1. Omuyapostoli Johannes okwe tu ladipika tu diladile kombinga yashike, nomolwashike?

OMUYAPOSTOLI Johannes okwe tu ladipika tu diladile moule kombinga yohole yaJehova inene yoku tu hola. Okwa popya mu 1 Johannes 3:1 a ti: ‘Taleni ohole i fike opo Tate e tu pa.’ Ngeenge otwa dilonga kounene wohole yaJehova yoku tu hola nokunghee ha ulike kutya oku tu hole, ohatu ka ehena popepi elela naye nohatu ka kala tu mu hole nokuli shi dulife nale.

2. Omolwashike shidjuu kuvamwe okuuda ko kutya Kalunga oku va hole?

² Shinyikifa oluhodi, vamwe kave udite ko kutya ongahelipi Kalunga ta dulu okukala e va hole. Otava diladila kutya Kalunga ke na ko nasha novanhu. Otashi dulika va itavela kutya Kalunga oku lile po ashike okutula po eemhango nokuhandukila ovo itava dulika kuye. Omolwomahongo oipupulu, vamwe otava diladila nokuli kutya Kalunga omukwanyanya nonokutya itatu dulu okukala tu mu hole. Vamwe ove udite kutya Kalunga oku hole ovanhu aveshe kashi na nee mbudi kutya ohava longo oilonga ya tya  ngahelipi. Ndele ove eshi wa konakona Ombibeli oye ku kwafela u shiive oshili kombinga yaJehova. Ou shii kutya ohole oyo oukwatya waJehova wa tongomana nosho yo kutya okwa yandja Omona waye e ku kulile. (Johannes 3:16; 1 Johannes 4:8) Ndele omolweenghalo odo wa pita mudo, otashi dulika shi kale shidjuu kwoove okuuda ko kutya Jehova oku ku hole neenghono.

3. Oshike tashi ke tu kwafela tu ude ko kutya Jehova oku tu hole?

³ Opo tu ude ko kutya Jehova oku tu hole, tete otwa pumbwa okuuda ko kutya Jehova oye e tu shita, nokwe tu pa omwenyo. (Lesha Epsalme 100:3-5.) Nomolwaasho Ombibeli ya ti kutya omunhu wotete omona ‘waKalunga.’ (Lukas 3:38) NaJesus okwe tu honga tu ifane Jehova ‘Tate yetu womeulu.’ (Mateus 6:9) Onghee hano, Jehova oTate yetu, noku tu hole ngaashi naanaa xe omudali e hole ovana vaye.

4. (a) Jehova oku li Xe omudali a tya ngahelipi? (b) Oshike hatu ka kundafana moshitukulwa eshi naashi tashi landula?

⁴ Oshidjuu kovanhu vamwe okuuda ko outumbulilo xe omunahole molwaashi otashi dulika tava dimbuluka nenyeme nghee va ungaungiwa navo nonyanya kooxe okudja kounona wavo. Ashike Jehova ke na efiku a ungaunge nai novana vaye molwaashi oku li Tate yetu a denga mbada kuhe na vali. (Epsalme 27:10) Oku tu hole neenghono nohe tu file oshisho meenghedi dihapu. Ngeenge otwa kala tu udite kutya Jehova oku tu hole, ohatu ka kala tu mu hole neenghono. (Jakob 4:8) Moshitukulwa eshi, ohatu ka kundafana eenghedi 4 omo Jehova ha ulike kutya oku tu hole. Nomoshitukulwa tashi landula, ohatu ka kundafana eenghedi 4 omo hatu dulu okuulika kutya otu hole Jehova.

5. Kalunga okwa pa shike ovanhu aveshe?

⁵ Eshi omuyapostoli Paulus a li muAtena shomuGreka, okwa li a didilika kutya omu na oikalunga ihapu nosho yo kutya ovanhu ova li va itavela kutya oikalunga yavo oyo ye va pa omwenyo. Onghee hano, okwa li e va lombwela kombinga ‘yaKalunga oo a shita ounyuni noinima aishe i li mo.’ Okwa ti kutya Kalunga okwa ‘pa ovanhu aveshe omwenyo nomufudo noinima aishe osheshi muye tu li mo tu nomwenyo ndele hatu linyengaanyenga ndele hatu kala mo.’ (Oilonga 17:24, 25, 28) Jehova okwe tu pa oinima aishe oyo twa pumbwa opo tu kale nomwenyo notu hafele onghalamwenyo. Diladila koinima imwe oyo e tu pa molwaashi oku tu hole.

