1. Oshike sha li sha ningifa oilonga yokuudifa idjuu?

ESHI oshiwana shaJehova sha li sha hovela okuudifa onghundana iwa oule womido di dulife 130 da ka lupuka, osha kala nokushakeneka omaupyakadi mahapu. * (Tala eshangelo lopedu.) Ngaashi Ovakriste vomefelemudo lotete, nasho osha li okangudu kanini nosha li tashi udifa etumwalaka olo lihe holike kuvahapu. Vamwe ova li tava diladila kutya inashi hongwa. Lwanima eshi Satana a ka ekelwa kombada yedu, osha ka kala tashi hepekwa. (Ehololo 12:12) Ashike okudja ngoo pefimbo opo, osha kala tashi udifa pefimbo olo ‘lomafiku axuuninwa’ oo “madjuu” okukaliwa muo. — 2 Timoteus 3:1.

2. Oshike osho Jehova a kala ta ningi opo e tu kwafele tu udife?

² Jehova okwa kala ta kwafele oshiwana shaye. Okwa hala shi udife onghundana iwa mounyuni aushe, noita ka pitika nande  osha shi ye moshipala oilonga oyo. Okwa kwafela oshiwana shaye shi mu longele monghedi oyo a hokwa moku shi yoolola mo momalongelokalunga oipupulu. Osho osho yo a li a ninga eshi a mangulula Ovaisrael muBabilon. (Ehololo 18:1-4) Naasho Jehova he tu hongo ohashi tu etele ouwa pauhandimwe. Ohe tu kwafele tu kale nombili navakwetu, note tu deula tu honge vakwetu kombinga yaye. (Lesha Jesaja 48:16-18.) Nonande Jehova ota wilike oilonga yetu, inashi hala okutya oha lundulula alushe oiningwanima younyuni opo e tu kwafele tu udife. Oshoshili kutya oinima imwe oyo ya ningwa mounyuni oye shi ningifa shipu kufye okuudifa. Ashike natango ohatu hepekwa nohatu hangwa komaupyakadi oo haa dilile mounyuni waSatana. Ohatu dulu ashike okuudifa omolwekwafo laJehova. — Jesaja 41:13; 1 Johannes 5:19.

3. Ongahelipi exunganeko laDaniel la wanifwa?

³ Daniel okwa xunganeka kutya pefimbo lexulilo, ovanhu vahapu otava ka uda ko oshili yOmbibeli. (Lesha Daniel 12:4.) Manga ‘efimbo lexulilo’ la li inali hovela, Jehova okwa kwafela oshiwana shaye shi ude ko omahongo Ombibeli a fimana noshihatambule ko omahongo omalongelokalunga oipupulu. Kunena, oshiwana shaye otashi hongo oshili yOmbibeli mounyuni aushe. Osha yela kutya exunganeko laDaniel ola wanifwa. Ovanhu hanga omamiliyona ahetatu ove lihonga oshili notave i hongo vakwao. Ndele mbela oinima ilipi ya kwafela oshiwana shaJehova shi udife mounyuni aushe?

4. Momudo 1900, Ombibeli oya li ya tolokwa momalaka e fike peni?

⁴ Kunena, ovanhu vahapu ove na Eembibeli, naasho oshe tu kwafela tu va honge onghundana iwa. Ashike hasho sha kala alushe ngaho. Oule womido omafele, ovafita veengeleka dOukwakriste inava kala va hala ovanhu va leshe Ombibeli. Ova kala nokuli hava hepeke ovo tave i lesha nokudipaa vamwe ovo ve i toloka. Ashike momukokomoko womudo 1800 nasha, omahangano amwe okwa li a toloka nokupilinda Ombibeli ile oitukulwa yayo momalaka 400 lwaapo. Momudo 1900, ovanhu vahapu ova ka kala ve na Eembibeli. Ashike nande ongaho, kava li ve udite ko osho tai hongo.

