Onda dalelwa muMoundsville, oshilando sha mwena nawa shi li popepi nomulonga waOhio kouningininolundume laVirginia mo-U.S.A. Molwaashi moukwaneumbo wetu otwa li mo ounona vane, vatatu vomufye oumati, onghalamwenyo oya li ihafifa. Ovadali vange ova li hava longo noudiinini, ovanashili nove hole ovanhu. Katwa li tu na oinima ihapu yopamaliko, ndele alushe otwa li hatu kala tu na osho twa pumbwa. Molwaashi ovadali vange Eendombwedi daJehova, ova li va ninga ngaashi tava dulu opo va findile omafinamhango Ombibeli mufye eshi twa li ounona.

Ndele eshi nda ninga omunyasha, omutima wange owa li wa hongaulwa nokweefa po osho nda li nda hongwa. Onda li handi lipula kutya, ‘Onghalamwenyo tai wilikwa komafinamhango Ombibeli otai ti sha ngoo notai shambula?’ Onda li handi diladila kutya opo ndi kale nda hafa shili ongeenge ashike handi ningi osho nda hala. Moule ashike wefimbo lixupi, onda li nda efa po okuya kokwoonga kwopaKriste. Ovamwameme vavali navo ova li va tukula oshibofa va fa nge. Ovadali vetu ova li va ninga keshe osho tava dulu opo ve tu kwafele, ndele katwa li twa tambula ko ekwafo lavo.

Opo nee onda ka mona kutya emanguluko olo nda hala otali twala nge moupika. Efiku limwe fimbo hatu di kofikola, kaume kange okwa li a pa nge ekaya. Onda li nde li tambula ko. Okudja opo, onda kala handi tambula ko oinima ihapu ya nyika oshiponga. Mokweendela ko kwefimbo, onda kala handi longifa oingangamifi, okunwa sha pitilila nokukala nonghedi yokukalamwenyo inai koshoka paenghedi. Onda twikila okukala handi longifa oingangamifi neenghono oule womido nonda li nda ninga omupika wayo. Eshi nda ninga omupika wayo, onda li nda hovela oku i landifa opo ndi liyambidide.

Onda kala handi kendabala neenghono okulipwililikila eliudo lange olo la kala tali londwele nge kutya onghedi yange yokukalamwenyo oya puka. Ashike onda li ndi wete kutya itandi dulu vali okulunduluka. Nonande onda kala handi kala mokati kovanhu koivilo, luhapu onda kala ndi udite oudja nonda polimana. Omafimbo amwe onda li handi diladila kombinga yovadali vange ovo ve na eenghedi diwa nonda li hadi lipula kutya osha enda ngahelipi opo ndi ye monghalo ii ya tya ngaho.

Nonande onda li nde liekelashi, ope na vamwe ovo va li ve na ko nasha naame. Mo 2000, ovadali vange ova li va shiva nge koshoongalele shoshitukulwa shEendombwedi daJehova. Onda li nda ya nonande kanda li naanaa ndi na ohokwe. Ashike onda li nda kumwa eshi ovamwameme ovo navo vali va tukula oshibofa ve uya koshoongalele.

Fimbo tu li poshoongalele, onda li nda dimbuluka kutya monhele omo tuu omo omo nda li odula ya dja ko, mwa li tamu danwa eengalo. Eyooloko olo nda li nda mona, ola li la kuma nge neenghono pamaliudo. Eshi twa li po noudano weengalo, onhele oya li ya kaka noya li ya twima omwifi womakaya. Ovanhu ovo va li po kave na oukaume, netumwalaka leengalo davo ola li tali polimaneke. Ndele poshoongalele onda li nda dingililwa kovanhu va hafa shili, ovo va li va tambula nge ko nohamu, nonande opa li pa pita omido inandi va mona. Onhele oya li ya yela, nopa li tapa popiwa oinima iwa i na sha nonakwiiwa. Okutala oidjemo iwa oyo ya etifwa koshili yOmbibeli osha li sha ningifa nge ndi lipule kutya omolwashike inandi i tambula ko.— Jesaja 48:17, 18.

Diva konima yoshoongalele, onda li nda tokola opo ndi alukile Keongalo lopaKriste. Ovamwameme navo ova li va alukila keongalo, ve linyengifwa kwaasho va mona poshoongalele osho. Atushe vatatu otwa li twa tambula ko ekonakonombibeli.

Omushangwa oo unene tuu we linyengifa nge oJakob 4:8, oo ta ti: “Eheneni kuKalunga, opo nee Ye ta ehene kunye.” Onda didilika kutya opo ndi ehene popepi naKalunga ondi na okukoshola onghalamwenyo yange. Amwe omomalunduluko oo nda li ndi na okuninga, ongaashi okweefa po okushila omakaya, okulongifa oingangamifi nokunwa sha pitilila.— 2 Ovakorinto 7:1.

Onda efa po ookaume vakulu nokupanga oukaume naavo hava longele Jehova. Omukulunhuongalo oo nda konakona naye Ombibeli okwa li ha kwafele nge neenghono. Luhapu okwa li ha dengele nge ongodi nokutalela nge po a tale kutya ohandi shi endifa ngahelipi. Fiyo opaife oku li umwe womookaume kange vopofingo.

Mo 2001, ame novamwameme vavali otwa li twa ulika kutya otwe liyapulila Kalunga mokuninginifwa. Ovadali vange nosho yo okandenge ketu kokamati okadiinini ova li va hafa unene eshi oukwaneumbo wetu xuuninwa wa hangana melongelokalunga lashili.

Onda li handi diladila kutya omafinamhango Ombibeli ohaa ngabeke omunhu unene, ndele paife onde a tala ko e li eameno la denga mbada. Ombibeli oya kwafela nge ndi efe po okulongifa nokulandifa oingangamifi nondi kale nonghalamwenyo iwa.

Ondi na oufembanghenda wokukala oshitukulwa shoumwainafana womounyuni aushe waavo tava longele Jehova. Ovanhu ovo ove holafane notava longele Kalunga hangana. (Johannes 13:34, 35) Moumwainafana omo omwa dja enangeko noupuna le likalekelwa neenghono, omukulukadi wange Adrianne, oo ndi hole neenghono nonde mu lenga. Otwa hafa neenghono eshi hatu longele Omushiti wetu pamwe.

Ponhele yokulalakanena omalalakano okuliholamwene, paife ondi li omulongi wefimbo li yadi, handi hongo ovanhu nghee navo tava dulu okumona ouwa mEendjovo daKalunga. Oilonga ei oya etela nge ehafo linene. Ohandi dulu okupopya noushili lela kutya Ombibeli ohai lundulula onghalamwenyo yovanhu. Xuuninwa, onda mona emanguluko lashili.