6. Jehova okwe tu pa eduumbo la tya ngahelipi? (Tala efano pehovelo loshitukulwa.)

⁶ Pashihopaenenwa, Jehova okwe tu longekidila eduumbo liwa. (Epsalme 115:15, 16) Meepulaneta adishe odo a shita, edu olo ashike tali monika la yooloka ko kudikwao adishe. Ovanongononi ova endaenda newangadjo nova mona mo eepulaneta dihapu, ashike fiyo opapa inava mona mo opulaneta imwe vali oko ku na oinima oyo ya pumbiwa komunhu opo a kale nomwenyo. Jehova ine tu pa ashike oinima oyo twa pumbwa opo tu kale nomwenyo, ndele okwa feweka yo edu nokwe li shita li li onhele ya amenwa opo tu dule okuhafela onghalamwenyo. (Jesaja 45:18) Ngeenge otwa diladila keduumbo olo Tate yetu Jehova e tu pa, ohatu ka mona kutya oku tu hole neenghono. — Lesha Job 38:4, 7; Epsalme 8:4-6.

7. Ongahelipi onghedi omo Jehova e tu shita tai ulike kutya oku tu hole?

⁷ Onghedi imwe vali omo Jehova a ulika kutya oku tu hole omoku tu shita noukwatya wokudula  oku mu hopaenena. (Genesis 1:27) Osho osha hala kutya ohatu ka kala tu udite kutya oku tu hole, nafye ohatu ka ulika kutya otu mu hole. Oku shii kutya osho osho tashi tu etele ehafo. Kakele kaasho, ounona ohava kala va hafa neenghono ngeenge ove wete kutya ovadali vavo ove va hole. Dimbuluka yo kutya Jesus okwe tu honga kutya ohatu ka kala twa hafa ngeenge otu na ekwatafano liwa naTate yetu Jehova. (Mateus 5:3) Okwe tu pa “pauyadi aishe yoku tu hafifa.” Osha yela kutya Jehova oha yandje noku tu hole neenghono. — 1 Timoteus 6:17; Epsalme 145:16.

8. Omolwashike twa hala Jehova e tu honge?

⁸ Ooxe ove hole ovana vavo noihava kala va hala va pukifwe. Ashike ovadali vahapu kunena inava hala okulongifa omifikamhango dOmbibeli di na sha naasho sha puka naasho shi li mondjila. Onghee hano, itava dulu okuwilika ovana vavo, naasho ohashi etifa okuhenehafo nosho yo elyalyakano. (Omayeletumbulo 14:12)  Ashike Jehova oha pe ovana vaye ewiliko la denga mbada molwaashi oye ‘Kalunga omudiinini,’ ile tu tye Kalunga koshili. (Epsalme 31:6) Okwa halelela oku tu honga oshili kombinga yaye. Ohe tu hongo yo nghee tu na oku mu longela nonghee tu na okukala nonghedi yokukalamwenyo ya denga mbada. (Lesha Epsalme 43:3.) Onghee hano, oshike osho Jehova e tu honga osho tashi ulike kutya oku tu hole neenghono?

9, 10. (a) Omolwashike Jehova e tu lombwela kombinga yaye? (b) Okwe tu honga shike kombinga yelalakano laye li na sha nafye?

⁹ Shotete, Jehova okwe tu lombwela kombinga yaye mwene molwaashi okwa hala tu mu shiive. (Jakob 4:8) Onghee hano, okwe tu lombwela edina laye. Shikwao vali, edina laKalunga mOmbibeli ola tumbulwa mo lwoikando ihapu li dule edina keshe. Jehova okwe tu lombwela yo kutya ye Omunhu a tya ngahelipi. Ngeenge otwa tale koinima oyo a shita, otai tu hongo kutya omunaenghono nomunaendunge. (Ovaroma 1:20) Nongeenge hatu lesha Ombibeli, ohatu lihongo mo kutya omuyuki nonokutya oku tu hole. Ngeenge otwa shiiva omaukwatya aJehova mawa, ohatu ka ehena popepi elela naye.

