Omido donhumba eshi nda li okaana, oukwaneumbo wetu owa li hau kala popepi naLeipzig, muGermany lokOushilo, lwopeengaba daCzech naPolish. Eshi nda wanifa eedula 6, oukwaneumbo wetu owa li wa tembukila koBrasilia nolwanima okoEcuador molwaashi tate oko a li a ka longela.

Eshi nda wanifa eedula 14, onda li nda tuminwa komuhandjo kofikola i li koGermany. Onda li ndi na okulifila oshisho molwaashi ovadali vange ova li kokule koAmerika lokOlukadi. Onda hovela okukala nde lineekela unene mwaame mwene. Kanda li lela handi lipula kutya eenghatu dange ohadi kumu ngahelipi vamwe.

Eshi nda wanifa eedula 17, ovadali vange ova li va alukila koGermany. Tete onda li handi di meumbo lavo. Ndele oikala yange youkakombolilifa oya li ye shi ninga shidjuu okudulika kuvo. Nomolwaasho, eshi nda wanifa omido 18, onda tembuka mo meumbo.

Onda li nda lulilwa, nda hala okushiiva elalakano longhalamwenyo. Konima eshi nda konakona eenghedi dokukalamwenyo nomahangano e lili noku lili, onda li nda tomhwa kutya onghedi ya denga mbada omo handi dulu okulongifa onghalamwenyo yange oyo okukonakona opulaneta oku tu li iwaiwa ofimbo ovanhu inave i hanauna po.

Onda li nda landa omota ndele handi di mo muGermany, nda finda koAfrika. Ashike konima yefimbo lixupi, onda li nda alukila koEuropa ndi pangelife omota yange. Konima yaasho, onda ka ya komunghulofuta waPortugal. Onda li nda tokola okweefa po manga okushinga omota nokulilandela po ombautu oyo ndi kale handi longifa.

Onda li nde limbwanga mumwe nongudu yovanyasha ovo va li tave lilongekida okutaulula Efuta laAtlantic. Umwe womuvo, Laurie, okwa ka ninga omukulukadi wange. Tete otwa ya fiyo okounhunhu vaKaribia. Nokonima eshi twa kala moPuerto Rico oule wokafimbo, otwa shuna koEuropa. Otwa li twa hala okulikongela po oshikepa omo tu kale hatu di. Ndele konima eshi twa konga oule weemwedi 3, ondungediladilo yetu oya li ya iwa moshipala. Onda li nda fininikilwa metangakwaita laGermany.

Onda kala oule wodula neemwedi 3 metangakwaita lomomeva laGermany. Pefimbo opo, fye naLaurie otwa hangwa twa hombola notwa li twa hala okutwikila nokukalamwenyo kwetu kwokuya momalweendo. Diva fimbo inandi ya moukwaita, otwa li twa  landa olumbubu loshikepa. Ofimbo nda li moukwaita, olumbubu olo otwa li twe li ninga okashikepa kanini. Otwa li twa diladila okukala omo hatu di nokutwikila okukonakona opulaneta ei iwaiwa. Konima eshi nda dja mo moukwaita, ashike ofimbo inatu mana okupangela okashikepa ketu, Eendombwedi daJehova oda li de tu talela po notwa li twa hovela okukonakona Ombibeli.

Potete kanda li ndi wete nda pumbwa okuninga omalunduluko mahapu monghalamwenyo yange. Onda li nda hombola nondi li pamwe nomukulukadi wange, nokanda li vali handi shili omakaya. (Ovaefeso 5:5) Shi na sha nokutavakana ounyuni, onda li handi diladila kutya okukonakona eshito laKalunga likumwifi oko onghedi ya denga mbada omo hatu dulu okulongifa onghalamwenyo yetu.

Ndele paushili wo vene, onda li nda pumbwa okuninga omalunduluko, naunene tuu momaukwatya ange. Molwaashi okwa li ndi na unene ounhwa nonde lineekela mwaame mwene, onda li nde lineekela filufilu mokudula kwange nomwaasho nda pondola. Onda li nda pitifa komesho ouwa wange mwene.