5. Eendombwedi daJehova oda ninga eenghendabala dilipi opo di toloke Ombibeli?

⁵ Oshiwana shaJehova oshi shii kutya oshi na okulombwela vamwe kombinga yaasho Ombibeli tai hongo, naasho osho naanaa sha ninga. Tete osha li hashi longifa omatoloko Eembibeli oo a li po, nosha li hashi yandje eekopi dao kovanhu. Okudja mo 1950, osha nyanyangida Ombibeli yo-New World Translation of the Holy Scriptures, ile oitukulwa yayo momalaka e dulife 120. Mo 2013, osha nyanyangida Ombibeli ya pepalekwa yOshiingilisha yo-New World Translation. Etoloko olo oli pu okuudiwa ko nosho yo okutoloka. Nongeenge hatu longifa Ombibeli oyo ovanhu tava dulu okuuda ko, ohashi kala shipu oku va honga oshili.

6, 7. (a) Oita ilipi ya kala ko momukokomoko womido 100 da ka lupuka? (b) Ongahelipi omafimbo ombili omoilongo imwe e tu kwafela tu udife?

⁶ Momukokomoko womido 100 da pita, opa kala oita ihapu, mwa kwatelwa oita younyuni yopavali. Ovanhu omamiliyona ova fya. Ndele mbela omonghedi ilipi pa li ombili, nongahelipi ya li ya kwafela oshiwana  shaJehova shi udife? Pefimbo loita itivali younyuni, omumwatate Nathan Knorr oye a li ta kwatele komesho Eendombwedi daJehova. Poshoongalele shomo 1942, okwa li a yandja po oshipopiwa shitunhula shi na oshipalanyole “Peace—Can It Last?,” [“Ombili otai kalelele tuu?”] Omumwatate Knorr okwa li a yelifa exunganeko lEhololo etukulwa 17 nokwa li a ulika kutya Harmagedon ka li te uya efimbo olo. Konima yoita, opa li tapa ka kala efimbo lombili. — Ehololo 17:3, 11.

⁷ Oshoshili kutya osho kasha li sha hala okutya konima yoita opa li tapa ka kala ombili keshe pamwe. Okudja poita itivali younyuni, ovanhu omamiliyona ova fila moita imwe vali. Ashike moilongo ihapu omwa kala omafimbo ombili oo e shi ningifa shipu koshiwana shaJehova shi udife. Oidjemo oya li shike? Pefimbo loita itivali younyuni, opa li Eendombwedi daJehova dinini di fike hanga po 110 000. Ashike kunena ope na Eendombwedi di fike hanga pomamiliyona ahetatu. (Lesha Jesaja 60:22.) Nopehe nomalimbililo, pomafimbo ombili ohatu dulu okuudifa onghundana iwa nokuli nokovanhu vahapu.

8, 9. Ongahelipi sha ninga shipu okuya momalweendo, nomolwashike osho hashi tu kwafele moilonga yetu?

⁸ Eshi oshiwana shaJehova sha hovela okuudifa mOilongo ya Hangana, omalweendo kaali a pu kusho. Mo 1900, hanga omido 21 konima eshi oshiwana shaJehova sha li sha hovela okupilinda Oshungonangelo, moshilongo osho omwa li ashike eehauto hanga 8 000 nomwa li eepate dinini. Ashike kunena oku na eehauto di dulife pebiliyona limwe netata mounyuni aushe, nomoitukulwa ihapu omu na eendjila dihapu diwa. Onghee hano, ohatu dulu okweenda meepate odo hatu longifa eehauto opo tu ka udifile ovanhu ovo ve li koitukulwa yokokule needoolopa, oko haku fikwa noudjuu. Nonande otu li keenhele oko omalweendo ehe fi mapu, notu na okweenda oinano ile, ohatu ningi keshe osho hatu dulu opo tu ka udifile ovanhu keshe apa ve li. — Mateus 28:19, 20.

