JULIAN ota dimbuluka nghee a li e udite fiku a uda taku shiivifwa kutya omonamati ke fi vali Ondombwedi yaJehova. Okwa ti: “Ounyuni owa li wa fa wa xulila nge. Oye omonamati wange oo a kula kuvakwao, twa li tu na ekwatafano lopofingo notwa kala hatu ningi oinima ihapu pamwe.” Julian okwa popya kutya omonamati okwa kala alushe he lihumbata nawa, ndele ombadilila okwa li a lunduluka ndele ta hovele okuninga oinima ii. Omukulukadi waJulian okwa li ta lili neenghono, naJulian okwa li a nyengwa kutya ne mu hekeleke ngahelipi. Julian okwa ti vali: “Otwa kala hatu lipula ngeenge ofye twa dopa oku mu kwafela tu li ovadali.”

Ombibeli oya yandja omatomheno elipi okukonda mo umwe meongalo? Ndele ngeenge okukonda umwe ohaku yahameke neenghono, omolwashike taku tiwa kutya oku li oshinima shopahole?

Ngeenge umwe oo e li Ondombwedi yaJehova ya ninginifwa okwa nyono enyono la kwata moiti ndele ine livela ombedi ota kondwa.

Jehova ina teelela tu kale twa wanenena, ndele okwa teelela ovapiya vaye va kale hava dulika keemhango daye nokukala va koshoka. Pashihopaenenwa, Jehova okwa lombwela ovapiya vaye va henuke omanyono a kwata moiti ngaashi omilele da nyata, okulongela oikalunga, okuvaka, okunyeka, okudipaa noumhulile. — 1 Ovakorinto 6:9, 10; Ehololo 21:8.

Osho Jehova a teelela tu ninge oshi li pandjele noshi li eameno letu. Pashihopaenenwa, atusheni otwa hala okukala novanhu ovanambili, ve na eenghedi novanashili, naasho osho naanaa hatu mono mokati kovamwatate novamwameme vopamhepo. Omolwashike ve li ngaho? Omolwaashi ove liyapulila Jehova nove mu udanekela kutya otava ka dulika kwaasho a popya mOmbibeli.

Ndele mbela ongahelipi ngeenge Omukriste a ninginifwa okwa nyono enyono la kwata moiti omolwokuhawanenena? Osho osha li  sha ningilwa ovapiya vaJehova vamwe ovadiinini vonale, ashike Jehova ka li e va ekelashi filufilu. Pashihopaenenwa, nonande ohamba David oya li ya ya moluhaelo noya dipaa, omuprofeti Natan okwa li e i lombwela kutya Jehova okwe i dimina po omatimba ayo. — 2 Samuel 12:13.

Omolwashike Jehova a dimina po David? Omolwaashi Jehova okwa li e wete kutya David okwe livela ombedi shili. (Epsalme 32:1-5) Nokunena omunhu ota dulu okudiminwa po ngeenge okwe livela ombedi shili nokwa efa okulonga osho shii. (Oilonga 3:19; 26:20) Ngeenge ovakulunhuongalo ovo ve li mokomitiye yomhangu ove wete kutya omunhu ine livela ombedi shili, opo nee oku na okukondwa.

Ngeenge umwe womoukwaneumbo weni ile kaume koye kopofingo okwa kondwa, otashi dulika shi kale shidjuu okutambula ko etokolo olo la ningwa, notashi dulika u kale u udite kutya okwa pewa outekuduliko wonyanya. Ashike Eendjovo daKalunga otadi ulike sha yela nawa kutya okukonda mo omunhu meongalo oshinima shopahole.

Jesus okwa ti: ‘Ounongo wa hololwa koilonga yao.’ (Mateus 11:19) Natu ka konakoneni omatomheno atatu kutya omolwashike okukonda mo omunhu oo ine livela ombedi ku li etokolo lopandunge.

Okukonda ohaku amene edina laJehova liha shekwe. Osho hatu ningi otashi dulu okufimanekifa ile okushekifa Jehova molwaashi otwa humbata edina laye tu li Eendombwedi daye. (Jesaja 43:10) Ngaashi ashike elihumbato lomonamati tali dulu okufimanekifa ile okushekifa ovadali vaye, elihumbato lovapiya vaJehova otali dulu oku mu fimanekifa ile oku mu shekifa. Pefimbo laHesekiel, ovanhu ova li hava kwatakanifa Ovajuda nedina laJehova. (Hesekiel 36:19-23) Sha faafana kunena, ovanhu ohava kwatakanifa Eendombwedi daJehova nedina laJehova. Onghee hano, ngeenge ohatu dulika keemhango daJehova ohatu ke mu fimanekifa.

