Ohole oya kwatela mo okukala u uditile vamwe omaliudo omoule. Omunhu omunahole oha ulike okupitila meendjovo nomeenghatu daye nghee e uditile ovo ehole, nonande okuninga ngaho otaku pula omaliyambo.

Omonghedi ilipi Moses a li a ulika kutya okuhole Kalunga? Dimbuluka eendjovo odo di li mu 1 Johannes 5:3 odo tadi ti: “Ohole yokuhola Kalunga oyo tuu ei nokutya, tu diinine oipango yaye.” Molwaashi Moses oku hole Kalunga, okwa li ha dulika koipango yaYe. Okwa li a ninga ashishe osho Kalunga a li a pula a ninge, okudja ngoo koshilonga shidjuu shoku ka popya nomunaenghono Farao nosho yo oshilonga osho sha li tashi monika sha fa shanafangwa shokuyelula onhaili yaye kombada yEfuta Litilyana. Moses okwa li a dulika, kashi na nee mbudi kutya oshipango oshipu ile oshidjuu. Ombibeli oya ti: “Osho ye a ninga.” — Exodus 40:16.

Moses okwa li a ulika kutya oku hole Ovaisrael vakwao. Navo ova li ve shii kutya Jehova okwa li ta longifa Moses opo a wilike oshiwana shaye, naasho osha li she va ningifa va lombwele Moses omaupyakadi avo e lili noku lili. Ombibeli oya ti: “Novanhu va kala ofika koshipala shaMoses okudja ongula fiyo onguloshi.” (Exodus 18:13-16) Diladila kutya Moses okwa li ha kala a loloka shi fike peni konima yokupwilikina efiku alishe eshi Ovaisrael tave mu lombwele omaupyakadi avo! Ndele molwaashi Moses okwa li e hole Ovaisrael vakwao, okwa li a hafa oku va kwafela.

Kakele kokupwilikina kuvo, okwa li yo e va ilikanena. Okwa li nokuli ha ilikanene ovo va ungaunga naye nai. Pashihopaenenwa, eshi omumwainakadona, Miriam, a li e mu ngongotela, Jehova okwa li a denga Miriam noudu woshilundu. Ponhele yokukala a hafela e dengo la tya ngaho, Moses okwa li a ilikanena Miriam a ti: “Akutu, Kalunga! Mu velula!” (Numeri 12:13) Ohole oyo ya li ye linyengifa Moses a ilikane eilikano la tya ngaho lokuhelihola mwene.

Ohatu dulu okuhopaenena Moses mokukulika ohole yomoule yokuhola Kalunga. Ohole ya tya ngaho ohai tu linyengifa opo tu dulike koipango yaye tashi di ‘komutima.’ (Ovaroma 6:17) Ngeenge otwa kala hatu dulika kuJehova tashi di komutima, ohatu ka hafifa omutima waye. (Omayeletumbulo 27:11) Nafye ohatu ka mona yo ouwa. Komesho yaaishe, ngeenge ohatu longele Kalunga hatu linyengifwa kohole yashili, itatu ka ninga ashike osho sha yuka ndele ohatu ka hafela yo oku shi ninga. — Epsalme 100:2.

Onghedi imwe vali omo hatu dulu okuhopaenena Moses omokukulika ohole yokuheliholamwene yokuhola vamwe. Ngeenge ookaume ketu ile oilyo youkwaneumbo wetu ove tu hololele omaliudo avo, ohole otai ke tu linyengifa (1) tu yandje elitulemo kuvo nomitima detu adishe; (2) tu kale tu va uditile oukwao wananghali nosho yo (3) oku va lombwela kutya otu na ko nasha navo.

Ngaashi Moses, nafye otu na okukala hatu kwatele momailikano etu ovo tu hole. Omafimbo amwe, ngeenge ove tu lombwele omaupyakadi avo, ohatu kala tu udite nai eshi itatu dulu okuninga po sha shi na sha nao. Otashi dulika tu popye twa nyika oluhodi hatu ti: “Kape na vali shimwe osho handi dulu okuninga po shihe fi oku ku ilikanena.” Ndele natu dimbuluke kutya ‘eilikano lashili lomuyuki otali dulu shihapu.’ (Jakob 5:16) Omailikano etu otaa dulu okulinyengifa Jehova a ninge po sha shi na sha nomunhu oo osho tashi dulika a li ehe na okuninga. Onghee hano, kape na vali shimwe shi li xwepo osho hatu dulu okuningila ovo tu hole shihe fi oku va ilikanena. a

Mbela ito dimine kutya ohatu dulu okulihonga shihapu moshihopaenenwa shaMoses? Nonande okwa li omunhu ngaashi fye, okwe tu tulila po oshihopaenenwa sha denga mbada sheitavelo, shelininipiko noshohole. Apa ngoo pe fike hatu shikula oshihopaenenwa shaye, opo ngoo tapa ka kala pe fike ouwa oo hatu mono fye vene nosho yo vamwe. — Ovaroma 15:4.