OKUDJA eshi nda wanifa omido 9, kanda li vali handi kulu. Paife ondi na omido 43, ndele ondi na ashike oule wometa imwe. Eshi ovadali vange va didilika kutya itandi kulu vali ndi ye pombada, ova li va ladipika nge ndi kale handi longo noudiinini opo ndiha kale handi lipula unene nofika yange. Opo ndi kale nde lipyakidila, onda li nda dika okatala kokulandifila oiimati poshivelo sheumbo letu nonda li handi kaleke onhele ya yela. Osho osha li sha nana ovalandi vahapu.

Okulonga noudiinini kakwa li kwa lundulula oinima aishe. Natango onda li ndi mu xupi neenghono nohandi mono nokuli noinima oyo yanafangwa idjuu kwaame, ngaashi okufuta oinima pomashina meefitola. Oinima aishe oya fa ashike ya longelwa ovanhu ovo ve dule nge mofika lwomapa avali. Onda li handi kala nde lietela onghenda, ashike osho osha li sha lunduluka eshi nda wanifa omido 14.

Efiku limwe, ovakainhu vavali vEendombwedi daJehova ova li va landa oiimati nova li va pula nge ndi konakone Ombibeli pamwe navo. Onda li nde shi didilika mo diva kutya okushiiva Jehova nosho yo omalalakano aye osha fimanenena shi dulife okulipula nofika yange. Osho osha li sha kwafela nge neenghono. Onda ka kala ndi hole omushangwa wEpsalme 73:28. Oshitukulwa shotete shovelishe oyo osha ti: “Okukala popepi naKalunga, osho elao lange.”

Oukwaneumbo wetu owa li wa tembukila ombadilila koBurkina Faso okudja koCôte d’Ivoire, nonghalamwenyo yange oya li ya lunduluka neenghono. Ovashiinda vetu vakulu ova li va ikila nge pokatala kange kokulandifila oiimati. Ashike ovashiinda shetu vape kava li va ikilila nge, novanhu vahapu ova li hava kala tava tale nge neenghono, onghee onda ningile oule woivike ihapu ndi li ashike meumbo. Opo nee onda li nda dimbuluka nghee sha kala shiwa kwaame okweehena popepi naJehova. Onda li nda shangela koshitaimbelewa shEendombwedi daJehova. Opo nee osha li sha tumina nge omunhu ta wapalele, omutumwa wedina Nani oo a li he uya okutalela nge po e li kokamota.

Opate yokuya keumbo letu oi na efululu, nopefimbo lodula ohai kala i na eenhata. Nani okwa li ha u ko kokamota lwoikando ihapu ngeenge te uya okukonakona naame, ashike ka li a sholola. Efiku limwe okwa li a pula nge tu ye naye kokwoongala. Osho osha hala kutya efiku olo onda li ndi na okudja mo meumbo noku ke lididimikila okutalwa kovanhu. Shikwao vali, okulonda konima yokamota okwa li taku weda ko kondjudo yokamota oko kali haka kala nale kadjuu okutanauna. Ndele nande ongaho, onda li nda dimina tu ye naye molwaashi onda li nda dimbuluka oshitukulwa oshitivali shomushangwa wange oo ndi  hole, osho tashi ti: “Elineekelo lange onde li tula mOmwene Kalunga.”

Fye naNani otwa kala hatu u ko omafimbo amwe kokamota hatu wile monhata, ndele molwaashi otwa li tu hole okwoongala, katwa li hatu kala tu na ko nasha. Ovanhu pOlupale lOuhamba ove na ohole nohava tale nge tave limemesha, osho sha yooloka ko filufilu konghedi omo handi talwa kovanhu momudingonoko. Onda li nda ninginifwa konima yeemwedi omuwoi okudja eshi nda hovela okukonakona.

Oshitukulwa oshititatu shomushangwa wange oo ndi hole osha ti: “Ndi hepaulule oinenelonga yoye aishe.” Onda li ndi shii kutya oukalele otau ka kala eshongo linene kwaame. Natango ohandi dimbuluka efiku lange lotete nda udifa eumbo neumbo. Ounona novakulunhu ova li tava tale nge neenghono, va landula nge notava yolo onghedi omo handi ende. Osho osha li sha yahameka nge neenghono, ashike onda li nda dula okulididimika eshi nda diladila koushili oo kutya navo ova pumbwa ashike Oparadisa ngaashi ame.

Opo shi ningile nge shipu, onda li nda landa Okambasikela komalola atatu. Oo kwa li hatu longo naye momapya okwa li ha undula nge ngeenge hatu londo koshikulundudu ye ta nhukile kokambasikela eshi taka ngongolele pedu. Nonande pehovelo oukalele owa li eshongo, xuuninwa onda ka kala handi u hafele neenghono, nomo 1998 onda li nda ninga omukokolindjila wondjikilile.

Onda li handi kala ndi na ovakonakonimbibeli vahapu, navane vomuvo ovaninginifwa. Shikwao vali, umwe womovamwamemekadona okwa tambula ko yo oshili. Ohashi tunge alushe omukumo okuuda nghee vamwe tava xumu komesho. Efiku limwe fimbo nda li handi yahama malaria, onda li nda yakula onhumwafo ya dja koCôte d’Ivoire. Onda li nda hovela okukonakona Ombibeli poshivelo sheumbo nomunafikola umwe wokounivesti moBurkina Faso nonda li nde mu yandja po komumwatate umwe. Lwanima omunafikola oo okwa ka tembukila koCôte d’Ivoire. Onda li nda hafa neenghono okuuda kutya okwa ninga omuudifi ina ninginifwa.

Ohandi liyambidida ngahelipi pashimaliwa? Ehangano limwe hali kwafele ovanaulema ola li la honga nge okuhondja. Omuhongi umwe okwa li a didilika onghedi yange yokulonga nokwa ti: “Ohatu ku hongo okuninga eefewa.” Naasho osho va li va ninga. Paife ohandi ningi eefewa dokukosha oikutu nodokuwapaleka oinima meumbo. Ovanhu ove hole eefewa dange nohava lombwele vamwe kombinga yado. Onda li handi twaalele ovanhu eefewa odo va mbestela handi longifa okamota komalola atatu.

Shinyikifa oluhodi, mo 2004 onda li ndi na okweefa po okukokola ondjila molwaashi onda li handi vele ombuda neenghono. Ashike natango ohandi i ngoo moukalele pandjikilile.

Ovanhu ohava ti ondi shiivikile okulimemesha. Ondi na omatomheno okukala nda hafa molwaashi okweehena popepi naKalunga osha kala shiwa kwaame. — Ehokololo laSarah Maiga.