MEME okwa li a pula nge ta ti: “Omolwashike naanaa ino hala okwiilikana ootatekulululwa? Ou shii ngoo kutya ou na omwenyo omolwavo? Ino hala oku va pandula? Omolwashike ito diinine eenghedindjikilile odo da kala tadi landulwa kootatekulululwa? Ngeenge ino hala okufimaneka ootatekulululwa, owa fa ashike to ti elongelokalunga letu ola nyika oulai.” Eshi meme a mana okupopya eendjovo odo, okwa hovela okukwena.

Eemwedi dinini konima yaasho, Eendombwedi daJehova oda li da pula meme ngeenge ina hala okukonakona Ombibeli. Meme ka li a tambula ko ekonakonombibeli, ndele opo ehe di udife nai okwa li a unganeka opo di konakone naame. Meme okwa li a handukila nge eshi handi konakona Ombibeli, naasho osha li sha kumwifa nge molwaashi onda kala alushe handi dulika kuye. Ashike molwaashi onda li nda hala okuhafifa Jehova, pomhito oyo kanda li nda dulika kuye. Kasha li shipu, ndele Jehova okwa pameka nge.

Ovadali vange oveitavelo lOshibudda, olo la itavelwa kuvahapu moJapan. Konima yeemwedi mbali okudja eshi nda hovela okukonakona nEendombwedi daJehova, onda li nda tomhwa kutya Ombibeli otai hongo oshili. Eshi nde lihonga kutya ondi na Tate womeulu, onda li nda halelela oku mu shiiva nawanawa. Pehovelo fye nameme otwa li tu hole okukundafana kombinga yaasho handi lihongo. Onda li nda hovela okukala handi i kokwoongala mOsoondaxa. Eshi nda twikila okulihonga shihapu, onda li nda lombwela meme kutya itandi ka dana vali oivilo yOshibudda. Okudja opo meme okwa li a lunduluka momhepo inandi shi teelela. Okwa ti: “Okukala naumwe moukwaneumbo oo iha fimaneke ootatekulululwa oshinima shififohoni.” Okwa li ta kondjifa nge ndi efe po okukonakona Ombibeli nokuya kokwoongala. Kanda li nda teelela meme a ninge ngaho. Okwa li a shitukila nge fimbi.

Tate naye okwa li ta tu kumwe naasho meme a ti. Ashike onde lihonga mOvaefeso etukulwa 6 kutya Jehova okwa hala ndi kale handi dulika kovadali vange. Molwaashi onda li nda hala oukwaneumbo wetu u kale u na vali ombili, onda li nda diladila kutya ngeenge onda pwilikine kovadali vange, navo otava ka pwilikina nge. Pefimbo opo onda hangwa handi lilongekidile okushanga ekonakono lofikola, onda li nda tokola okuninga ngaashi ovadali vange va hala oule weemwedi nhatu. Ashike onda li nda udanekela Jehova kutya ohandi ka hovela okukala vali handi i kokwoongala konima yeemwedi nhatu.

Etokolo la tya ngaho kala li pandunge molwaashi onda li ndi shii pamwe konima yeemwedi nhatu ohandi ka kala natango nda halelela okulongela Jehova. Ashike ekwatafano lange naJehova ola li la  nghundipala meendelelo. Shikwao vali, tate nameme ova li natango va kendabala okweefifa nge po okulongela Jehova.

Eshi nda kala handi i kokwoongala, onda shakena ko nEendombwedi dihapu odo da li tadi patanekwa koilyo yomaukwaneumbo ado, noda li da shilipaleka nge kutya Jehova ota pameke nge. (Mateus 10:34-37) Oda yelifila nge kutya ngeenge onda kala omudiinini kuJehova, otashi ka kwafela oukwaneumbo wetu u lihonge kombinga yaye. Okudja opo onda li nda tokola okukala nde lineekela Jehova, nonda li nda hovela oku mu ilikana nomutima aushe.

