ESHI Anita a ninga umwe womEendombwedi daJehova, omushamane waye okwa li a handuka neenghono. * (Tala eshangelo lopedu.) Okwa li ha kendabala oku mu kelela aha ye kokwoongala noku mu shilika aha tumbule edina laKalunga nandenande. Shimha ngoo ndele e mu uda ta tumbula edina Jehova, okwa li ha handuka neenghono.

Shimwe vali, omushamane waAnita ka li a hala Anita a honge ounona vavo kombinga yaJehova ile a ye navo kokwoongala. Osho osha li shidjuu kuAnita neenghono molwaashi okwa li e na okukendabala okuhonga ounona vavo meholeko.

Oshimoniwa shaAnita otashi ulike kutya, umwe womoukwaneumbo weni otashi dulika a kendabale oku ku kelela uha longele Jehova. Ile tashi dulika u li monghalo imwe vali idjuu. Otashi dulika wa kala to ehama oule wefimbo lile. Otashi dulika wa filwa okaana ile omushamane ile omukulukadi woye. Ile pamwe oshilyo shomoukwaneumbo weni osho u hole sha fiya po Jehova. Oshike u na okuninga po meenghalo da tya ngaho opo u twikile okukala u na eitavelo muJehova?

Omuyapostoli Paulus okwa ti: “Otamu pumbwa elididimiko.” (Ovaheberi 10:36) Mbela oshike tashi dulu oku ku kwafela u lididimike?

Ngeenge to mono oixuna, dimbuluka kutya owa pumbwa okulineekela muJehova e ku kwafele u lididimike. Pula kuye ekwafo meilikano. Osho osho Ana a ninga eshi omushamane waye a fya ombadilila. Ova kala va hombola oule womido 30. Ana okwa ti: “Nghee a ile koilonga, ina a lukila vali keumbo, nokwa li ashike e na omido 52.”

Ana okwa kala e lipyakidila noilonga yaye, ashike nande ongaho osho inashi kufa po ouyahame waye. Oshike a li a ninga po? Ana okwa ti: “Onda mbubulila Jehova omutima wange nokukala handi mu pula a kwafele nge.” Okwa li a mona kutya Jehova okwe mu kwafela molwaashi konima yokwiilikana oha kala e udite ombili nokwa pepelelwa. Okwa ti vali: “Ondi na oushili kutya Jehova ota ka nyumuna omushamane wange.” — Ovafilippi 4:6, 7.

Jehova okwa udanekela ovapiya vaye kutya ota ka uda omailikano avo. (Epsalme 65:3) Ote ke va pa keshe osho va pumbwa  opo va twikile oku mu longela. Jehova ote ke ku kwafela u kale omudiinini kuye nokuli nomeenghalo didjuu.

Ope na vali onghedi imwe omo Jehova he tu kwafele tu lididimike. Okwe tu pa ovamwatate novamwameme meongalo. Ohatu dulu okulihonga konghedi omo ovamwatate vomuTessalonika va li va kwafelafana eshi va li tava hepekwa nonyanya. Pefimbo opo ova li va pumbwa okutwaafana omukumo shi dulife nale. (1 Ovatessaloniki 2:14; 5:11) Ova kwafela ovamwaxe va kale ovadiinini kuJehova mokukala hava ongala pamwe nokupanga oukaume wopofingo. Oshike tu na okuninga opo tu kale ovadiinini ngaashi Ovatessalonika?

Otwa pumbwa okupanga oukaume wopofingo meongalo nokutwaafana omukumo unene tu pomafimbo madjuu. (Ovaroma 14:19) Omuyapostoli Paulus okwa mona oixuna omolwomahepeko nomaupyakadi amwe, ndele Jehova okwe mu pa eenghono a dule okulididimika. Pashihopaenenwa, Jehova okwa li e linyengifa ovamwatate novamwameme va twe Paulus omukumo. Paulus okwa popya shi na sha nookaume kaye a ti: ‘Ova hekeleka nge,’ sha hala okutya ova li odjo yehekeleko linene kuye. (Ovakolossi 4:10, 11) Ovamwatate ovo ova li ve hole Paulus. Onghee hano, ngeenge a pumbwa ekwafo, ova li have mu hekeleke noku mu twa omukumo. Otashi dulika naave u diladile efimbo olo ovamwatate novamwameme vomeongalo leni va  popya ile va ninga sha osho she kutwa omukumo.