⁹ Ohatu longifa yo oyeendifo yomaludi amwe vali. Ohatu tumu Eembibeli nosho yo oishangomwa ikwao nomaloli, neeshikepa nosho yo nomashina okolutenda. Osho osha hala okutya ohatu dulu okutumina ovamwatate novamwameme ovo ve li keenhele de likalela oileshomwa meni ashike loivike inini. Ovapashukilishikandjo, oilyo yOkomitiye yOitaimbelewa, ovatumwa nosho yo vamwe, ohava i momalweendo needila va ka yandje oipopiwa poyoongalele nokukwafela omaongalo. Oilyo yOlutuwiliki nosho yo ovamwatate vamwe vokeembelewa da kula dEendombwedi daJehova, ohava i needila koilongo ihapu va ka twe omukumo nokudeula ovamwatate novamwameme. Ashishe osho ohashi kwafele oshiwana shaJehova shi kale sha hangana. — Epsalme 133:1-3.

10. Oshiingilisha ohashi longifwa ngahelipi mounyuni aushe?

¹⁰ Mefelemudo lotete, ovanhu vahapu mOuhamba waRoma ova li hava popi Oshigreka. Kunena, Oshiingilisha osho unene hashi popiwa kovanhu vahapu mounyuni aushe. Embo English as a Global Language, ola popya kutya, oshitine shovakalimo mounyuni aushe ohashi popi ile hashi udu Oshiingilisha. Ovanhu vahapu ohave lihongo Oshiingilisha molwaashi ohashi longifwa mounyuni aushe mokungeshefa, mopolotika, mounongononi nosho yo mouteknologi.

11. Oshiingilisha osha kuma ngahelipi oilonga yoshiwana shaJehova?

¹¹ Okulongifwa kOshiingilisha apeshe okwa kwafela mokutandaveleka oshili. Nale oishangomwa yetu oya li hai nyanyangidwa ashike mOshiingilisha. Ovanhu vahapu ova li tava dulu oku i lesha molwaashi Oshiingilisha osha li hashi popiwa mounyuni aushe. Oshiingilisha osho yo hashi longifwa keembelewa detu da kula. Ovamwatate novamwameme ovo va dja koilongo i lili noku lili nove udite Oshiingilisha, ohava deulwa keefikola detu moPatterson, moNew York.

12. Oishangomwa yetu ohatu i toloka momalaka angapi, nongahelipi eeprograma deekompiuta de shi ningifa tashi shiiva?

¹² Otu na oshinakuwanifwa shokuudifila ovanhu mounyuni aushe onghundana iwa. Nomolwaasho hatu toloka oishangomwa yetu momalaka e dulife 700. Osho ohashi shiiva ngahelipi? Eekompiuta nosho yo eeprograma dado, ngaashi oyo hai ifanwa MEPS, ode tu kwafela tu dule okutoloka. Oshidjemo, Eendombwedi daJehova mounyuni aushe otadi dulu okuuda ko elaka la “koshoka” loshili yOmbibeli nokukala da hangana. — Lesha Sefanja 3:9.

13, 14. Ongahelipi eemhango nosho yo omatokolo eemhangu e tu kwafela?

¹³ Omhango yaRoma oya li ya kwafela Ovakriste vomefelemudo lotete meenghedi dihapu va dule okuudifa. Nokunena, eemhango domoilongo ihapu ode tu kwafela eshi hatu longo oilonga yokuudifa. Pashihopaenenwa,  eemhango domOilongo ya Hangana oda yandja oufemba kovanhu va hoolole elongelokalunga olo va hala, va popye kombinga yaasho va itavela nova kale hava ongala pamwe. Osho osha hala kutya otu na oufemba wokukala hatu ongala pamwe nokuudifa moshilongo osho. Otu na yo natango oufemba wokuunganeka oilonga yetu yokuudifa mounyuni aushe keembelewa detu da kula mOilongo ya Hangana. Oshoshili kutya ope na omafimbo amwe oo twa li tu na okuya komhangu opo tu ka popile oufemba wetu wokuudifa onghundana iwa. (Ovafilippi 1:7) Nongeenge ovapanguli novatokoli vomeemhangu odo ova kendabala oku tu kufa oufemba wetu wokuudifa, ohatu shi twala komhangu yopombada oko luhapu hatu findana.

