Mbela oto dimbuluka efiku olo okaana keni ka dalwa? Nopehe na omalimbililo, omwa li mwa halelela oku ka ukata. Ndele ovadali vamwe ngaashi Carlo naMia, ehafo lavo ola li mumwe noshisho eshi va lombwelwa kutya okaana kavo otaka vele ile oke na oulema.

Mbela ou na okaana ke na oulema? Otashi dulika wa limbililwa ngeenge oto dulu ngoo okupondola. Ngeenge osho, ino teka omukumo. Ope na ovadali ngaashi ove ovo va dula okuungaunga nomupondo nonghalo ya faafana noyoye. Natu ka taleni komashongo opatatu oo tashi dulika u shakeneke nanghee omayele opaMbibeli taa dulu oku ku kwafela.

Ovadali vahapu ohava kala va nyemata ngeenge ova mono kutya ounona vavo ove na ounghundi wonhumba. Juliana, omudalakadi wokoMeksiko, okwa ti: “Kanda li nde shi itavela eshi ndokotola a lombwela nge kutya okamonamati ketu Santiago oka lemana kouluvi. Onda li ndi udite ounyuni wa wilila nge po.” Vamwe otashi dulika va kale ve udite ngaashi omudalakadi umwe wokuItalia wedina Villana. Omudali oo okwa ti: “Onda li da halelela okukala ndi na okaana nonande osha li sha nyika oshiponga kovakainhu vepupi lange. Ndele paife ngeenge omonamati wange ta hangwa komaupyakadi oo haa  etifwa ko-Down syndrome, ohandi kala ndi udite ondjo.”

Ngeenge oto kondjo nomaliudo okukala u udite uhe na ekwafo ile u udite etimba, didilika kutya oshi li paushitwe okukala u udite ngaho. Kasha li elalakano laKalunga okukala hatu vele. (Genesis 1:27, 28) Ka li a shita ovadali va tambule ko noupu oshinima osho shihe li paushitwe. Onghee hano, oshi li paushitwe okukala u udite nai eshi okaana koye kehe na oukolele. Otashi pula efimbo opo u finde omaliudo a tya ngaho nokutambula ko onghalo ipe.

Ongahelipi ngeenge oto lipe oushima omolwounghundi wokaana koye? Dimbuluka kutya kape na oo e shii lelalela kutya omaufyuululwakwatya, omudingonoko nosho yo oinima ikwao ohai kumu ngahelipi oukolele wokaana. Kakele kaasho, otashi dulika u kale to pe kaume koye kopahombo ombedi. Henuka onghalo ya tya ngaho. Oshiwa okulongela kumwe nakaume koye kopahombo nokuyandja elitulemo kokufila oshisho okaana keni. — Omuudifi 4:9, 10.

EETEPO: Shiiva onghalo yokaana koye. Ombibeli oya ti: “Eumbo tali dikwa nomayele ndee tali pamekwa neendunge.” — Omayeletumbulo 24:3.

Oto dulu okupula ouyelele muhapu keendokotola dopaunamiti odo di na owino nokulesha moishangomwa i shii okulineekelwa. Okulihonga shi na sha nonghalo yokaana koye okwa faafana nokulihonga nawa elaka lonhumba lipe. Pehovelo, otashi dulika shi kale shidjuu, ndele oto ke shi shiiva ashike.

Carlo naMia ovo va tumbulwa metetekelo, ova li va konga ouyelele kundokotola wavo nosho yo kehangano limwe olo li shii nawa onghalo yomonamati wavo. Ova ti: “Osho kasha li ashike she tu kwafela tu ude ko omaupyakadi oo tu na okuteelela, ndele osha kwatela mo yo okulihonga kombinga yoinima oyo omunhu oo e na omukifi hau ifanwa Down syndrome ta dulu okuninga. Otwa mona kutya omonamati wetu ota dulu okukala nonghalamwenyo i li nawa. Osho osha li she tu hekeleka neenghono.”

Otashi dulika u kale u udite kutya eenghono doye adishe ohadi pwile ashike mokufila oshisho okaana koye oko taka vele. Jenney, omudalakadi umwe wokoNew Zealand okwa ti: “Omido dinini okudja eshi nda mona kutya omonamati wange ota vele unene, ngeenge nda li handi kendabala okulonga oilonga imwe yomeumbo onda li handi kala nda loloka neenghono nohandi hovele okulila.”

Eshongo likwao olo kutya otashi dulika u kale u udite ouwike. Ben oku na omonamati oo e na omukifi weenhumba tadi fipatele hau ifanwa muscular dystrophy nosho yo o-Asperger’s syndrome. Ben okwa ti: “Ovanhu vahapu kave na efiku va ude ko kutya otu li monghalo ya tya ngahelipi.” Otashi dulika wa halelela okulombwela umwe omaliudo oye. Ndele molwaashi ookaume koye vahapu ounona vavo ove na oukolele, otashi dulika u kale to ongaonga oku va lombwela omaliudo oye.

