OKUUDIFA onghundana iwa oyo oilonga ya fimanenena oyo tai longwa mounyuni kunena. Oshi li oufembanghenda okukalela po Jehova moilonga oyo yokuhonga ovanhu. Ndele nande ongaho, omafimbo amwe ohashi kala eshongo kovakokolindjila novaudifi okukala alushe ovaladi moukalele. Omolwashike mbela?

Ovaudifi vamwe ova didilika kutya ohava kundafana ashike novanhu vanini ngeenge tava longo eumbo neumbo molwaashi momaumbo mahapu ihamu kala naanaa ovanhu. Omafimbo amwe ovanhu ovo hatu hange momaumbo, otashi dulika va kale vehe na ohokwe metumwalaka lOuhamba ile nokuli ve tu handukile. Ovaudifi vamwe ove na oitukulwa ya kula noi na ovanhu hava pwilikine nawa, ashike ovaudifi ovo ohava kala tave lipula kutya itava dulu okuudifila ovanhu aveshe moitukulwa oyo. Natango, ovaudifi vamwe ova kala nokuudifa oule womido dihapu ndele tava teka omukumo molwaashi exulilo inali uya natango.

Molwaashi otu li mounyuni oo u li mepangelo “lomunawii,” Satana Ondiaboli, ope na okukala omashongo moitukulwa yetu, oo taa dulu okukuma ouladi wetu; onghee hano itashi tu kumwifa eshi shihe fi shipu okuudifa onghundana iwa. — 1 Johannes 5:19.

Kashi na nee mbudi kutya omashongo oludi lilipi to shakeneke moukalele pauhandimwe, oto dulu okukala noushili kutya Jehova ote ke ku kwafela u a finde. Ndele mbela oshike to dulu okuninga po opo u dule okutwikila okuudifa nouladi? Natu ka kundafaneni omaetepo onhumba.

Omudo keshe, ovanhu omayovi ohava ninginifwa ve li Eendombwedi daJehova. Ngeenge opo wa ninginifwa, oto dulu okulihonga shihapu kwaavo va kala tava udifa oule womido dihapu. Nongeenge owa kala omuudifi oule womido dihapu, mbela ito dulu okukwafela ovo vape? Ngeenge owa ningi ngaho, otashi ke ku etela ehafo linene.

Jesus okwa li e shii kutya ovahongwa vaye ova li va pumbwa edeulo opo va kale ve shii okuhonga nawa, onghee okwa li e va honga nghee ve na okuudifa. (Lukas 8:1) Kunena, ovo vape navo ova pumbwa edeulo la faafana opo va kale ovaudifi ovanekeka.

 Katu na okufika pexulifodiladilo kutya molwaashi omuudifi mupe oha i moukalele, ote lihongo ashike ngahenya nghee e na okuhonga. Omuudifi a tya ngaho okwa pumbwa okudeulwa nokupukululwa pahole komuudifi a pyokoka. Omuudifi oo a pyokoka okwa pumbwa okuhonga oo mupe nghee e na (1) okulilongekida nokuliendifa po pwaasho ta ka popya komuneumbo, (2) okukundafana novanhu, (3) okuyandja oileshomwa, (4) okuninga omalishuneko kwaavo va ulika ohokwe nosho yo (5) okuhovela omakonakonombibeli. Omuudifi mupe ota dulu okukala ha pondola ngeenge oha konenene nokuhopaenena onghedi omo ovaudifi va pyokoka hava udifa. (Lukas 6:40) Ota dulu yo okukala e na omukumo ngeenge oku shii kutya ope na oo ta dulu oku mu kwafela ngeenge ta nyengwa. Ohatu dulu yo okukwafela ovaudifi vape mokukala hatu va pandula noku va pa omaetepo taa longo. — Omuudifi 4:9, 10.

Kakele keenghendabala odo ho ningi moukalele opo u popye novaneumbo, omafimbo amwe oto dulu okuhafela eenghundafana naao to longo naye. Dimbuluka kutya Jesus okwa li a tuma ovahongwa vaye va ka udife ve li ‘oovavali.’ (Lukas 10:1) Nopehe nomalimbililo, ova li hava twaafana omukumo nokuladipikafana eshi tava longo pamwe. Nafye kunena otu na omhito iwa ‘yokuhekelekafana’ eshi hatu longo pamwe novamwatate novamwameme moukalele. — Ovaroma 1:12.

Oshike tamu dulu okupopya naao to longo naye? Otamu dulu okuhokololelafana oimoniwa tai tu omukumo. Otamu dulu okuhepaululilafana oitwa ihokwifa oyo mwe lihonga pekonakono lopaumwene ile loukwaneumbo, ile oyo mwa uda pokwoongala kweongalo. Omafimbo amwe otashi dulika u longe nomuudifi oo muheshaafane nawa naye. Oto dulu oku mu pula kutya osha enda ngahelipi opo e uye moshili. Oshike she mu tomha a itavele kutya eli olo ehangano laJehova? Omaufembanghenda elipi a kala ta hafele mehangano laJehova? Naave oto dulu yo oku mu hokololela oimoniwa yoye. Kashi na nee mbudi kutya ovanhu otave linyenge ngahelipi moshitukulwa, ngeenge tamu longo naumwe moukalele, omu na omhito iwa ‘yokutungafana.’ — 1 Ovatessaloniki 5:11.

Opo tu kale alushe ovaladi moukalele, otwa pumbwa okuxwepopaleka onghedi omo hatu ningi ekonakonoletu lopaumwene. “Omupiya omudiinini nomunaendunge” oha nyanyangida oishangomwa oyo i na oikundafanwa ya yoolokafana, oyo hatu dulu okukonakona. (Mateus 24:45) Shimwe shomoikundafanwa oyo to dulu okukonakona pekonakono lopaumwene ongaashi: Omolwashike oilonga yokuudifa ya fimana? Okamhungu  “Omolwashike u na okukala alushe omuladi moukalele?” oka yelifa amwe omomatomheno okuudifa.

