Oshi li ngoo pandunge eshi David a li e na elineekelo kutya Kalunga ote mu file oshisho? Kalunga oku na ko ngoo nasha naave? Ovanhu vahapu ohava mono shidjuu okwiitavela kutya Kalunga omunaenghono adishe oku na ko nasha navo. Omolwashike?

Etomheno limwe ololo kutya Kalunga okwa tumbala neenghono e dule ovanhu vongaho. Omolwondodo yaye ya tumbala, oiwana aishe oya fa ashike “eta limwe melila lehemele nongaashi okandwi moshiyelekifo.” (Jesaja 40:15) Omushangi womambo umwe wokunena omukembauli okwa fika pexulifodiladilo kutya, “itashi kwafa sha okwiitavela kutya oku na Kalunga oo e na ko nasha shili naave pauhandimwe.”

Shimwe vali, vamwe ove udite kutya elihumbato lavo ola ningifa Kalunga a kale ehe na ko nasha navo. Pashihopaenenwa, omulumenhu umwe womido dopokati wedina Jim okwa ti: “Ohandi ilikana pandjikilile opo ndi kale ndi na ombili nelipangelo, ashike diva ile konima ashike yefimbo, ohandi kwatwa ashike kehandu. Lwanima onda ka fika pexulifodiladilo kutya ame omukolokoshi filufilu nonokutya Kalunga ita dulu okukwafela nge.”

Mbela Kalunga oku li kokule neenghono novanhu noita dulu okuyandja elitulemo kuvo? Oku uditile naanaa ngahelipi oishitwa yaye inai wanenena? Kape na omunhu ta dulu okupopila ko Kalunga monghedi ya yuka nokunyamukula omapulo oo nopehe na ekwafo laYe. Ashike etumwalaka laKalunga la nwefwa mo olo a pa ovanhu, Ombibeli, otali tu shilipaleke kutya ke li kokule nafye noku na ko nasha nafye pauhandimwe. Ombibeli oya ti: “Oye ina kala kokule nafye nande oumwe.” (Oilonga 17:27) Moitukulwa ine tai landula, ohatu ka kundafana osho Kalunga e tu lombwela shi na sha nokunakonasha kwaye novanhu pauhandimwe nonghee a li a ulikila ovanhu ngaashi ove kutya oku na ko nasha navo.