Jehova okwe ku pa yo ovakulunhuongalo meongalo. Ovamwatate ovo otava dulu oku ku twa omukumo noku ku pa omayele mawa opaMbibeli. Ove li “ngaashi oshikelelifo shokukelela omhepo nongaashi ehondameno lokuyaama oshikungulu ngaashi omakungulukilo omeva medu loluteni nomudidimbe wemanya lile medu lenotelo.” (Jesaja 32:2) Otashi tu hekeleke okukala tu shii kutya ovamwatate ovo ove lilongekida oku tu kwafela. Onghee hano, ngeenge owa hangwa komafimbo madjuu, inda kovakulunhuongalo. Otave ke ku kwafela u twikile okulongela Jehova.

Oshoshili kutya ovakulunhuongalo itava dulu okukandula po omaupyakadi oye aeshe. Navo inava wanenena ngaashi ashike ove. (Oilonga 14:15) Ashike oto ka kala u udite wa pepelelwa ngeenge owa i komukulunhuongalo, ndele ta ilikana kuJehova pamwe naave shi na sha noupyakadi woye. (Jakob 5:14, 15) Pashihopaenenwa, ovakulunhuongalo ova li va twa omukumo omumwatate wokuItaly oo a kala ta mono oixuna omolwounghundi wa kwata moiti oo a kala nao oule womido dihapu. Okwa popya shi na sha nonghalo oyo a ti: “Ohole yovamwatate nokukala hava talele nge po oya kwafela nge ndi lididimike.” Ngeenge oto mono oixuna, Jehova okwa hala u pule ekwafo kovakulunhuongalo ve ku kwafele.

Ngeenge otwa kala twe lipyakidila nokulongela Jehova, ohatu ka mona nghee te tu kwafele. Osho osho John a li a ninga. Okwa li a monika okankela eshi a li e na omido 39. Okwa li e udite kutya kashi li pauyuki a kale ta vele, unene tuu eshi a li natango omunyasha. Okwa li yo te lipula shi na sha nomukulukadi waye nomonamati wavo oo a li ashike e na omido nhatu. Okwa ti: “Omukulukadi wange ka li ashike ta file oshisho okaana ketu, ndele naame yo. Okwa li e na okukala ha shuna nge kundokotola.” Omolwouhaku oo a li ha pewa, John okwa li ha kala a loloka neenghono nokwa li a kwatwa koudu womedimo. Ndele osho hasho ashike. John okwa ka uda kutya xe ota vele sha kwata moiti nokwa li a pumbwa umwe e mu file oshisho.

Oshike sha kwafela John noukwaneumbo waye pefimbo olo lidjuu? Nonande luhapu John okwa li ha kala a loloka, okwa li ha shilipaleke kutya oukwaneumbo waye otau yandje elitulemo kokulongela Jehova. Okwa ti: “Ohatu kala pokwoongala keshe, hatu i moukalele oshivike keshe, nohatu ningi elongelokalunga loukwaneumbo pandjikilile nokuli nopomafimbo madjuu.” John okwe lihonga nghee sha fimana okukaleka ekwatafano laye naJehova la kola. Nonande pehovelo osha li she mu halukifa nokukala te lipula, okwa ka ngungila diva. Okwa li e shii kutya Jehova oku mu hole nokwe mu pa eenghono odo a li a pumbwa. Jehova ota dulu oku ku kwafela monghedi ya faafana ngeenge owa limbililwa ile wa tila. John okwa ti: “Jehova ota dulu oku ku pameka ngaashi ashike a pameka nge.”

Ngeenge to mono oixuna, dimbuluka eendjovo daPaulus odo tadi ti: “Otamu pumbwa elididimiko.” Lineekela Jehova mokukala to ilikana kuye. Kala u na ekwatafano novamwaxo meongalo, pula ekwafo kovakulunhuongalo nokukala to yandje elitulemo kokulongela Jehova. Jehova ote ku kwafele moupyakadi keshe oo tashi dulika u na paife ile tau ke ku hanga monakwiiwa.