1, 2. (a) Omolwashike wa tomhwa kutya Jehova oku hole oshiwana shaye? (b) Ovanhu ova shitwa ve na omhumbwe ilipi?

OMOLWASHIKE twa tomhwa kutya Jehova oku hole oshiwana shaye? Fimbo inatu nyamukula epulo olo, natu ka konakoneni oihopaenenwa ei: Oule womido, ovamwatate novamwameme ova kala tava tu omukumo omumwameme Taylene. Ova li ve mu lombwela aha kale he lidipaele po mukeshe shimwe. Omumwameme oo okwa ti: “Ngeno Jehova ka li e hole nge, ngeno iha pe nge omayele monghedi tai twikile.” Brigitte, oo a tekula ovana vavali oye aeke molwaashi omushamane waye okwa fya, okwa ti: “Okutekula ounona monghalelo yaSatana olo eshongo lidjuu neenghono, unene tuu ngeenge oove auke. Ashike onda tomhwa kutya Jehova oku hole nge molwaashi okwa wilika nge pomafimbo opo nda li nda nyika oluhodi nondi na omutima wa teyauka, noina efa ndi ye meyeleko olo itandi dulu okulididimikila.” (1 Ovakorinto 10:13) Omumwameme umwe vali wedina Sandra oku na omukifi wa kwata moiti oo uhe na epango, noposhoongalele shimwe omumwameme umwe okwa li a ulika kutya oku na  ko nasha naye. Omushamane waSandra okwa ti: “Nonande omumwameme oo katu mu shii nawa lela, okunakonasha kwaye okwe tu etela ehafo linene. Nokuli nohole ashike inini oyo handi ulikilwa kovamwatate novamwameme, oya kwafela nge ndi mone kutya Jehova oku hole nge neenghono.”

² Jehova okwa shita ovanhu nomhumbwe yokuhola noyokukala ve holike. Ashike omunhu oto dulu okuteka omukumo noupu ngeenge oto vele, u na oupyakadi wopamaxupilo ile molwaashi iho mono oidjemo iwa moukalele. Ngeenge otwa hovele okukala tu udite kutya Jehova ke tu hole vali, otu na okudimbuluka kutya otu na ondilo kuye nonokutya oku li pamwe nafye, e tu kwete meke lokolulyo note tu kwafele. Ke na efiku e ke tu dimbwe ngeenge otu li ovadiinini kuye. — Jesaja 41:13; 49:15.

3. Oshike tashi dulu oku tu kwafela tu kale twa tomhwa filufilu kutya Jehova oku tu hole nohole i na oudiinini?

³ Eendombwedi odo da tumbulwa metetekelo oda tomhwa kutya Kalunga okwa li pamwe nado pomafimbo madjuu. Nafye ohatu dulu okukala tu na elineekelo kutya Jehova ote tu yambidida. (Eps. 118:6, 7) Moshitukulwa eshi, ohatu ka kundafana eeshali dopane odo tadi ulike kutya Jehova oku tu hole. Eeshali odo ongaashi (1) eshito laye, (2) Ombibeli, (3) eilikano nosho yo (4) ekulilo. Okudilonga koinima iwa oyo Jehova e tu ningila otaku tu kwafele tu kale tu na olupandu linene lohole yaye i na oudiinini. — Lesha Epsalme 77:12, 13.

4. Oshike hatu lihongo meshito laJehova?

⁴ Ohatu lihongo kutya Jehova oku tu hole neenghono mokutala keshito laye. (Ovaroma 1:20) Pashihopaenenwa, Jehova ina shita ashike edu tu kale ko tu na omwenyo, ndele okwe tu pa keshe osho twa pumbwa opo tu hafele okukalamwenyo. Molwaashi otwa pumbwa okulya, Jehova okwe tu pa oikulya yomaludi opo tu i hafele. (Omuudifi 9:7) Omumwameme wedina Catherine oha hafele okutala eshito, unene tuu pefimbo lokulombo moCanada. Okwa ti: “Oshikumwifi okutala koinima aishe ina omwenyo, ngaashi eengala odo hadi twiyuka medu nosho yo oudila ovo hava aluka okudja oko va li va tembukila, mwa kwatelwa oudila vanini voohaulyanhemo ovo have uya pekende lokombifa yange opo handi tula oikulya youdila. Eshi Jehova e tu pa oinima iwa i fike opo, otashi ulike kutya oku tu hole.” Tate yetu oku hole eshito laye, nokwa hala yo nafye tu li hafele. — Oilonga 14:16, 17.

