1. Omolwashike Jehova a wana okupandulwa?

JEHOVA, Omuyandji ‘wakeshe oshipewa shiwa, nokeshe oshali sha wanenena,’ okwa wana lela okupandulwa. (Jak. 1:17) E li Omufita wetu omunahole, oha file oshisho eemhumbwe detu dopalutu nodopamhepo. (Eps. 23:1-3) Oku li “ehondamo letu neenghono detu,” unene tuu momafimbo madjuu. (Eps. 46:2) Onghee hano, otu na omatomheno mahapu okudimina nomutima aushe pamwe nomupsalme oo a ti: ‘Panduleni Jehova, osheshi oye omuwa, ouwanghenda waye tau kala po fiyo alushe.’ — Eps. 106:1.

2, 3. (a) Oshike tashi dulu oku tu ningilwa ngeenge otwa kala inatu lenga omanangekonoupuna oo tu na? (b) Omapulo elipi hatu ka kundafana moshitukulwa eshi?

² Omolwashike sha fimana kufye okukonakona kombinga yokuyandja olupandu? Ngaashi sha xunganekwa, ovanhu momafiku axuuninwa otava ende tava kanifa olupandu filufilu. (2 Tim. 3:2) Vahapu inava lenga omanangekonoupuna oo ve na. Ovanhu omamiliyona ova nwefwa mo koipindi yomounyuni nokomashiivifo ayo, nohava kendabala okulikongela oinima ihapu ponhele yokukala va wanenwa  kwaasho ve na. Nafye ohatu dulu okunwefwa mo noupu komhepo yokuhenolupandu ya tya ngaho. Ngaashi Ovaisrael vonale, ohatu dulu okukanifa olupandu li na sha nekwatafano letu lopofingo naJehova nosho yo omanangekonoupuna oo e tu pa. — Eps. 106:7, 11-13.

³ Diladila yo kutya oshike tashi dulu okuningwa po ngeenge tu li momayeleko manene. Pomafimbo a tya ngaho, ohatu dulu okuwililwa po noupu ndele hatu kala tuhe wete omanangekonoupuna oo tu na. (Eps. 116:3) Onghee hano, ongahelipi hatu dulu okukulika nokukala tu na omutima u na olupandu? Noshike tashi ke tu kwafela tu kale tu na etaleko liwa nokuli nonande otu li momayeleko manene? Natu ka kundafaneni kombinga yaasho.

4. Ongahelipi hatu dulu okukala tu na omutima u na olupandu?

⁴ Ngeenge otwa hala okukulika nokukala tu na omutima u na olupandu, otu na okudimina nokudilonga nolupandu komanangekonoupuna oo Jehova e tu pa nokukonakona noukeka oilonga yaye yohole i na oudiinini. Eshi omupsalme a li a ninga ngaho, okwa li a kuminwa oinima iwa ihapu oyo Jehova e mu ningila. — Lesha Epsalme 40:6; 107:43.

5. Oshike hatu dulu okulihonga komuyapostoli Paulus kombinga yokukulika olupandu?

⁵ Ohatu dulu okulihonga shihapu komuyapostoli Paulus kombinga yokukulika olupandu. Paulus okwa li ha dilonga komanangekonoupuna oo e na, nomolwaasho a li ha yandje olupandu tali di komutima. Oku shii kutya okwa li “omusheki nomutaatai nomuhepeki.” Onghee hano, okwa li a pandula Kalunga naKristus eshi ve mu fila onghenda noku mu lineekelela oukalele nonande okwa li a longa osho inashi yuka monakudiwa. (Lesha 1 Timoteus 1:12-14.) Paulus okwa li yo a lenga neenghono Ovakriste vakwao naluhapu okwa li ha pandula Jehova omolwomaukwatya avo mawa noilonga yavo youdiinini. (Fil. 1:3-5, 7; 1 Tes. 1:2, 3) Eshi Paulus a li a taalela eenghalo didjuu, okwa li ha pandula Jehova nopehe na okwoongaonga omolweyambidido li li pefimbo olo a li ha mono okudja kovamwaxe vopamhepo. (Oil. 28:15; 2 Kor. 7:5-7) Nomolwaasho itashi kumwifa eshi Paulus a shangela Ovakriste te va ladipike ta ti: “kaleni mu shi kupandula . . . , [twaafaneni omukumo, NW], nomapsalme nomaimbilopandulo, nomalwiimbo opamhepo nokwiimbila Kalunga nokupandula.” — Kol. 3:15-17.

