Cameron: Onda hafa eshi twa shakena vali Jon. Ohandi hafele alushe ekonakonombibeli letu lokoshivike. * Ou li nawa ndi shii?

Jon: Heeno, ondi li nawa.

Cameron: Onda hafa okuuda kutya ou li nawa. Oshikando sha dja ko otwa li twa kundafana kutya omolwashike Eendombwedi daJehova da itavela kutya Ouhamba waKalunga owa hovela okupangela mo 1914. * Ngaashi twa kundafanene, otwa mona oumbangi wa fimana u na sha nexunganeko olo li li muDaniel etukulwa 4. Mbela oto dimbuluka osho sha popiwa mo?

Jon: Otamu popiwa ondjodi yohamba Nebukadnesar i na sha nomuti wa kula.

Cameron: Osho naanaa. Mondjodi yaye, Nebukadnesar okwa li a mona omuti wa kula u na oitai ya twa keulu. Okwa uda ondaka yomweengeli waKalunga tai ti kutya omuti nau tetwe po, ndele oshifidi nomidi dao nadi fyaale medu. Konima ‘yomafimbo 7,’ omuti otau ka kula vali. * Otwa li yo twa kundafana kutya omolwashike exunganeko eli li na omawanifo opavali. Mbela oto dimbuluka ewanifo lotete lexunganeko olo?

Jon: Tete ola li la wanifilwa Nebukadnesar yemwene, hasho mbela? Okwa li a ninga omunananghwengu oule womido 7.

Cameron: Osho naanaa. Nebukadnesar okwa li a ninga omunananghwengu pakafimbo, kungaho epangelo laye ola li la iwa moshipala. Ashike, ewanifo linene lexunganeko olo osheshi epangelo laKalunga lokombada yedu la li tali ka iwa moshipala oule womafimbo 7. Ngaashi twa mona, omafimbo a-7 okwa hovela eshi Jerusalem sha hanaunwa po mo 607 K.O.P. Okudja opo, kapa li vali eehamba kombada yedu odo da li hadi kalele po Jehova Kalunga mokupangela oshiwana shaye. Pexulilo lomafimbo a-7, Kalunga okwa li ta ka nangeka po Omupangeli mupe oye a pangele oshiwana shaye, ashike pomhito oyo oumwe womeulu. Noitya imwe, ohatu dulu okutya exulilo lomafimbo a-7 ola didilikwa eshi epangelo laKalunga, Ouhamba womeulu wa hovela okupangela. Otwa kundafana nale kutya omafimbo 7 okwa hovela naini. Onghee hano, ngeenge otwa shiiva kutya okwa li taa ka kwata efimbo li fike peni, opo ashike hatu ka mona kutya Ouhamba waKalunga owa hovela okupangela nai. Otu li ngoo pamwe ndi shii?

Jon: Eshi wa endulula ngaho owa kwafela nge vali ndi dimbuluke osho twa kundafanene.

Cameron: Eewa. Natu hovele neenghundafana detu nokutala kutya omafimbo a-7 oku na oule u fike peni. Opo ashike nda mane okulesha oshikundafanwa eshi opo ndi dule okudimbuluka oitwa ya fimana.  Ohandi ka kendabala oku i ku yelifila ngaashi handi dulu.

Jon: Oshili nawa.

Cameron: Mewanifo lexunganeko lotete olo la kwatela mo Nebukadnesar, omafimbo a-7 okwa li taa ulike komido 7 do vene. Ndele ewanifo linene olo la wanifilwa Ouhamba waKalunga, omafimbo a-7 oku na okukala efimbo lile neenghono li dule omido 7 do vene.

Jon: Omolwashike to tile ngaho?

Cameron: Shimwe vali, dimbuluka kutya omafimbo a-7 okwa hovela eshi Jerusalem sha hanaunwa po mo 607 K.O.P. Ngeenge otwa valula okudja momudo oo, omido 7 do vene otadi tu twala fiyo opomudo 600 K.O.P. Ashike momudo oo kamwa li mwa ningwa sha shididilikwedi shi na sha nepangelo laKalunga. Kakele kaasho, ngaashi twa kundafana nale, eshi Jesus a li kombada yedu konima yomafelemido okwa li a ulika kutya omafimbo a-7 kaa li natango a xula.