5. Ongahelipi onghedi omo ovanhu va shitwa ya ulika ohole yaJehova?

⁵ Jehova okwe tu shita noukwatya wokudula okulonga oilonga tai ti sha noku i hafela. (Omuudifi 2:24) Okwa pa ovanhu oshinakuwanifwa shokuyadeka edu, oku li longa, okufila oshisho eeshi, oudila noinima ikwao i na omwenyo oyo i li kombada yedu. (Genesis 1:26-28) Okwe tu shita yo nomaukwatya mawa opo tu dule oku mu hopaenena. — Ovaefeso 5:1.

6. Omolwashike tu na okudilonga kEendjovo daKalunga?

⁶ Jehova okwe tu pa Ombibeli omolwohole yaye inene yoku tu hola. Otai tu lombwele osho tu na okushiiva kombinga yaye nonghee e uditile ovanhu. Pashihopaenenwa, Ombibeli oye tu lombwela nghee Jehova a li e uditile Ovaisrael, ovo luhapu va li ihava dulika kuye. Epsalme 78:38, ola ti: “Okwa kala omunalukeno, nowii wavo e u kufa po, nokwa polifa luhapu ehandu laye melididimiko, Ye ina pendula onya yaye aishe.” Okudilonga kovelishe oyo otaku tu kwafele tu mone kutya Jehova oku tu hole nohe tu file oshisho lela. Ohatu dulu okukala nelineekelo kutya Jehova oku na ko nasha nafye filufilu. — Lesha 1 Petrus 5:6, 7.

7. Omolwashike Ombibeli i na okukala ya denga mbada kufye?

 ⁷ Omolwashike Ombibeli i na okukala ya denga mbada kufye? Omolwaashi Jehova oha popi nafye okupitila mEendjovo daye. Ngeenge omudali nomona ohava popi va mangulukilafana, ohashi pameke ohole yavo nohava kala ve lineekelafana. Jehova oTate yetu omunahole. Ndele nonande inatu mu mona nale ile inatu uda ondaka yaye, oha popi nafye okupitila mOmbibeli. Otu na okutwikila okupwilikina kuye. (Jesaja 30:20, 21) Ngeenge ohatu lesha Eendjovo daKalunga, ohatu ka shiiva nokukala twe lineekela Jehova oo he tu wilike noku tu amena. — Lesha Epsalme 19:8-12; Omayeletumbulo 1:33.

8, 9. Jehova okwa hala tu shiive shike? Yandja oshihopaenenwa shopaMbibeli.

⁸ Jehova okwa hala tu shiive kutya oku tu hole, noha yandje elitulemo komaukwatya etu mawa ponhele yokuyandja ashike elitulemo kokuhawanenena kwetu. (2 Omafimbo 16:9) Natu ka taleni nghee Jehova a li a tala komaukwatya mawa ohamba Josafat yaJuda. Josafat okwa li a ninga etokolo lihe li pandunge eshi a li a ya pamwe nohamba Ahab yaIsrael noku ka lwifa Ovaasiria kuRamot shomuGilead. Nonande ovaprofeti ovanaipupulu 400 ova li va lombwela ohamba ikolokoshi Ahab kutya otai ka findana moita, omuprofeti washili waJehova Mika okwa li a lombwela Ahab naJosafat kutya ngeenge ova ka lwa otava ka findwa. Naasho osho naanaa sha li sha ningwa. Ahab okwa fila moita oyo, na Josafat okonyala a fye. Konima yoita, Jehova okwa li a longifa Jehu a pe Josafat omayele omolwepuko laye. Kakele kaasho, Jehu okwa li e mu lombwela a ti: “Muove mwa monika oinima iwa.” — 2 Omafimbo 18:4, 5, 18-22, 33, 34; 19:1-3.