Fiku limwe, onda li nda lesha Eudifo lokOmhunda laJesus olo li shiivike nawa. (Mateus etukulwa 5-7) Tete onda li nda kuminwa oinima oyo Jesus a ti oyo tai etele omunhu elao. Pashihopaenenwa, okwa ti ovanelao ovovo va fya ondjala nenota. (Mateus 5:6) Okwa li handi lipula kutya omunhu ngeenge oku na omhumbwe ota dulu ngahelipi okukala omunelao. Eshi nda twikila okukonakona, onda ka mona kutya atusheni otu na omhumbwe yopamhepo, ashike otu na tete okudimina nelininipiko kutya otu na omhumbwe oyo fimbo inatu i wanifa po. Osho oshi li metwokumwe neendjovo daJesus odo kutya: “Ovanelao ovovo ve shii omhumbwe yavo yopamhepo.” — Mateus 5:3, NW.

Konima eshi twa hovela ekonakonombibeli moGermany, fye naLaurie otwa li twa tembukila koFransa nolwanima okoItali. Keshe oko twa li twa ya otwa mona ko Eendombwedi daJehova. Onda li nda kuminwa ohole yado yashili yokuholafana noukumwe wado. Onda li nda mona kutya Eendombwedi odi li shili oumwainafana womounyuni aushe. (Johannes 13:34, 35) Mokweendela ko kwefimbo, fye naLaurie otwa ka ninginifwa tu li Eendombwedi daJehova.

Konima yokuninginifwa onda twikila okulundulula omaukwatya ange. Fye naLaurie otwa li twa tokola okushuna noshikepa twa finda komunghulofuta waAfrika nokutavakana Efuta laAtlantic twa finda kOilongo ya Hangana. Naashi twa li ofye atuke vavali kokashikepa ketu kanini twa dingililwa komeva oo a kwata oshinano sheekilometa omayovi opo ashike nde ke shi didilika mo kutya ame omunhu wongaho okuyelekanifa nOmushiti wetu a tumbala. Onda li ndi na efimbo lihapu molwaashi mokati kefuta nghi na lela eshi kwa li handi ningi, onghee hano, luhapu onda li handi lesha Ombibeli. Onda li unene tuu nda kuminwa omahokololo kombinga yokukalamwenyo kwaJesus kwokombada yedu. Jesus okwa li omunhu a wanenena e na okudula kuhapu, ndele nande ongaho, ka li he likongele efimano. Ka li ha kongo ouwa waye mwene ndele okwa li a pitifa Xe womeulu komesho.

Eshi nda dilonga koshihopaenenwa shaJesus, onda li nda mona kutya onda pumbwa okupitifa komesho Ouhamba waKalunga monghalamwenyo yange ponhele yokukala nda pitifa komesho oinima imwe i lili noku lili. (Mateus 6:33) Lwanima eshi fye naLaurie twa ka fika kOilongo ya Hangana, otwa li twa tokola okuxulifa po omalweendo etu nokuyandja elitulemo kelongelokalunga letu.

Nale eshi nda li nda pitifa komesho ouwa wange kanda li handi kala nda limbililwa omatokolo ange. Ndele paife onda mona odjo younongo washili oyo tai wilike nge. (Jesaja 48:17, 18) Ondi shii yo elalakano longhalamwenyo olo kwa li ndihe shii nale, olo kutya, okulongela Kalunga nokukwafela vamwe ve lihonge kombinga yaye.

Fye naLaurie otwa pameka neenghono ekwatafano letu tu li ovalihomboli eshi twa tula moilonga omafinamhango Ombibeli. Otwa nangekwa yo noupuna nokamonakadona kawa, oko ke shii noke hole Jehova.

Oinima inai kala alushe tai tu endele nawa. Ashike kekwafo laJehova, otwa tokola toko tuha sholole notuha kanife elineekelo letu muye. — Omayeletumbulo 3:5, 6.