Ovanhu omamiliyona ova halelela okuya meulu ngeenge ova fi. Jesus okwa ti kutya ovayapostoli vaye ovadiinini omo tava ka kala. Fimbo ina fya, okwa li e va udanekela kutya ote ke va longekidila onhele vo naXe womeulu. — Lesha Johannes 14:2.

Omolwashike ovanhu vamwe vokombada yedu tava ka nyumunwa va ka kale meulu? Oshike tava ka ninga mo? Jesus okwa lombwela ovayapostoli vaye kutya otava ka ninga eehamba notava ka pangela kombada yedu. — Lesha Lukas 22:28-30; Ehololo 5:10.

Moilongo ihapu, ovanhu ashike vanini hava pangele. Molwaashi Jesus ota ka nyumunina ovanhu omwenyo womeulu opo va ka pangele edu alishe, ovo tava hoololwa ove na okukala ashike omuvalu munini. (Lukas 12:32) Ombibeli oya popya kondadalunde kutya ovanhu vangapi tava ka pangela naJesus. — Lesha Ehololo 14:1.

Ovo tava i meulu havo aveke tava ka pewa ondjabi. Ovapangelwa ovadiinini vOuhamba waJesus otava ka hafela omwenyo uhe na exulilo moparadisa kombada yedu. (Johannes 3:16) Vamwe otava ka ya mOparadisa konima eshi va xupa mehanauno longhalelo ei yoinima youkolokoshi. Vamwe otava ka ya mo konima eshi va nyumunwa. — Lesha Epsalme 37:29; Johannes 5:28, 29.