6. Omanangekonoupuna okondadalunde aJehova elipi wa pandula?

⁶ Ongahelipi hatu dulu okulandula oshihopaenenwa shiwa shaPaulus shokukulika nokuulika olupandu? Ngaashi Paulus, otwa pumbwa okudilonga kwaasho Jehova e tu ningila pauhandimwe. (Eps. 116:12) Ngeenge owa pulwa kutya, ‘Omanangekonoupuna aJehova elipi wa pandula?’ oto ka nyamukula ngahelipi? Mbela oto ka kwatela mo ngoo ekwatafano loye lopofingo naJehova? Ile eshi ho diminwa po omolweitavelo mekuliloyambo laKristus? Mbela oto ka tumbula ngoo omadina ovamwatate novamwameme ovo ve ku kwafela eshi wa li momayeleko manene e lili noku lili? Osha yela kutya ito kala ino tumbula kaume koye kopahombo omuholike ile ovana voye. Onghee hano, dilonga oule wefimbo keenghedi dihapu omo Kalunga e ku nangeka noupuna. Naasho otashi ke ku linyengifa u mu pandule efiku keshe. — Lesha Epsalme 92:2, 3.

7. (a) Omolwashike tu na okupandula Jehova meilikano? (b) Ongahelipi to ka mona ouwa ngeenge oho yandje olupandu momailikano oye?

⁷ Ngeenge otwa dilonga komanangekonoupuna etu aeshe, ohatu ka pandula Jehova meilikano. (Eps. 95:2; 100:4, 5) Vahapu ova tala ko eilikano li li ashike omhito yokupula osho va hala. Ndele fyeni otu shi shii kutya Jehova oha kala a hafa ngeenge hatu mu pandula omolwoinima  oyo tu na. MOmbibeli omu na omailikano mahapu taa kumu omutima aavo va yandja olupandu, mwa kwatelwa laHanna nolaHiskia. (1 Sam. 2:1-10; Jes. 38:9-20) Onghee hano, natu hopaeneneni ovapiya vaKalunga ovadiinini ovo va li va ulika omhepo yolupandu. Pandula Jehova meilikano omolwomanangekonoupuna oo u na. (1 Tes. 5:17, 18) Ngeenge owa ningi ngaho, oto ka mona omauwa mahapu. Oto ka kala u udite wa pepelelwa, ohole yoye yokuhola Jehova otai ka xwama noto ka ehena popepi elela naye. — Jak. 4:8.

8. Oshike tashi dulu oku tu ningifa tu kanife olupandu laashishe osho Jehova e tu ningila?

⁸ Omolwashike tu na okulungama tuha kanife olupandu lokupandula Jehova omolwouwa waye? Omolwaashi otwa fyuulula eamo lokuhakala nolupandu. Jehova okwa li apa Adam naEva onhele yokukala, oshikunino shoparadisa. Ova li va pewa keshe osho va pumbwa, nova li ve na eteelelo lokukala nomwenyo fiyo alushe ve nombili. (Gen. 1:28) Ashike kava li ve na olupandu li na sha nomanangekonoupuna avo. Ova li va hala oinima ihapu omolwolwisho. Naasho osha ka etifa va kanife oinima aishe oyo va li ve na. (Gen. 3:6, 7, 17-19) Molwaashi otwa dingililwa kovanhu vounyuni vehe na olupandu, nafye ohatu dulu okupofipala, ndele hatu kala tuhe wete oinima aishe oyo Jehova e tu ningila. Ohatu dulu okuhovela okukala inatu lenga vali oukaume wetu naye. Otashi dulika tu kanife olupandu li na sha noufembanghenda wokukala oshitukulwa shoumwainafana womounyuni aushe. Ohatu dulu okukala twa pwila moinima younyuni ou tau xulu po mafiku. (1 Joh. 2:15-17) Opo tu henuke eemwiyo da tya ngaho, otu na okukala hatu dilonga komanangekonoupuna oo tu na nokupandula alushe Jehova omolwoufembanghenda wokukala oshiwana shaye. — Lesha Epsalme 27:4.