⁹ Omido donhumba fimbo osho sha li inashi ningwa, Josafat okwa li a lombwela omalenga, Ovalevi nosho yo ovapristeri va ye koilando aishe yaJuda va ka honge ovanhu Omhango yaJehova. Ova li va pondola lela, naasho osha ningifa nokuli novanhu vomoiwana imwe va shiive kombinga yaJehova. (2 Omafimbo 17:3-10) Onghee hano, nokuli nonande lwanima Josafat okwa ka ninga etokolo lihe li pandunge, Jehova ka li a dimbwa oilonga iwa oyo a li a longa metetekelo mokukalamwenyo kwaye. Oshihopaenenwa osho otashi tu tu omukumo neenghono molwaashi ohatu ningi omapuko omafimbo amwe. Ndele ngeenge otwa ningi ngaashi hatu dulu tu longele Jehova, ota ka twikila okukala e tu hole noita ka dimbwa oilonga iwa oyo twa longa.

10, 11. (a) Omolwashike eilikano li li oshali ye likalekelwa ya dja kuJehova? (b) Ongahelipi Kalunga ha dulu okunyamukula omailikano etu? (Tala efano pehovelo loshitukulwa.)

¹⁰ Xe omunahole oha longifa efimbo a pwilikine kovana vaye ngeenge va hala okupopya naye. Okwa hala okushiiva kutya ohava kala ve udite ngahelipi molwaashi oku na ko nasha navo. Tate yetu omunahole Jehova naye oha ningi sha faafana. Oha pwilikine kufye ngeenge hatu ilikana. Onghee hano, oshi li oufembanghenda lela okupopya naye.

¹¹ Ohatu dulu okwiilikana kuJehova efimbo keshe. Jehova okaume ketu nokwe lilongekida alushe okupwilikina komailikano etu. Taylene, oo a tumbulwa metetekelo okwa ti: “Oto dulu okulombwela [Jehova] keshe osho wa hala.” Ngeenge otwa lombwele Jehova omaliudo etu omoule, otashi dulika e tu nyamukule okupitila momushangwa, moshitukulwa  shonhumba moileshomwa yetu ile tu tuwe omukumo komumwatate ile komumwameme. Jehova oha udu omaindilo etu taa di komutima noku udite ko eenghalo detu e dule keshe umwe. Onghee hano, okupwilikina komailikano etu otaku ulike kutya oku tu hole nohole i na oudiinini.

12. Omolwashike tu na okukonakona omailikano oo e li mOmbibeli? Yandja oshihopaenenwa.

¹² Ohatu dulu okulihonga oilihongomwa ya fimana momailikano oo taa hangwa mOmbibeli. Omafimbo amwe oshiwa okukonakona amwe omomailikano oo pefimbo lelongelokalunga loukwaneumbo. Ngeenge otwa dilonga komailikano a dja komutima ovapiya vaKalunga vomefimbo la pita, otashi ka xwepopaleka ongushu yomailikano etu. Pashihopaenenwa, konakona eilikano laJona lelininipiko olo a li a ilikana eshi a li medimo loshi inene. (Jona 1:17–2:10) Konakona yo eilikano laSalomo la dja komutima olo a li a ilikana kuJehova peyapulo lotembeli. (1 Eehamba 8:22-53) Dilonga yo koshihopaenenwa shaJesus sheilikano. (Mateus 6:9-13) Osho sha fimanenena, ‘oufyoona woye u shiivifila Kalunga’ efimbo keshe. Oshidjemo, ‘ombili yaKalunga ei i dule eendunge adishe, otai ka amena omutima woye nomadiladilo oye.’ Olupandu letu li na sha nohole yaJehova i na oudiinini otali ka kala lomoule. — Ovafilippi 4:6, 7.

13. Omhito ilipi tu na omolwekulilo?

¹³ Jehova okwe tu pa oshali yekulilo opo tu dule ‘okukala nomwenyo.’ (1 John 4:9) Omuyapostoli Paulus okwa li ta popi kombinga yeuliko lohole yaKalunga monghedi ya denga mbada ya tya ngaho, eshi a ti: “Kristus okwa fila ovahenakalunga pefimbo la wapala. Walyee nee, ngenge taku monika ou te liyandje mokufya omolwomuyuki; heeno kashiimba ku na tuu ou e nouladi a file ou muwa. Ndelenee Kalunga okwe tu hololela ohole yaye oku tu hola, Kristus eshi e tu fila fimbo twa li natango ovalunde.” (Romans 5:6-8) Ekulilo oli li oshihopaenenwa sha denga mbada sheuliko lohole yaKalunga, nola pa ovanhu omhito va kale ve na ekwatafano lopofingo naye.

