OKUDJA mo 1992, Olutuwiliki ola nangeka po ovakulunhuongalo va pyokoka va kwafele meekomitiye dalo opo di wanife po oilonga yado. * (Tala eshangelo lopedu.) Ovayambididi va tya ngaho, ovo ve li oilyo ‘yeedi’ dimwe, ove li ekwafo linene kOlutuwiliki. (Johannes 10:16) Keshe umwe womuvo oha kala pokwoongala oko hatu ningwa oshivike keshe kokomitiye omo e li. Oshilonga shavo okuyandja ouyelele keshe oo wa pumbiwa nokuninga omaetepo. Oilyo yOlutuwiliki oyo hai ningi etokolo laxuuninwa, opo nee ovayambididi tava kwafele mokushilipaleka kutya etokolo olo ola tulwa moilonga. Ovamwatate va tya ngaho ove na ehalo okulonga keshe oshilonga osho tava pewa. Ohava i pamwe noilyo yOlutuwiliki koyoongalele ye likalekelwa nosho yo yopaiwana. Ohava dulu yo okutumwa va ka talele po oitaimbelewa ve li ovakalelipo veembelewa da kula.

Omumwatate umwe oo a kala ta yambidida Olutuwiliki okudja mo 1992, okwa ti: “Ngeenge handi wanifa po oilonga yange, ohashi kwafele Olutuwiliki li dule okuyandja elitulemo filufilu koinima yopamhepo.” Omumwatate umwe vali oo a kala moshilonga osho oule womido 20, okwa ti: “Oshi li oufembanghenda oo itau dulu okuyelekwa nasha.”

Olutuwiliki ola yandja oinakuwanifwa ihapu kovayambididi valo nola pandula neenghono oilonga youdiinini yovamwatate ovo ovadiinini. Onghee hano, ‘ovanhu va tya ngaho natu va fimanekeni’ atusheni. — Ovafilippi 2:29.