EETEPO: Pula ekwafo nokukala ho li tambula ko ngeenge to li pewa kuvamwe. Juliana oo a tumbulwa metetekelo, okwa dimina a ti: “Omafimbo amwe ame nomushamane wange ohatu kala twa fya ohoni okupula ekwafo.” Ndele okwa weda ko a ti: “Otwe lihonga kutya otwa pumbwa ekwafo lavamwe. Ngeenge vamwe ve tu kwafela ihatu kala vali tu udite owike neenghono.” Ngeenge kaume kopofingo ile oshilyo shoukwaneumbo oshe ku pula shi kale nokaana koye poshivilo shonhumba shomalihafifo ile pokwoongala kwopaKriste, tambula ko ekwafo la tya ngaho nolupandu. Eyeletumbulo limwe lOmbibeli ola ti: “Okaume oku hole alushe, nomumwaina omulumenhu ta dalwa, a kwafe moluhepo.” — Omayeletumbulo 17:17.

Fila oshisho oukolele woye. Ngaashi ashike otuwa yo-Ambulansa ya pumbwa okutulwa omahooli efimbo nefimbo opo i kale tai twala ovanaudu koshipangelo, naave ou na okukala ho kongo eenghono mokukala ho li oikulya tai tungu, okuninga omalideulo nokukala ho fuwa sha wana opo u dule okutwikila okukala to file oshisho nawa okaana koye. Javier, oo e na omonamati woshingudu okwa ti: “Omonamati wange iha dulu okweenda, onghee hano, ohandi kendabala okulya nawa molwaashi aame eemhadi daye.”

Ongahelipi to dulu okumona efimbo opo u dule okufila oshisho oukolele woye? Ovadali vamwe ohava ningi omalufo okufila oshisho okaana kavo. Ngeenge umwe e li nokaana mukwao oha fuwa po ile a kale ta file oshisho eemhumbwe damukwao dopalutu. Opo u dule okumona efimbo lokufila oshisho oukolele woye, ou na okuteta mo oinima oyo inai fimana nonande kashipu. Ndele ngaashi omudalakadi wokoIndia, Mayuri, a ti, “xuuninwa, oto ka kala wa ikilila.”

Popya nakaume koye oo e shii okulineekelwa. Nokuli nookaume koye ovo vehe na ounona tava vele otava dulu oku ku hekeleka. Oto dulu yo okwiilikana kuJehova  Kalunga. Mbela eilikano ohali kwafele ngoo shili? Yazmin oo e na ounona vavali ve na omukifi hau ifanwa cystic fibrosis okwa ti: “Ope na efimbo limwe olo nda li handi kala ndi udite nda wililwa po neenghono nohandi kala ashike ndi udite nda fa handi hale okufya.” Ndele okwa weda ko a ti: “Ohandi ilikana kuJehova a hekeleke nge nokupameka nge. Opo nee ohandi kala vali ndi na omukumo wokupula komesho.” — Epsalme 145:18.

Ouvela wokaana otau dulu okukuma onghalo youkwaneumbo ngeenge tashi uya poikulya oyo i na okuliwa, opo u na oku ka talela po nonokutya ovadali ove na okukala efimbo li fike peni nokaana keshe. Naasho ohashi ningifa ounona vakwao va kale ve udite vehe niwe ko nasha navo. Kakele kaasho, ovadali otava dulu okukala ashike tava file oshisho okaana kavo oko taka vele ndele tava dimbwa okuyandja elitulemo kekwatafano lavo lopahombo. Lionel, xe omudali wokoLiberia okwa ti: “Omafimbo amwe omukulukadi wange oha ti kutya oye ashike a humbata omutengi aushe nonokutya nghi na ko nasha lela nomonamati wetu. Ohandi kala ndi udite kutya ina fimaneka nge nomafimbo amwe ohandi mu nyamukula nai.”

EETEPO: Shilipaleka ounona aveshe kutya ou na ko nasha navo, nokukala ho unganeke oinima yonhumba oyo tava dulu okuhafela. Jenney oo a popiwa metetekelo okwa ti: “Omafimbo amwe ohatu ningile omonamati wetu woshiveli oinima ye likalekelwa, nokuli nande oku ka lya ashike omusha pamwe korestaulanda oyo e hole.”

Opo mu kaleke po ohombo yeni, omu na okukala hamu popi nokwiilikana pamwe nakaume koye kopahombo. Aseem, xe omudali wokoIndia oo omonamati e na oshinhona okwa ti: “Nonande ame nomukulukadi wange omafimbo amwe ohatu kala twa loloka neenghono notwa nyemata, otwe litulila po efimbo lokukundafana nokwiilikana pamwe. Ongula keshe, fimbo ounona vetu inava penduka, ohatu kundafana pamwe ovelishe yonhumba okudja mOmbibeli.” Ovalihomboli vamwe ohava kundafana fimbo inava ka nangala. Eenghundafana deni nosho yo omailikano taa di komutima otaa ka pameka ohombo yeni pefimbo olo lidjuu neenghono. (Omayeletumbulo 15:22) Ovalihomboli vamwe ova ti: “Ihatu dimbwa nandenande monghalamwenyo yetu efimbo olo twa li monghalo idjuu neenghono.”

Ombibeli oya udaneka kutya mafiku Kalunga ota ka xulifa po omikifi adishe nosho yo omaulema aeshe oo haa hange ovakulunhu nounona. (Ehololo 21:3, 4) Mefiku olo, “onakukala mo nande umwe ta ti: Aame oshingone.” b — Jesaja 33:24.

Onghee hano, nonande okaana koye oke na oulema oto dulu okupondola. Carlo naMia ovo va tumbulwa metetekelo ova ti: “Ino teka omukumo ngeenge eenghalo otadi monika da finda kowii. Molwaashi ope na oinima ihapu iwa kombinga yokaana koye, oyo u kala to yandje elitulemo kuyo.”