Omuyapostoli Petrus okwa pa Ovakriste omayele a ti: “Ngaashi ovana hava dulika, mokukala kweni inamu shikula vali omauhalu mwe a wanifa nale mokuhashiiva kweni. Ndelenee hopaeleleni Omuyapuki ou e mu ifana, nye mu ninge yo ovayapuki mokukala kweni akushe, osheshi pa shangwa: Kaleni ovayapuki, osheshi Aame omuyapuki.” (1 Petrus 1:14-16) Pashihopaenenwa, ngeenge otwa i moluhaelo, ohatu ka shekifa edina laKalunga. Ndele ngeenge otwa kala nelihumbato la koshoka, ohatu ka fimanekifa Jehova.

Ngeenge umwe womEendombwedi daJehova okwa longo osho shii, ovanhu ovo ve mu shii oshi na oupu ve shi ude. Onghee hano, ngeenge ova mono kutya omunhu oo ke fi vali umwe womEendombwedi daJehova, otava ka mona kutya oshiwana shaJehova ohashi dulika kwaasho Ombibeli tai ti nohashi kaleke eongalo la yela. Pashihopaenenwa, omulumenhu umwe okwa ile kokwoongala mOlupale lOuhamba moSwitzerland, nokwa ti kutya okwa hala okuninga oshilyo sheongalo. Omumwainakadona okwa kondwa omolwelihumbato la nyata, nomulumenhu oo okwa hala okukala mehangano omo “ihamu pitikwa elihumbato lii.”

Okukonda mo omunyoni ohaku kaleke eongalo lopaKriste la koshoka. Omuyapostoli Paulus okwa li a londwela Ovakorinto shi na sha noshiponga shokweefa ovanyoni inave livela ombedi va kale meongalo. Okwa li a faafanifa enwefemo lii lovanyoni va tya ngaho nonhafi oyo hai fulike olumbololo alishe. Paulus okwa ti: “Onhafi nande oinini, otai fulifa olumbololo alishe lomungome.” Opo nee okwe va pa vali omayele oo kutya: “Kondeni mo ou mwii womokati keni.” — 1 Ovakorinto 5:6, 11-13.

 Omunhu ‘oo mwii’ okwa ya moluhaelo ehe na nande ohoni yasha. Vamwe meongalo lavo ova li nokuli va hovela okupopila elihumbato laye lii. (1 Ovakorinto 5:1, 2) Osho osha li sha nyika oshiponga molwaashi Ovakriste vamwe ova li tava dulu okunwefwa mo kelihumbato inali koshoka la tya ngaho olo la li apeshe muKorinto. Sha faafana kunena, ngeenge eongalo ole lipwililikile enyono la kwata moiti, vamwe otashi dulika va hovele okukala va dina omifikamhango daJehova. (Omuudifi 8:11) Ngaashi ashike “emanya li li koshi yomeva” tali dulu okuteya osikepa, omunyoni ine livela ombedi ota dulu okunyona po eitavelo lavamwe meongalo. — Judas 4, 12, NW.

Okukonda omunyoni otashi dulika ku mu kwafele a mone kutya osho a ninga osha puka. Jesus okwa li a longifa efaneko li na sha nomulumenhu omunyasha oo a li a fiya po eumbo laxe nokuhanauna po efyuululo laye mokukala nonghalamwenyo inai koshoka. Omulumenhu oo omunyasha okwa li a mona kutya okukala kokule neumbo laxe inashi mu etela ouwa washa. Onghee hano, okwa li e livela ombedi ndele ta tokola a shune koukwaneumbo wavo. Xe okwa li a hafa neenghono eshi a mona kutya omonamati okwa lundulula oikala yaye, nokwa li e mu tambula ko eshi e uya keumbo. (Lukas 15:11-24) Efaneko olo otali tu kwafele tu ude ko nghee Jehova ha kala e udite ngeenge umwe e livela ombedi. Okwa ti: “Ame ndi he nohokwe mefyo lomuhenakalunga, ndelenee omuhenakalunga e lialuluke mondjila yaye opo a kale nomwenyo.” — Hesekiel 33:11.