14, 15. Ekulilo otali ti shike (a) kOvakriste ovavaekwa? (b) kwaavo ve na eteelelo lokukala nomwenyo kombada yedu?

¹⁴ Ongudu inini yOvakriste oya ulikilwa ohole i na oudiinini kuJehova monghedi ye likalekelwa. (Johannes 1:12, 13; 3:5-7) Kalunga okwe va vaeka nomhepo iyapuki, naasho oshe va ningifa va ninge ovana vaye. (Ovaroma 8:15, 16) Ndele ngeenge vamwe natango ove li kombada yedu, omolwashike Paulus a ti kutya ova kala omutumba ‘pamwe naKristus Jesus meulu’? (Ovaefeso 2:6) Omolwaashi Jehova okwe va pa eteelelo loku ka kala nomwenyo fiyo alushe meulu. — Ovaefeso 1:13, 14; Ovakolossi 1:5.

¹⁵ Aveshe ovo vehe fi ovavaekwa otava dulu okuninga ookaume kaKalunga ngeenge ova kala ve na eitavelo mekulilo. Navo ove na omhito yokuninga ovana vaKalunga noyoku ka kala nomwenyo fiyo alushe moparadisa kombada yedu. Ekulilo oli li euliko lohole  yaJehova yokuhola ovanhu aveshe. (Johannes 3:16) Inatu hafa tuu eshi tu shii kutya ngeenge otwa longele Kalunga noudiinini, ote ke tu pa onghalamwenyo ya denga mbada mounyuni mupe! Onghee hano, natu ulikeni kutya otwa lenga ekulilo, olo li li euliko linenenene lohole yaKalunga yoku tu hola i na oudiinini.

16. Ohatu ka ninga po shike konima eshi twa dilonga kohole yaJehova?

¹⁶ Jehova okwe tu ulikila ohole meenghedi dihapu odo itadi dulu okuvalwa. Ohamba David oya imba ya ti: “Kuame, oidiladilwa yoye, Kalunga, oinyenga, shi fike peni! Oitulwakumwe yayo aishe, oihapu unenenene! Ngeno ondi hetekele oku i vala: omuvalo wayo, ou dule [womawe] ehekedu.” (Epsalme 139:17, 18) Okudilonga keenghedi dihapu omo Jehova e tu ulikila ohole, otaku ke tu linyengifa nafye tu kale tu mu hole noku mu pa osho sha denga mbada.

17, 18. Omeenghedi dimwe dilipi hatu dulu okuulika kutya otu hole Kalunga?

¹⁷ Ope na eenghedi dihapu omo hatu dulu okuulikila Jehova kutya otu mu hole. Pashihopaenenwa, ohatu dulu okuulika kutya otu hole Jehova mokulombwela vamwe nouladi kombinga yonghundana iwa yOuhamba. (Mateus 24:14; 28:19, 20) Ohatu dulu yo okuulika kutya otu hole Jehova mokulididimikila noudiinini omayeleko eitavelo letu. (Lesha Epsalme 84:11; Jakob 1:2-5.) Nokuli nonande omayeleko etu okwa kwata moiti, ohatu dulu okukala nelineekelo kutya Jehova oku wete okumona oixuna kwetu note ke tu kwafela molwaashi otu na ondilo kuye. — Epsalme 56:9.

¹⁸ Ohole yetu yokuhola Jehova ohai tu linyengifa tu dilonge koinima aishe oyo a shita. Ohatu ulike yo kutya otu hole Jehova nEendjovo daye mokukonakona nawa Ombibeli. Ohatu ilikana kuJehova pandjikilile molwaashi otu mu hole notwa hala okupameka ekwatafano letu naye. Nongeenge hatu dilonga koshali yekulilo i na ondilo oyo e tu pa, ohole yetu yoku mu hola otai ka kala yomoule. (1 Johannes 2:1, 2) Odo odimwe ashike domeenghedi dihapu omo hatu dulu okuulika kutya otwa lenga ohole yaJehova i na oudiinini.