Oukwaneumbo wetu owa li hau pataneke nge meenghedi da yoolokafana. Meme okwa li ha kondjifa nge ndi efe po okukonakona nokwa kendabala okutomhafana naame, ashike peemhito dihapu kanda li handi mu nyamukula. Peemhito dimwe ngeenge nde mu nyamukula, otwa li ashike hatu kala hatu tu eemhata molwaashi keshe umwe okwa li ha kala ta kendabala okuulika kutya oye e li mondjila. Konima yefimbo onda ka didilika kutya ngeenge onda kala nda fimaneka omaliudo neitavelo lameme, onghalo otashi dulika i ka xwepopale. Ovadali vange ova li hava pe nge oilonga ihapu meumbo opo i imbe nge okudja mo. Omafimbo amwe, ova li hava patele nge kondje yeumbo ile vaha fiile nge oikulya.

Meme okwa li a pula ovanhu vamwe ve mu kwafele opo va efife nge po okulongela Jehova. Okwa li a pula omuhongi wetu umwe kofikola, ndele ina pondola. Okwa li yo a twala nge komukulunhu wavo woilonga opo a itavelife nge kutya omalongelokalunga makwao aeshe kae na ekwafo lasha, kakele kulameme. Okwa li yo a dengela ovapambele noku va pula ekwafo ta kwena. Osho osha li sha handula nge neenghono. Ashike ngeenge nda li nda ya kokwoongala, ovakulunhuongalo ova li hava dimbulukifa nge kutya ngeenge meme ta lombwele vamwe kombinga  yonghalo yetu, kungaho ote va pe ashike oundombwedi.

Ovadali vange ova li va hala ndi ye kounivesiti opo ndi ka mone oilonga iwa monakwiiwa. Atushe otwa li hatu kala twa handuka ngeenge hatu popi kombinga yoshinima osho, nomolwaasho onda li nde va shangela eembapila dihapu handi va yelifile omalalakano ange. Tate okwa li a handuka neenghono ndele ta ti: “Ngeenge ou wete kutya oto dulu okumona oilonga, i mona mongula nongeenge hasho, oto di mo meumbo lange.” Onda li nda ilikana kuJehova a kwafele nge. Ngomongula fimbo nda li moilonga yomomapya, onda li nda pewa oilonga kovamwameme vavali ndi kale handi hongo ounona vavo. Tate ka li a hafela oshinima sha tya ngaho, nokudja opo ka li vali ha popi naame nokwa li he lidimbike nge. Meme okwa li a ula nge kutya xwepo ngeno nda ningile omukolokoshi ponhele yokuninga Ondombwedi yaJehova.

Omafimbo amwe onda li handi diladila kutya pamwe Jehova oye a hala ndi kale handi patanekwa neenghono kovadali vange. Onghee hano, onda li nda ilikana Jehova nokudilonga kwaasho Ombibeli ya popya kombinga yohole yaye. Osho osha li sha kwafela nge ndi kale ndi na etaleko liwa nondi ude ko kutya ovadali vange otava pataneke nge molwaashi ove na ko nasha naame. Jehova okwa kwafela nge ndi yukife okudiladila kwange nondi ninge omatokolo e li pandunge. Natango, eshi nda kala handi i moukalele luhapu, onda kala handi u hafele neenghono, nonda ka kala nda hala okuninga omukokolindjila.

Eshi ovamwameme vamwe va uda kutya onda hala okuninga omukokolindjila, ova lombwela nge kutya nandi teelele manga fiyo ehandu lovadali vange la lota. Onda li nda ilikana ndi pewe ounongo, nda ninga omapekapeko, nda diladila kutya omolwashike nda hala okuninga omukokolindjila nonda li nda popya novamwatate novamwameme ovo ve na owino. Konima yaasho, onda li nda tokola okuhafifa Jehova. Onda li yo nda uda ko kutya nonande ondi teelele pa pite efimbo lonhumba fimbo inandi hovela okukokola ondjila, ovadali vange oshi na oupu va kale tava pataneke nge natango.

Onda li nda hovela okukokola ondjila modula omo nda mana ofikola. Konima eshi nda kokola ondjila oule wefimbo, onda li nda hala okuya oko ku na omhumbwe inene. Ashike tate nameme kava li va hala ndi ye, nomolwaasho onda li nda teelela ndi wanife omido 20. Opo nee onda li nda pula oshitaimbelewa shi tumine nge koshitukulwa osho shi li popepi novapambele vetu kolukadi laJapan opo meme aha kale unene e na oshisho.