 Ngeenge owa konakona oitwa oyo i li mokamhungu oko, otashi ke ku kwafela u twikile okuudifa nouladi. Oto dulu yo oku shi ninga elalakano pekonakono loye lopaumwene okushanga omatomheno makwao opamishangwa e na sha nokuudifa nouladi nokudilonga kuo. Kungaho, oto ka kala to longo nouladi lela moukalele.

Ehangano laJehova ohali tu pe alushe omaetepo oo taa dulu oku tu kwafele tu xwepopaleke oukalele wetu. Pashihopaenenwa, kakele kokuudifa eumbo neumbo, ohatu dulu yo okushanga eenhumwafo, okuudifa okupitila mongodi, okuudifa momapandavanda ile meenhele daaveshe, nosho yo okuyandja oundombwedi wohangelela ile oku ka udifa keenhele doilonga. Natango ohatu dulu okuninga eemhangela tu ka udifile koitukulwa oko ku na Eendombwedi dinini ile kuhe na Eendombwedi nandenande.

Ou na ngoo ehalo okuhetekela omaetepo mape oo hatu pewa? Vahapu ovo va hetekela omaetepo a tya ngaho ova pondola. Tala koihopaenenwa itatu tai shikula.

Omumwameme wedina April okwa li a tokola okulongifa eetepo olo la li mokafo kOukalele Wetu wOuhamba li na sha nanghee to dulu okuhovela omakonakonombibeli. Okwa li a pula ovanailonga vatatu ovo hava longo pamwe naye ngeenge inava hala okukonakona Ombibeli. April okwa li a kumwa, ndele pefimbo opo tuu opo, okwa li a tunhukwa eshi ovanailonga aveshe ovo vatatu va dimina okukonakona Ombibeli nova hovela okukala hava i kokwoongala.

Otwa ladipikwa yo tu kale hatu twaalele oifo ovanhu ovo tu wete kutya otashi dulika va kale ve na ohokwe moikundafanwa yokondadalunde oyo i li moifo ya tya ngaho. Omupashukilishikandjo umwe wokOilongo ya Hangana okwa li a tokola okupa oomenindjela veengeshefa domataiyela moshitukulwa shonhumba  o-Awake! oyo i na oshitukulwa tashi popi kombinga yomataiyela. Ye nomukulukadi waye ova li yo va yandja meembelewa deendokotola di dulife 100 oifo yo-Awake! oyo ya li i na oitukulwa ya pambafana i li koshi yoshipalanyole “Understanding Your Doctor” [“Kala u na etaleko liwa li na sha nandokotola woye”]. Okwa popya kutya omatalelepo oo okwa kwafela ovanhu va tya ngaho va shiive oilonga yetu yokuudifa nosho yo oileshomwa yetu. Konima eshi omupashukilishikandjo oo nomukulukadi waye va enda tava shiiva ovanhu moshitukulwa, ova li va dula okuninga omalishuneko mahapu.

Omumwameme wedina Judy okwa shangela keembelewa detu da kula molwaashi okwa li a pandula eladipiko li na sha nokuudifa okupitila mongodi. Okwa popya kutya ina, oo a li e na omido 86 nokwa li a nyika ounghundi, okwa kala ha udifile ovanhu pandjikilile okupitila mongodi. Oshidjemo, okwa li a hovela ekonakonombibeli nomukulukadi mukwao womunamido womido 92.

Omaetepo oo hatu pewa okupitila moishangomwa yetu ohaa pondola shili. Kendabala oku a longifa. Otaa dulu oku ku kwafela u kale wa hafa moukalele nou twikile okuudifa nouladi.

Oshike hashi tu kwafele tu pondole moukalele? Okupondola kwetu inaku likolelela kouhapu woishangomwa oyo hatu yandje, komuvalu wovakonakonimbibeli ile komuvalu waavo twa kwafela va ninginifwe. Diladila shi na sha naNoa. Kakele koukwaneumbo waye, ovanhu vangapi a li a kwafela va ninge ovalongeli vaJehova? Ndele nande ongaho, okwa li a pondola moilonga yaye yokuudifa. Osho sha fimana okulongela Jehova noudiinini. — 1 Ovakorinto 4:2.

Ovaudifi vahapu ova didilika kutya opo va kale tava hafele oukalele, ove na okulitulila po omalalakano e li pandjele. Omalalakano oo oelipi mbela? Amwe omuo okwa tumbulwa “mokamhungu  “Litulila po omalalakano e li pandjele.”

Pula Jehova e ku kwafele opo u kale ho pondola moukalele woye noku u hafela. Ngeenge wa hange omalalakano oye, oto ka kala wa mbilipalelwa eshi u shii kutya oto kendabala ngaashi to dulu opo u udife onghundana iwa.

Oshoshili kutya omafimbo amwe ohashi kala eshongo okuudifa onghundana iwa. Ndele nande ongaho, ope na oinima oyo to dulu okuninga opo u twikile okuudifa nouladi. Kala ho hafele eenghundafana tadi tungu naao to longo naye moukalele, kala ho ningi ekonakono lopaumwene pandjikilile notali ti sha, hetekela omaetepo oo hatu pewa komupiya omudiinini nomunaendunge nokulitulila po omalalakano e li pandjele. Komesho yaaishe, dimbuluka kutya Jehova okwe ku pa oufembanghenda wokuudifa onghundana iwa u li umwe womEendombwedi daye. (Jesaja 43:10) Ngeenge owa twikile okukala alushe omuladi moukalele, oto ka mona ehafo linenenene.