9. Ngeenge otwa hangwa komayeleko a kwata moiti, omolwashike tu na okudilonga komanangekonoupuna oo tu na?

⁹ Okukala tu na omutima u na olupandu otashi ke tu kwafele tu lididimikile omayeleko a kwata moiti. Otashi dulika tu kale tu udite twa wililwa po ngeenge otwa hangwa ombadilila keenghalo didjuu, ngaashi kaume kopahombo ehe fi omudiinini, ouvela wa kwata moiti, okufilwa umwe oo u hole ile okuhangwa koiponga yopaushitwe ihanauni. Pomafimbo a tya ngaho, ohatu ka hekelekwa nokupamekwa kokudilonga komanangekonoupuna oo tu na. Natu ka taleni koimoniwa yavamwe.

10. Ongahelipi Irina a mona ouwa mokuyandja elitulemo komanangekonoupuna oo e na?

 ¹⁰ Irina *, omukokolindjila wondjikilile wokuAmerika lokOlukadi, okwa li a hombolwa komukulunhuongalo oo a ka kala ehe fi vali omudiinini nokwa li e mu hauluka novana vavo. Oshike sha kwafela Irina a twikile okulongela Jehova noudiinini? Okwa ti: “Onda pandula eshi Jehova ta file nge oshisho pauhandimwe. Eshi nda hoolola okukala handi yandje elitulemo efiku keshe komanangekonoupuna oo ndi na, osha kwafela nge ndi mone kutya oshi li oufembanghenda okushiivika nokukala u holike kuTate yetu womeulu omwaameni. Ondi shii kutya ke na efiku a ka hauluke nge.” Nonande Irina okwa enda meenghalo dihapu didjuu monghalamwenyo yaye, okukala a hafa okwe mu kwafela a twikile okulididimika, noku li odjo yetwomukumo kuvamwe.

11. Oshike sha kwafela Kyung-sook e lididimikile ouvela wa kwata moiti?

¹¹ Kyung-sook, oo e li moAsia, okwa kala ta kokola ondjila nomushamane waye oule womido di dulife 20. Ombadilila, okwa li a monika okankela yokomapunga nokwa li a lombwelwa kutya oku na ko eemwedi nhatu fiyo hamano a fye. Nonande ye nomushamane waye ova pita momayeleko mahapu, ova kala alushe ve udite kutya ove na oukolele muwa. Okwa ti: “Onghalo oyo ya ka holoka po yokuhe na oukolele oya li ya denga nge neenghono, nda li ndi udite nda kanifa oinima aishe nonda li nda tila neenghono.” Oshike sha kwafela Kyung-sook e lididimike? Okwa ti: “Onguloshi keshe fimbo inandi ka nangala, ohandi ilikana mokule kombinga yoinima itano oyo nda pandula efiku olo. Ohandi kala ndi udite nda hekelekwa, naasho ohashi linyengifa nge ndi ulike ohole yange yokuhola Jehova.” Ongahelipi Kyung-sook a mona ouwa mokwiilikana onguloshi keshe? Okwa ti: “Onda mona kutya Jehova ohe tu kwafele tu lididimike meenghalo didjuu nonokutya otu na omanangekonoupuna mahapu monghalamwenyo yetu e dule omayeleko.”

12. Ongahelipi Jason a li a mona ehekeleko konima eshi a filwa omukulukadi waye?

¹² Jason, oo ha longo koshitaimbelewa shimwe muAfrica, okwa kala moilonga yefimbo li yadi oule womido di dulife 30. Okwa ti: “Omido heyali da pita, onda filwa omukulukadi wange, nohashi yahameke nge neenghono. Okukala handi diladila kouyahame oo a li e udite eshi a li e na okankela, ohaku teya nge omukumo neenghono.” Oshike sha kwafela Jason e lididimike? Okwa ti: “Efiku limwe onda li nda dimbuluka efimbo lonhumba liwa olo nda hafela pamwe nomukulukadi wange, ndele handi pandula Jehova omolwefimbo la tya ngaho. Onda li ndi udite nda pepelelwa nokonima yaasho onda li nda hovela okupandula Jehova pandjikilile omolwomafimbo oo mahafifa. Olupandu ola kwafela nge ndi lundulule etaleko lange. Natango ohandi kala ndi udite ouyahame eshi nda filwa, ashike mokukala handi pandula Jehova omolwohombo oyo nda li ndi na tai pondola nosho yo oufembanghenda woku mu longela pamwe naumwe oo a li e mu hole neenghono osha xwepopaleka etaleko lange.”

