Ou udite ngahelipi shi na sha no 21 Desemba 2012, efiku olo li li mokalindeli kOvamaya, olo vahapu va li tava ti kutya otapa ka ningwa elunduluko la kuma ounyuni aushe? She likolelela kwaasho wa li wa teelela, otashi dulika u kale u udite wa pepelelwa, wa nyemata ile u kale wa teka omukumo. Ndele mbela osho osha hala okutya omaxunganeko aeshe e na sha nexulilo lounyuni kae na efiku a wanifwe?

Ongahelipi shi na sha ‘nexulilo lounyuni’ olo la popiwa mOmbibeli? (Mateus 24:3) Ovanhu vamwe ova tila kutya edu otali ka hanaunwa po nomundilo, ofimbo vamwe va halelela oku ka mona kutya oshike tashi ka ningwa po pefimbo lexulilo. Vo vamwe ova loloka okuuda kutya exulilo oli li popepi. Ndele mbela omataleko a tya ngaho oku li ngoo mondjila? Ongahelipi tu na okutala ko lela exulilo lounyuni?

Oto ka kala wa hafa okuuda osho Ombibeli tai ti lela shi na sha nexulilo lounyuni. Ombibeli itai yandje ashike omatomheno okukala twa teelela nodjuulufi exulilo, ndele oya yelifa yo kutya vamwe otava ka kala va loloka eshi exulilo tali monika la fa la kala ko. Ohatu ku shivi u konakone omanyamukulo opaMbibeli komapulo amwe oo ovanhu vahapu have lipula nao shi na sha nexulilo lounyuni.

ENYAMUKULO LOPAMBIBELI: “[Kalunga] edu owe li shitila keengudi dalo, lo li ha tengauke nande fiyo alushe.”— EPSALME 104:5.

Edu itali ka hanaunwa po nomundilo ile nashimwe shi lili. Ponhele yaasho, Ombibeli otai hongo kutya edu onhele yokukalwa kovanhu fiyo alushe. Epsalme 37:29 ola ti: “Ovayuki, vo otava ka fyuulula oshilongo, ndee tava kala mo alushe.” — Epsalme 115:16; Jesaja 45:18.

Konima eshi Kalunga a shita edu, okwa ti kutya ola “wapala unene,” noku udite ngaho fiyo okunena. (Genesis 1:31) Kalunga ina lalakanena okuhanauna po edu, ndele okwa udaneka kutya ota ka ‘nyonauna po ovo have li nyono’ noku li amena liha nyonaunwe po fiyo alushe. — Ehololo 11:18.

Otashi dulika u diladila kutya 2 Petrus 3:7 ota ulike kutya edu otali ka hanaunwa po nomundilo. Ovelishe oyo otai ti: “Eulu lopaife nedu eli ola tuvikililwa omundilo.” Mbela osho itashi ulike kutya edu otali ka hanaunwa po nomundilo? Omafimbo amwe Ombibeli ohai longifa pafaneko omautumbulilo ngaashi “eulu,” “edu” nosho yo “omundilo.” Pashihopaenenwa, eshi Epsalme 97:1 la ti: “Edu nali shi nyakukilwe,” ola longifa oshitya “edu” tali ulike kovanhu.

Oshikalimo sha 2 Petrus 3:7 otashi ulike kutya eulu, edu nosho yo omundilo oo wa tumbulwa mo owopafaneko. Ovelishe 5 nosho yo 6 oya faafanifa onghalo oyo naayo yopefimbo lEyelu laNao. Pomhito opo, ounyuni wonale oo wa li wa hanaunwa po, ndele hadu lovene. Onghee hano, “edu” olo Ombibeli ya popya kutya ola li la hanaunwa po pefimbo lEyelu otali ulike kokuhanaunwa po kwovanhu aveshe ovakolokoshi. (Genesis 6:11) “Eulu” olo la li yo la hanaunwa po otali ulike kovapangeli ovo va li tava pangele ovanhu pefimbo opo. Sha faafana, 2 Petrus 3:7 okwa xunganeka kutya ovanhu ovakolokoshi nosho yo omapangelo a nyonauka otaa ka hanaunwa po fiyo alushe, a fa a xwikwa po nomundilo oku shi popya pafaneko.

ENYAMUKULO LOPAMBIBELI: “Ounyuni otau xulu po pamwe nokahalu [kao]; ndelenee ou ta longo ehalo laKalunga, oye ta kala alushe.” — 1 JOHANNES 2:17.

“Ounyuni” oo tau xulu po, kau fi edu, ndele ovanhu vomounyuni ovo onghedi yavo yokukalamwenyo ihe li metwokumwe nehalo laKalunga. Ngaashi ashike ndokotola ha tande omunhu oo e na okaangela opo a xupife omwenyo waye, Kalunga ota ka  ‘kombolola po’ ovakolokoshi opo ovanhu ovayuki va kale tava hafele pauyadi onghalamwenyo kombada yedu. (Epsalme 37:9) Kungaho, ‘exulilo lounyuni’ oshinima shiwa.

Molwaashi ovanhu nosho yo edu otali ka xupa pexulilo lounyuni, mbela kashi li pandunge okudimina kutya otaku ke uya ounyuni mupe? Ombibeli otai ulike kutya otaku ke uya ounyuni mupe, molwaashi oya popya kombinga ‘younyuni tau ke uya.’— Lukas 18:30.

Jesus okwa popya shi na sha nefimbo lomonakwiiwa li li ‘eshitululo loinima aishe.’ Pefimbo opo tuu opo, ota ka alulila ovanhu monghalo omo Kalunga a li a hala va kale okudja pehovelo. (Mateus 19:28, NIV) Opo nee ohatu ka hafela onghalamwenyo.

