OMOLWASHIKE VAMWE VE LI MOMALIMBILILO: Nokuli nonande ovanhu vamwe ova pumbwa ehekeleko neenghono, ove udite kutya otashi ulike oikala yokuliholamwene okupula Kalunga a ninge po sha noku va kwafele va ungaunge nomaupyakadi. Omukainhu wedina Raquel okwa ti: “Ngeenge handi tale komuvalu aushe wovanhu mounyuni nokomaupyakadi a kwata moiti oo va taalela, omalipulo ange ohaa monika a fa ongaho nomolwaasho ohandi ongaonga okupula Kalunga a kwafele nge.”

OSHO EENDJOVO DAKALUNGA TADI HONGO: Kalunga okwa katuka onghatu nale monghedi ididilikwedi opo a kwafele nokuhekeleke ovanhu. Keshe umwe kombada yedu kunena okwa fyuulula oulunde, oo hau tu imbi okukala metwokumwe noiteelelwa yaKalunga monghedi ya wanenena. Ashike Kalunga okwa “kala e tu hole nokwa tuma Omona waye a ninge ekulilo lomatimba etu.” (1 Johannes 4:10) Okupitila mefyo laJesus lopayambo, Kalunga okwe shi ninga tashi shiiva opo tu diminwe po omatimba, tu kale tu na eliudo la yela neteelelo lomwenyo waalushe mounyuni mupe wombili. a Ndele mbela eyambo olo ola yandjwa ashike omolwouwa wovanhu aveshe ve li ongudu, ile otali ulike ngoo kutya Kalunga oku na ko nasha naave pauhandimwe?

Diladila komuyapostoli Paulus. Ekuliloyambo laJesus ola li le mu kuma neenghono nomolwaasho a shanga ta ti: ‘Ondi nomwenyo mokwiitavela Omona waKalunga, ou e hole nge nokwe liyandja ponhele yange.’ (Ovagalati 2:20) Oshoshili kutya Jesus okwa fya ofimbo nokuli Paulus ina ninga Omukriste. Ashike Paulus okwa li a tala ko ekuliloyambo olo li li oshali oyo a pewa pauhandimwe kuKalunga.

Efyo laJesus lopayambo oli li yo oshali oyo wa pewa kuKalunga pauhandimwe. Oshali oyo otai holola kutya Kalunga okwe ku tala ko u na ondilo shi fike peni. Otai ku pe “ehekeleko laalushe neteelelo liwa,” nokungaho, otai ku “pamekele meendjovo adishe diwa nomoilonga aishe iwa.” — 2 Ovatessaloniki 2:16, 17.

Ashike, paife opa pita omido hanga 2 000 okudja eshi Jesus a yamba po omwenyo waye. Oumbangi ulipi tau ulike kutya Kalunga okwa hala u kale u na ekwatafano naye kunena?