Fimbo nda li konhele oko, onda li nda hafa okumona ovakonakonimbibeli vange vahapu tava ninginifwa. Onda li nda hovela okulihonga Oshiingilisha molwaashi onda li nda hala okulonga shihapu moukalele. Konima eshi nda didilika ouladi wovakokolindjila ve likalekelwa vavali meongalo letu nonghee tava kwafele ovanhu, onda li nda tokola kutya naame onda hala okuninga omukokolindjila e likalekelwa. Pefimbo opo, meme okwa li a vela neenghono lwoikando ivali, noikando aishe onda li nda shuna keumbo opo ndi ke mu yakule. Osho osha li she mu kumwifa, nosha li sha hemuna omutima waye kanini.

Omido heyali konima yaasho, onda li nda shangelwa ombapila komukokolindjila umwe e likalekelwa wedina Atsushi. Okwa li a hala okuhombola, ye ta pula nge ngeenge onde mu hala. Nghi na efiku nda diladilile ngeno okuhombolwa kuAtsushi, nokanda li nda diladila kutya ona diladile okuhombola nge. Konima yomwedi umwe, onda li nde mu nyamukula kutya onda hala oku mu shiiva nawa, notwa li twa mona kutya otu na omalalakano a faafana. Atushe otwa li twa hala okutwikila noilonga yefimbo li yadi nokutambula ko oshilonga keshe hatu pewa. Konima yefimbo otwa ka hombola, nonda li nda hafa eshi tate nameme novapambele vetu vamwe va li ve uya kohango yetu.

 Diva konima yaasho, fimbo twa li ovakokolindjila vondjikilile, Atsushi okwa li a nangekwa po e li omukalelipo womupashukilishikandjo. Lwanima otwa li twa ninga ovakokolindjila ve likalekelwa opo nee hatu i moilonga youpashukilishikandjo. Eshi twa mana okutalela po omaongalo aeshe moshikandjo shetu oshikando shotete, otwa li twa dengelwa ongodi koshitaimbelewa tashi tu pula ngee inatu hala okutembukila koNepal noku ka twikila noilonga youpashukilishikandjo.

Onda li handi lipula kutya ovadali vange otava ka kala ve udite ngahelipi ngeenge onda tembukile kokule. Eshi nde va dengela, tate okwa li a nyamukula nge ta ti: “Otamu i konhele iwa.” Fimbo ku na oshivike tu ye, kaume katate umwe okwa li e mu pa embo tali popi kombinga yaNepal, na tate okwa li nokuli ta diladila kutya oshiwa oku ka talela po koNepal.

Eshi twa ya koNepal, otwa li twa hafa okukala mokati kovanhu ovo ve na omhepo youkaume. Lwanima, Bangladesh nasho osha ka ninga oshitukulwa shoshikandjo shetu. Nonande osha li popepi naNepal, osha li sha yooloka ko neenghono. Otwa li hatu shakeneke eenghalo da yoolokafana moilonga yomomapya. Konima yeedula nhano, otwa li twa tuminwa vali koJapan, oko tu li fiyo opaife moilonga youpashukilishikandjo.

Onde lihonga shihapu kombinga yaJehova fimbo twa li koJapan, koNepal nokoBangladesh. Ovanhu vomoilongo oyo ove na omaputuko neenghedindjikilile da yoolokafana, nomunhu keshe oku lili. Onda mona nghee Jehova ta file oshisho ovanhu pauhandimwe, te va tambula ko, te va kwafele noku va nangeka noupuna.

Ohandi pandula Jehova omolwoinima ihapu oyo a ningila nge. Okwa pa nge omhito ndi mu shiive nondi mu longele, nokwa pa nge omushamane oo naye he mu longele. Jehova okwa kwafela nge ndi ninge omatokolo e li pandunge, nopaife ondi na ekwatafano liwa naye nosho yo novadali vange. Ohandi pandula Jehova eshi fye nameme twa panga vali oukaume. Onda pandula neenghono eshi paife ndi na ombili naKalunga nosho yo nameme.