Eongalo lopaKriste oli li oukwaneumbo wetu wopamhepo. Ngeenge omunhu okwa kondwa, ke fi vali oshitukulwa shoukwaneumbo oo. Lwanima eshi a hangwa koilanduliko yelihumbato laye lii, otashi dulika a didilike epuko laye nokudimbuluka nghee a li a hafa eshi a li e na ekwatafano liwa naJehova nosho yo neongalo. Osho otashi dulika shi mu ladipike a alukile koukwaneumbo wetu wopamhepo.

Opo tu kwafele omunhu oo a kondwa a alukile kuJehova, otwa pumbwa oku mu ulikila ohole nopehe na oku mu mbebeleka. Pashihopaenenwa, diladila komunhu ta fifina ongongo ndele tai mu pondo. Ngeenge ina kwafelwa diva otashi dulika a fye. Omunhu oo a pondwa kongongo oha dengwa kekofi opo i dje po. Nonande otashi dulika ta yahama eshi ta dengwa, otashi xupifa omwenyo waye. David okwa li a popya ediladilo la yukila oko eshi a ti: “Omuyuki na denge nge, osho ohole.” (Epsalme 141:5) David okwa li a mona kutya nonande outekuduliko owe mu yahameka, otau mu kwafele.

Ngaashi ashike umwe oo a dengwa kekofi, omunhu oha kala a pumbwa okukondwa opo a alukile kuJehova. Omonamati waJulian oo a tumbulwa pehovelo loshitukulwa eshi, okwa li a lundulula onghalamwenyo yaye ndele ta alukile keongalo konima yomido omulongo okudja eshi a li a kondwa. Paife oku li omukulunhuongalo. Okwa ti: “Okukondwa okwa ningifa nge ndi taalele oilanduliko yonghedi yange yokukalamwenyo. Outekuduliko wa tya ngaho oo lela nda li nda pumbwa.” — Ovaheberi 12:7-11.

Ohashi nyemateke neenghono ngeenge umwe a kondwa. Ndele inashi hala okutya ita ka alukila vali kuJehova. Osha fimana opo keshe umwe womufye a efe outekuduliko u longe oilonga yao. Ongahelipi hatu dulu okuninga ngaho?

Ovakulunhuongalo ove na alushe okukendabala okuhopaenena ohole yaJehova, unene tuu ngeenge tava lombwele umwe kutya ke fi vali Ondombwedi yaJehova. Ove na oku mu yelifila sha yela nawa nonolukeno kutya  oshike e na okuninga ngeenge okwa hala okwaalukila kuJehova noku kale vali oshitukulwa sheongalo. Ngeenge omunhu oo a kala a kondwa ota ulike kutya okwa hala okwaalukila keongalo, ovakulunhuongalo otava dulu okukala have mu talela po lwoikando ve mu dimbulukife kutya oshike e na okuninga opo a alukile kuJehova. * — Tala eshangelo lopedu.

Oilyo youkwaneumbo ohai ulike kutya oi hole eongalo nosho yo oo a kondwa mokuyambidida etokolo olo la ningwa kovakulunhuongalo. Julian okwa yelifa a ti: “Natango omona wange, ashike onghedi yaye yokukalamwenyo oya tula po einda pokati ketu.”

Aveshe meongalo ohava ulikile oo a kondwa ohole yashili mokuyambidida outekuduliko oo ta pewa kuJehova okupitila movakulunhuongalo. Osho osha hala okutya, kave na okukala naye ile okupopya naye. (1 Ovakorinto 5:11; 2 Johannes 10, 11) Eongalo oli na yo okuyambidida nokuulikila oukwaneumbo omo mu na oshilyo sha kondwa ohole shi dulife nale. Efimbo la tya ngaho ohali kala lidjuu neenghono koukwaneumbo. Inatu ningifa nande oukwaneumbo omo mu na oshilyo sha kondwa u kale u udite kutya nao kau fi vali oshitukulwa sheongalo. — Ovaroma 12:13, 15.

Julian okwa fika pexulifodiladilo kutya, “okukonda oku li elongekido olo twa pumbwa notali tu kwafele tu kale pamifikamhango daJehova. Nonande okukondwa ohaku nyemateke, lwanima ohaku ka eta oidjemo iwa. Ngeno onde lipwililikile elihumbato lii lomonamati wange, ngeno ina alukila kondjila.”