• Edu otali ka ninga oparadisa novanhu aveshe otava ka kala meameno nova hepuluka. — Jesaja 35:1; Mika 4:4.

• Oilonga tai ti sha notai mbilipaleke. — Jesaja 65:21-23.

• Ovanhu itava ka yahama vali. — Jesaja 33:24.

• Ovanamido otava ka nyashuka. — Job 33:25.

• Oonakufya otava ka nyumunwa. — Johannes 5:28, 29.

Ngeenge otwa longo “ehalo laKalunga,” osho ta pula tu ninge, itatu ka kala twa tila exulilo lounyuni. Ndele ponhele yaasho, ohatu ka kala twe li teelela nodjuulufi.

ENYAMUKULO LOPAMBIBELI: ‘Ngeenge tamu mono ei ya ningwa, shiiveni kutya Ouhamba waKalunga ou li popepi.’ — LUKAS 21:31.

Omuprofesor Richard Kyle okwa popya membo ledina The Last Days Are Here Again a ti kutya “omalunduluko ombadilila nosho yo omakuyunguto ohaa diladilifa ovanhu kutya ounyuni ou li pokuxula po.” Osho osho shi li ngaho unene tuu ngeenge kave udite ko kutya omolwashike oinima ya tya ngaho tai ningwa.

Ovaprofeti ovo va popya kombinga yexulilo inava tokola kuvo vene va shange kombinga yalo nokuyelifa kutya omolwashike oinima ii ya li tai ningwa pefimbo lavo. Ndele ova li va nwefwa mo kuKalunga va yelife shi na sha neenghalo dounyuni odo tadi ulike kutya exulilo lounyuni oli li pokuuya. Natu ka taleni kwaamwe omomaxunganeko taa landula, nokutala ngeenge otaa wanifwa tuu pefimbo letu.

•   Oita, ondjala, omakakamo edu nosho yo omikifi dolutapo di dipai.— Mateus 24:7; Lukas 21:11.

• Ehapupalo loukolokoshi.— Mateus 24:12.

• Okunyonaunwa kwedu.— Ehololo 11:18.

• Ovanhu ove lihole vo vene, ve hole oimaliwa nosho yo omalihafifo, ndele kave hole Kalunga.— 2 Timoteus 3:2, 4.

• Okuteka po kwomaukwaneumbo.— 2 Timoteus 3:2, 3.

• Okuhayandja elitulemo koumbangi oo tau ulike kutya exulilo ola ehena popepi.— Mateus 24:37-39.

• Okuudifwa kwonghundana iwa yOuhamba waKalunga mounyuni aushe.— Mateus 24:14.

Jesus okwa ti kutya ngeenge hatu “mono aishe” oyo natu kale tu shii kutya exulilo lounyuni oli li popepi. (Mateus 24:33) Eendombwedi daJehova oda itavela kutya ope na oumbangi wa twa, nohadi udifile vamwe kombinga yeitavelo lado moilongo 236.

ENYAMUKULO LOPAMBIBELI: “Fimbo tava ti: Ombili, kape na nande ombili, opo nee ehanauno tali va vakele, ngaashi omufimba ta hangwa koshifeta, ndee kave na apa tava i onhapo.”— 1 OVATESSALONIKI 5:3.

Ombibeli oya faafanifa ehanauno lounyuni noshifeta shomufimba osho ihashi i wa moshipala nohashi uya ombadilila. Efimbo olo tali twala fiyo okexulilo otali faafanifwa yo nomufimba, molwaashi omudalakadi oo e li pokumona okaana oha kala e wete omadidiliko onhumba oo taa ulike kutya okaana oke li pokudalwa. Ndokotola otashi dulika a tengeneke efiku omo okaana taka dalwa, ndele nokuli nonande efiku olo oli pite, natango omufimba oha kala e na oushili kutya oku li pokumona okaana. Sha faafana, nonande exulilo inali uya mefiku omo ovanhu va teelela li uye, osho inashi lundulula oushili oo tau ulike kutya otu li ‘momafiku axuuninwa.’— 2 Timoteus 3:1.

Otashi dulika u lipule kutya, ‘Ngeenge ope na omadidiliko a yela oo taa ulike kutya exulilo ola ehena, omolwashike ovanhu vahapu va dopa okumona oumbangi oo?’ Ombibeli oya ti kutya eshi exulilo tali ehene popepi, vahapu otava ka kala va dina oumbangi oo nove wete inau fimana. Ponhele yokudimina kutya eenghalo dounyuni oda naipala nonokutya otu li momafiku axuuninwa,  otava sheke tava ti: “Nghee tuu ootatekulu va fya, oinima aishe oi li ngaashi ya kala pehovelo leshito.” (2 Petrus 3:3, 4) Omadidiliko oo taa ulike kutya exulilo ola ehena okwa yela, ndele vahapu ohave e lipwililikile.— Mateus 24:38, 39.

Oshitukulwa eshi osha kundafana ashike omishangwa dimwe odo tadi ulike kutya exulilo ola ehena popepi. a Mbela ino hala okulihonga shihapu? Ngeenge osho, kwatafana nEendombwedi daJehova di konakone naave Ombibeli oshali. Otadi dulu okukala hadi uya keumbo loye ile ponhele imwe vali tai wapalele ile mu konakone mongodi. Owa pumbwa ashike okulanda efimbo, noto ka mona ouwa muhapu wa denga mbada.