha yela kutya naame ota dulu okukwafela nge ndi pange ombili novakulunhuongalo Ovakriste.” — Job 42:7-9.

Ngeenge owa li wa efa po oshilonga shokulifa oufita waKalunga, otashi ka kala shiwa okulipula kutya omolwashike we shi ningila. Mbela owa li wa wililwa po komaupyakadi opaumwene? Mbela ope na oinima yonhumba oyo u wete oyo unene ya fimana monghalamwenyo yoye? Ile pamwe owa li wa teka omukumo omolwokuhawanenena kwavamwe? Kutya nee oshike, dimbuluka kutya owa li to dulu okukwafela vamwe meenghedi dihapu eshi wa li omukulunhuongalo. Oipopiwa yoye oya li hai va pameke, oshihopaenenwa shoye oshe va twa omukumo nomatalelepo oye oufita okwe va kwafela ve lididimikile omayeleko. Oilonga yoye eshi wa li omukulunhuongalo omudiinini oya li ya hafifa omutima waJehova nosho yo woye. — Omayel. 27:11.

Jehova okwa kwafela ovalumenhu vonhumba va kale vali va hafa nokukala ve na ehalo lokukwatela komesho meongalo. Ngeenge owa efa po oukulunhuongalo ile we u kufwa, oto dulu natango okulalakanena “oshilonga shoufitaongalo.” (1 Tim. 3:1) Paulus ‘ina efa okwiilikanena’ Ovakriste vomuKolossi opo va kale ve na eshiivo lashili lehalo laKalunga opo ‘okweenda kwavo ku wapalele Omwene.’ (Kol. 1:9, 10) Ngeenge owa alulilwa oufembanghenda wokukala omukulunhuongalo, pula Jehova e ku pe eenghono, e ku kwafele u kale omulididimiki nowa hafa. Momafiku aa axuuninwa, oshiwana shaKalunga osha pumbwa ekwafo lopamhepo lovafita ovanahole. Ito dulu mbela noino hala okupameka ovamwaxo?