13. Oshike sha kwafela Sheryl e lididimike eshi a filwa oilyo ihapu youkwaneumbo wavo?

¹³ Eshi oshikungulu shinene shedina Haiyan sha denga oshitukulwa shopokati shaPhilippines lwopexulilo lomudo 2013, Sheryl, oo a li ashike e na omido 13, okwa li a kanifa konyala keshe shimwe. Okwa ti: “Eumbo letu noilyo youkwaneumbo wetu ihapu oya hanaunwa po.” Tate waye, meme waye nosho yo ovamwaina vatatu ova fila moshikungulu osho shinene. Oshike sha kwafela Sheryl e lididimikile onghalo ya tya ngaho nopehe na okukala a nyemata? Oku na omutima u na olupandu noha dilonga alushe komanangekonoupuna oo e na natango.  Okwa weda ko ta ti: “Onda mona ashishe osho ovamwatate novamwameme va ninga opo va hekeleke nokutwa omukumo ovo va li va pumbwa ekwafo. Onda li ndi shii kutya ovamwatate aveshe mounyuni ova li va kwatela nge momailikano avo. Onda pandula neenghono eshi Jehova e li Kalunga kange. Ohe tu pe alushe oinima oyo twa pumbwa.” Okukala tu na olupandu li na sha nomanangekonoupuna oo tu na otaku ke tu kwafela tu henuke okukala twa wililwa po koluhodi. Omutima u na olupandu otau ke tu kwafela tu pule komesho nonande otu li meenghalo dinyemateka. — Ef. 5:20; lesha Ovafilippi 4:6, 7.

14. Otu na eteelelo litunhula lilipi? (Tala efano pehovelo loshitukulwa.)

¹⁴ Mondjokonona aishe, oshiwana shaJehova osha kala hashi hafele omanangekonoupuna asho. Pashihopaenenwa, konima eshi Ovaisrael va li va xupifwa momake aFarao nomatangakwaita aye pEfuta Litilyana, ova li va imba nehafo tava tange nokupandula Jehova. (Ex. 15:1-21) Kunena, limwe lomomanangekonoupuna mahapu oo twa lenga olo eteelelo letu loku ka mangululwa koinima aishe oyo tai tu etele ouyahame nenyeme. (Eps. 37:9-11; Jes. 25:8; 33:24) Diladila kunghee hatu ka kala tu udite ngeenge Jehova okwa hanauna po ovatondi vaye aveshe noku tu twala mounyuni mupe wombili nowouyuki. Olo itali ka kala tuu efiku lokuyandja olupandu linene! — Eh. 20:1-3; 21:3, 4.

15. Owa tokola toko okuninga shike momukokomoko womudo 2015?

¹⁵ Otwa teelela nodjuulufi oku ka pewa kuJehova omanangekonoupuna opamhepo ehe fi okuyelekwa nasha momukokomoko womudo 2015. Oshoshili kutya otashi dulika yo tu ka shakeneke omayeleko onhumba, ndele kashi na nee mbudi kutya okwa tya ngahelipi, otu shii kutya Jehova ke na efiku e ke tu hauluke. (Deut. 31:8; Eps. 9:10, 11) Ota ka twikila oku tu pa keshe osho twa pumbwa opo tu mu longele noudiinini. Onghee hano, natu kaleni twa tokola toko okukala noikala ya fa yomuprofeti Habakuk, oo a ti: “Osheshi omukwiyu itau hape vali, nomuviinyu itau ima sha vali. Oshilonga sholumono tashi ka hepa. Nomapya itaa yandje vali eendya. Eedi domoshiunda tadi fi oludodo neengobe itadi ka kala vali moiunda. Nande ngaha, ame handi ka hafela Omwene, ame handi ka kuwilila Kalunga kexupifo lange.” (Hab. 3:17, 18) Momukokomoko womudo ou, natu dilongeni nehafo komanangekonoupuna oo tu na nokulinyengifwa tu tule moilonga ekumaido lomushangwa wetu womudo 2015, oo tau ti: ‘Panduleni Jehova, osheshi oye omuwa.’ — Eps. 106:1.