¹⁴ Otwa ya yo keemhangu moilongo imwe vali opo tu popile emanguluko letu lokulongela Jehova nokuudifa. Ngeenge inatu li pewa, ohatu shi twala komhangu yopaiwana. Pashihopaenenwa, luhapu otwa kala hatu i kOmhangu yOufemba wOmunhu yaEuropa. MuJuni 2014, momhangu oyo otwa findana mo oibofa 57, noilongo ihapu yaEuropa oi na okudulika komatokolo omhangu oyo. Nonande otu ‘tondike koiwana aishe,’ eemhango domoilongo ihapu ode tu pitika tu longele Jehova twa manguluka. — Mateus 24:9.

15. Ongahelipi eenghedi dokupilinda da xuma komesho, naasho oshe tu kwafela ngahelipi?

¹⁵ Eenghedi dipe dokupilinda ode tu kwafela tu udifile ovanhu vahapu neenghono onghundana iwa. Oule womido omafele, ovanhu ova kala tava longifa onghedi yokupilinda oyo ya ndulukwa po kuJohannes Gutenberg mo 1450 lwaapo. Ashike omido 200 da pita, eenghedi dokupilinda di lili noku lili oda  xuma komesho neenghono. Opa ndulukwa omashina oshinanena okupilinda oo e shi ninga tashi shiiva opo oilonga yokupilinda i kale tai endelele noishangomwa ohai kala tai monika nawa. Osha ninga yo shipu okuninga eembapila nokulonga omambo. Omalunduluko a tya ngaho okwa kuma ngahelipi oishangomwa yetu? Mo 1879, Oshungonangelo yotete oya li ashike ya nyanyangidwa mOshiingilisha. Oya li ya pilindwa eekopi 6 000, ndele kaya li i na omafano. Kunena, Oshungonangelo ohai nyanyangidwa momalaka e dulife po 200. Ohaku nyanyangidwa eekopi di dulife 50 000 000 di na omafano mawa nokwa twa nawa.

16. Oinima ilipi ya ndulukwa ye tu kwafela tu udife mounyuni aushe? (Tala efano pehovelo loshitukulwa.)

¹⁶ Oinima yoshinanena oyo ya kala tai longwa oule womido 200 da ka pita, oya kwafela oshiwana shaJehova shi udife onghundana iwa. Nonande otwa tumbula nale omashina okolutenda, eehauto nosho yo eedila, opa kala yo eembashikela, omashina okutopatopa, omashina oo ha pilinda eendada doshipofi, eendelekelama, eetelefona, omafano, oikwatimawi, oikwati youvidio, eeradio, ee-TV, eemuvi, eekompiuta nosho yo ointaneta. Nonande oshiwana shaJehova hasho sha nduluka oinima ya tya ngaho, ohashi i longifa opo shi nyanyangide Eembibeli nosho yo oishangomwa ikwao momalaka mahapu nokuudifa mounyuni aushe. Kungaho, otashi ‘nu omashini oiwana,’ ngaashi sha xunganekwa mOmbibeli. — Lesha Jesaja 60:16.

17. (a) Okulongwa kwoilonga yokuudifa otaku ulike shike? (b) Omolwashike Jehova a hala tu longe pamwe naye?

¹⁷ Osha yela kutya Jehova ota wilike oilonga yetu yokuudifa. Jehova okwe tu pa oilonga oyo, hamolwaashi pamwe ita dulu oku i longa nopehe na ekwafo letu, ndele omolwaashi e tu hole nokwa hala tu longe pamwe naye. Oilonga yetu yokuudifa otai mu ulikile kutya otu mu hole nosho yo kutya otu hole ovanhu vakwetu. (Markus 12:28-31; 1 Ovakorinto 3:9) Otwa pandula Jehova neenghono eshi te tu kwafele tu udifile ounyuni aushe. Onghee hano, natu longifeni omhito keshe tu na tu udife kombinga yaJehova nOuhamba waye!