¹⁰ Jehova okwe tu honga yo kombinga yelalakano laye. Okwe tu lombwela kutya otu li oshitukulwa shoukwaneumbo waye. Okwe tu yelifila yo osho a teelela tu ninge opo tu longe moukumwe nonombili novanhu aveshe ovo ve li moukwaneumbo waye. Ombibeli oye tu lombwela sha yela kutya Kalunga eshi e tu shita ine tu pa oufemba wokutokola kufye vene pokati kaasho shi li mondjila naasho sha puka. (Jeremia 10:23) Jehova oku shii osho sha denga mbada kufye. Nohatu ka kala ashike tu na ombili notwa wanenwa monghalamwenyo ngeenge otwa tambula ko eenghonopangelo daye nokudulika kuye. Jehova okwe tu honga oshili oyo ya fimana molwaashi oku tu hole.

11. Tate yetu omunahole okwe tu lombwela shike shi na sha nonakwiiwa?

¹¹ Xe omunahole oha diladila a mana mo kombinga yonakwiiwa yovana vaye. Okwa hala va kale ve na onghalamwenyo tai ti sha. Shinyikifa oluhodi, ovanhu vahapu kunena ove li momalimbililo omolwonakwiiwa, navahapu otave lihepeke mokulonga opo ve limonene oinima oyo itai kalelele. (Epsalme 90:10) Inatu pandula tuu eshi Tate yetu Jehova ine tu honga ashike nghee tu na okukala nonghalamwenyo tai ti sha paife, ndele okwe tu udanekela yo onakwiiwa iwa!

12. Ongahelipi Jehova a li a kendabala okukwafela Kain naBaruk?

¹² Eshi Jehova a li a mona kutya Kain okwa li moshiponga eshi a li ta ningi oshinima shonhumba osho sha puka neenghono, Jehova okwa li a kendabala okukwafela Kain moku mu pula ta ti: ‘Omolwashike wa handuka, nomolwashike wa fidimika oshipala shoye? Ngeenge to longo ouwa to shiiva okuyelula omutwe woye.’ (Genesis 4:6, 7) Kain ka li a tambula ko ekwafo laJehova, nokwa li a mona  oilanduliko yeenghatu daye. (Genesis 4:11-13) Pomhito vali imwe, Jehova okwa li a didilika kutya Baruk oku na oikala ya puka oyo ya li ye mu lolokifa noku mu teya omukumo. Onghee hano, Jehova okwa li a lombwela Baruk kutya oku na omadiladilo a puka nokwa pumbwa okuninga omalunduluko. Baruk okwa li a pwilikina komayele aJehova, nokwa li a xupifa omwenyo waye. — Jeremia 45:2-5.

13. Ovapiya vaJehova ovadiinini ove lihonga shike momayeleko?

¹³ Jehova ohe tu wilike noku tu pa outekuduliko molwaashi oku tu hole. Ihe tu pukulula ashike ngeenge sha pumbiwa, ndele ohe tu deula yo. (Ovaheberi 12:6) MOmbibeli omwa popiwa ovapiya vaJehova ovadiinini ovo Jehova a deula opo va kale ovanhu ve li xwepo. Pashihopaenenwa, Josef, Moses, naDavid ova li meenghalo didjuu neenghono, ndele pomafimbo a tya ngaho, Jehova okwa li pamwe navo. Noinima oyo ve lihonga eshi va li momayeleko oo oye ke va kwafela eshi Jehova a li e va pa oinakuwanifwa ya kwata moiti. Eshi hatu lesha mOmbibeli nghee Jehova a yambidida nokudeula oshiwana shaye, otashi tu ulikile kutya Jehova oku tu hole lela. — Lesha Omayeletumbulo 3:11, 12.

14. Ngeenge twa ningi sha sha puka, Jehova oha ulike ngahelipi kutya oku tu hole?

¹⁴ Nokuli nonande otu ninge sha sha puka, Jehova oha twikile oku tu ulikila ohole. Ngeenge otwa tambula ko outekuduliko waye nokulivela ombedi, ote ke tu dimina po ‘omatimba mahapu.’ (Jesaja 55:7) Osho osha hala okutya shike? Eendjovo daDavid di na sha nediminepo laJehova otadi tu ulikile kutya Jehova oku li Tate omunefilonghenda, eshi a ti: ‘Oye tuu ou ta dimi po owii aushe, ndee te ku velula komaudu oye aeshe; Oye tuu ta xupifa oukalimwenyo woye melambo, ndee te ku dike oshikoroni shouwanghenda nefilonghenda. Ngaashi oushilo nouninginino u lili kokule, osho Ye ha ehenifa omanyono etu kokule nafye.’ (Epsalme 103:3, 4, 12) Jehova ohe tu pe outekuduliko newiliko meenghedi da yoolokafana. Mbela oho ningi ngoo omalunduluko diva? Dimbuluka alushe kutya Jehova ohe tu pe outekuduliko molwaashi oku tu hole. — Epsalme 30:6.

