Onda dalelwa muSanto Domingo, moDominican Republic, notwa dalwa tu li vane, ame aame nghelo. Ovadali vange ovahongwanhu nova li va hala tu putukile momudingonoko muwa nomu na ovanhu ve shii okulineekelwa. Omido 4 fimbo inandi dalwa, ovadali vange ova li va shakena novatumwa Ovamormon. Molwaashi ovalumenhu ovanyasha ovo va li va shakeneka ova li va djala nawa, ovadali vange ova li va tokola opo oukwaneumbo wetu oo u ninge tete oilyo yOvamormon muSanto Domingo.

Eshi handi kulu, onda kala handi hafele eendafano kongeleka nonda li nda kumwa molwaashi Ovamormon ohava hongo kutya oukwaneumbo nosho yo okukala u na eenghedi oshinima sha fimana. Onda li ndi udite etumba eshi ndi li Omumormon nonda li nde litulila po elalakano lokuninga omutumwa.

Eshi nda li ndi na omido 18, otwa li twa tembukila kOilongo ya Hangana opo ndi ka mone ehongo liwa kounivesiti oyo ya denga mbada. Konima yomudo umwe lwaapo, meme umwe omumwaina wameme nomushamane waye ovo ve li Eendombwedi daJehova ova li ve uya oku tu talela po moFlorida. Ova li ve tu shiva tu ye pamwe navo koshoongalele shoshitukulwa. Onda li nda kumwa eshi ovanhu aveshe ovo va li popepi naame tava landula mEembibeli davo eshi omishangwa tadi leshwa notava ningi omadidilikoshango. Naame onda li nda pula ndi pewe opena noshifo nonda li yo nda hovela okuninga sha faafana.

Konima yoshoongalele, meme oo omumwaina wameme nomushamane waye ova ti molwaashi onda hala okuninga omutumwa, otava dulu okukwafela nge di lihonge sha kombinga yOmbibeli. Onda li ndi wete kutya otashi ka kala shiwa, molwaashi kanda li naanaa ndi shii shihapu kombinga yOmbibeli ngaashi ndi shii Embo lOvamormon.

Ngeenge twa li hatu kundafana pangodi kombinga yOmbibeli nameme nosho yo omushamane waye, alushe ova li hava ladipike nge ndi yelekanife omahongo Ombibeli naasho nda itavela.  Ova li va hala ndi mone ame mwene kutya Ombibeli otai hongo lela shike.

Ope na oinima ihapu yeitavelo lOshimormon oyo nda li nda tambula ko, ndele kanda li ndi shii lela kutya Ombibeli oya yooloka ko ngahelipi komadiladilo oo. Meme okwa li a tumina nge o-Awake! yOshiingilisha yo 8 Novemba 1995, ya nyanyangidwa kEendombwedi daJehova. Nomo-Awake! omo omwa li oitukulwa imwe tai popi kombinga yeitavelo lOvamormon. Onda li nda mona kutya mboli nghi shii shihapu shi na sha nomahongo Ovamormon. Osho osha li she linyengifa nge ndi ka konge ouyelele ko-Web site yopambelewa yOvamormon opo ndi tale ngeenge eshi tashi popiwa mo-Awake! oshoshili ngoo. Osho sha popiwa mo-Awake! oshoshili, noushili oo owa ka kolekwa vali kwaasho nda mona eshi nda li nda ka talela po eenhele dopashiwana dokuulika oikulunima moUtah.

Onda kala nda itavela kutya Embo lOvamormon otali tu kumwe nOmbibeli. Ndele eshi nda hovela okukonakona Ombibeli noukeka, onda li nda didilika kutya ope na ekondjifafano pokati komahongo Ovamormon naao Ombibeli. Pashihopaenenwa, Ombibeli oya popya muHesekiel 18:4 kutya omwenyo ohau fi. Ndele Embo lOvamormon ola popya muAlma 42:9, la ti: “Omwenyo kau na efiku u fye.”

Kakele komahongo oo itaa tu kumwe, kanda li yo ndi udite ko omahongo e na sha nomhepo youkwashiwana oo haa hongwa kOvamormon. Pashihopaenenwa, ohava hongo kutya oshikunino shaEden osha li moJackson County, Missouri, mo-U.S.A. Ovakwatelikomesho vongeleka ohava ti “Ouhamba waKalunga otau ka pangela ombada yedu aishe okupitila mepangelo lOilongo ya Hangana.”

Onda li handi lipula kutya eshi Ovamormon hava hongo ngaho, ongahelipi shi na sha noilongo ikwao, ngaashi omo nda dalelwa. Otwa li hatu kundafana kombinga yaasho onguloshi imwe eshi nda li nda dengelwa komunyasha umwe Omumormon oo a li a deulwa a ninge omutumwa. Onda li nde mu pula sha yukilila kutya ota kala ngoo e na ehalo okulwifa Ovamormon vakwao ngeenge tava lwifa oshilongo shavo. Onda li nda kumwa eshi a ti kutya ote ke va lwifa ashike. Onda li nda konakona moule omahongo eitavelo lange nonda li yo nda pula ovakwatelikomesho vongeleka yOvamormon. Ova li va lombwela nge kutya omanyamukulo omapulo ange okwa kwatela mo oiholekwa oyo tai ka hololwa fiku limwe eshi ouyelele tau ende tau yela.

Molwaashi onda li nda uda nai keyelifo lavo, onda li nde likonakona nokutala omalinyengotomheno ange okukala nda hala okuninga omutumwa wOvamormon. Onda li nda didilika kutya onda hala okuninga omutumwa molwaashi nda hala okukwafela ovanhu. Etomheno limwe vali ololo kutya opo ovanhu va kale va fimaneka nge. Ashike kanda li ndi shii shihapu kombinga yaKalunga. Nonande onda li ngoo handi lesha Ombibeli lwoikando, kanda li lela nde i lenga. Kanda li ndi shii elalakano laKalunga li na sha nedu ile novanhu.

Imwe yomoinima oyo nde lihonga eshi nda konakona Ombibeli nEendombwedi daJehova ongaashi, edina laKalunga, osho hashi ningwa po pefyo nosho yo onghandangala oyo Jesus ta dana mokuwanifwa kwelalakano laKalunga. Xuuninwa, onda li nda shiiva nawa embo olo likumwifi nohandi hafele okulombwela vamwe kombinga yoshili oyo nde lihonga. Onda kala ndi shii kutya Kalunga oko e li, ndele paife ohandi dulu okupopya naye meilikano e li kaume kange kopofingo. Onda ninginifwa ndi li Ondombwedi yaJehova mo 12 Juli 2004, nokonima yeemwedi 6 onda li nda hovela okulonga ndi li omukalele wefimbo li yadi.

Onda ninga eedula 5 paife handi longo kombelewa ya kula yEendombwedi daJehova koBrooklyn sha-New York. Ohandi hafele neenghono oilonga yokukwafela okunyanyangida Eembibeli nosho yo oileshomwa ya kanghamena kOmbibeli oyo hai etele ouwa ovanhu omamiliyona mounyuni, nohandi twikile okukwafela vamwe ve lihonge kombinga yaKalunga.