15. Omonghedi vali imwe ilipi Jehova ha ulike kutya oku tu hole?

¹⁵ Xe omunahole oha amene oukwaneumbo waye koiponga. Osho osho Tate yetu Jehova ha ningi. Omupsalme okwa popya kombinga yaJehova a ti: “Eemwenyo dovakoshoki vaye, ote di amene, ote di xupifa momake ovadinikalunga.” (Epsalme 97:10) Diladila kwaashi: Ngaashi ashike ho endelele u amene omesho oye molwaashi okwa fimana kwoove, Jehova naye oha endelele okwaamena oshiwana shaye molwaashi osha fimana kuye. — Lesha Sakaria 2:8.

16, 17. Jehova okwa kala nokwaamena ngahelipi oshiwana shaye mefimbo la pita nosho yo pefimbo letu?

¹⁶ Onghedi imwe omo Jehova a kala nokwaamena oshiwana shaye mefimbo la pita nosho yo kunena, okupitila movaengeli vaye. (Epsalme 91:11) Omweengeli umwe okwa li a dipaa ovakwaita vaAssiria 185 000 moufiku  umwe, nokuxupifa oshiwana shaKalunga. (2 Eehamba 19:35) Mefelemudo lotete, ovaengeli ova li va mangulula modolongo Petrus, navakwao. (Oilonga 5:18-20; 12:6-11) Efimbo opo la di ko, moshilongo shimwe shomuAfrika omwa li oita inyanyalifi. Pefimbo opo moshilongo osho omwa li omapiyaano omolwoita, eembudi tadi vake, omakwatonghonga nomadipao. Nonande inamu fila ovamwatate, vahapu ova kanifa oiniwe yavo aishe. Ashike aveshe ova li ve udite kutya Jehova oku va hole nokwe va fila oshisho. Nonande ova mona oixuna meenghedi di lili noku lili, kava li va kanifa ehafo. Eshi omumwatate oo a li a tumwa okudja keembelewa detu da kula e va talela po nokupula ovamwatate novamwameme kutya onghalo oi li ngahelipi, ova li va nyamukula kutya, “Aishe oi li nawa nohatu pandula Jehova.”

¹⁷ Haalushe Jehova ha kelele ovapiya vaye vaha ningilwe owii, nomolwaasho omuhongwa Stefanus navakwao va li va dipawa omolwoudiinini wavo. Ashike Jehova oha amene oshiwana shaye shi li ongudu moku shi londwela kombinga yeenghedi di lili noku lili omo Satana ha kendabala oku shi hongaula. (Ovaefeso 6:10-12) Omalondwelo oo ohatu a hange mOmbibeli nomoishangomwa oyo ya nyanyangidwa kehangano laJehova. Pashihopaenenwa, ohatu lihongo kombinga yoiponga oyo ya kwatelwa mokulongifa ointaneta, mohole yokuhola oimaliwa, meemuvi, momambo e na sha nomilele da nyata nosho yo omaudano okokombiuta e na sha nelongifo leenghono. Nopehe na omalimbililo, Jehova oku tu hole nokwa hala oku tu amena.

18. Ou uditile ngahelipi ohole yaJehova oyo e ku ulikila?

¹⁸ Eshi Moses a li e lipula shi na sha nomido adishe odo a kala ta longele Jehova, okwa li a tomhwa kutya Jehova oku mu hole. Moses okwa ti: “Pita ongula, u tu palule nouwanghenda woye, fye tu shiive okukuwilila nokuhafa momafiku etu aeshe.” (Epsalme 90:14) Otwa nangekwa noupuna eshi tu udite ko notu wete kutya Jehova oku tu hole. Kashi fi tuu oufembanghenda munene okukala tu holike kuJehova! Otu udite ngaashi omuyapostoli Johannes oo a ti: ‘Taleni ohole i fike opo tate e tu pa.’ — 1 Johannes 3:1.