Jon: Osho naanaa. Paife ohandi dimbuluka.

Cameron: Onghee hano, omafimbo a-7 ponhele yokukala e lile po omido do vene, okwa kwatela mo efimbo lile.

Jon: Efimbo li fike peni?

Cameron: Embo lOmbibeli lEhololo olo la popya oinima tai tu kumwe nembo laDaniel, otali tu kwafele tu mone filufilu kutya omafimbo a-7 oku na oule u fike peni. Otashi ulike kutya omafimbo atatu netata oku na oule womafiku 1 260. * Kungaha, omafimbo aheyali oku na okukala omafiku oo a indjipalekwa luvali, osho tashi ke ku pa omafiku 2 520. Fiyo opapa otu li ngoo pamwe ndi shii?

Jon: Heeno, otu li pamwe. Ashike nghi wete kutya ongahelipi osho tashi ulike kutya Ouhamba waKalunga owa hovela okupangela mo 1914.

Cameron: Eewa, natu tale vali ngeenge ope na ekwatafano. Omafimbo amwe ngeenge tashi uya pamaxunganeko Ombibeli, efiku limwe ohali ulike komudo. * Ngeenge otwa longifa omhango yokuvalula efiku limwe li fike pomudo umwe, osha yela kutya omafimbo a-7 oku na oku tu pa omido 2 520. Ngeenge otwa valula okudja mo 607 K.O.P. okuyuka komesho, omido 2 520 otadi tu twala ko 1914. * Osho sha enda ngaho opo tu mone kutya mo 1914 omo Jesus a hovela okupangela eli Ohamba yOuhamba waKalunga konima yomafimbo a-7 eshi a xula. Shididilikwedi, okudja mo 1914 mounyuni omwa li mwa holoka oiningwanima inene oyo ya xunganekwa kOmbibeli kutya otai ka didilikifa mo omafiku axuuninwa.

Jon: Oiningwanima oyo ongaashi shike?

Cameron: Tala kwaasho Jesus a popya muMateus 24:7. Jesus okwa li a tumbula osho tashi ka ningwa shimha a hovele okupangela meulu, a ti: ‘Oiwana otai fikamene oiwana, noshilongo otashi fikamene oshilongo, otaku di omakakamo edu keembinga neembinga nondjala tai uya.’ Didilika kutya Jesus okwa xunganeka kutya otapa ka holoka ondjala nomakakamo edu pefimbo olo. Okudja mefelemido la pita mounyuni omwa li mwa holoka omaupyakadi mahapu a tya ngaho, hasho mbela?

Jon: Osho.

Cameron: Movelishe ei, Jesus okwa li a xunganeka yo kutya pefimbo lokukala po kwaye e li Ohamba yOuhamba waKalunga otapa ka holoka oita. Ombibeli mEhololo oya xunganeka kutya itai ka kala ashike oita yopashiwana ndele oita oyo tai ka kuma ounyuni aushe pefimbo lexulilo. * Mbela oto dimbuluka kutya oita yotete younyuni oya tameka naini?

 Jon: Omo 1914, momudo oo wa popya kutya Jesus omo a hovela okupangela. Inandi diladila nale kutya ope na ekwatafano la tya ngaho.

Cameron: Ngeenge otwa tula kumwe ouyelele aushe ou, exunganeko li na sha nomafimbo a-7 nosho yo omaxunganeko makwao Ombibeli e na sha nefimbo lexulilo, otaa tu kumwe filufilu. Eendombwedi daJehova oda tomhwa kutya Jesus okwa hovela okupangela eli Ohamba yOuhamba waKalunga mo 1914, nonokutya omafiku axuuninwa omo a hovela momudo oo. *

Jon: Natango ohandi kendabala okuuda ko ouyelele aushe ou.

Cameron: Osho oshi shii okuudiwa ko. Ngaashi nda popya metetekelo, naame osha pula nge olule opo ndi ude ko nawa ouyelele oo. Ashike, onde lineekela kutya eenghundafana detu ode ku kwafela u mone kutya nonande Ombibeli inai popya kondadalunde omudo 1914, Eendombwedi daJehova oda kanghamekela eitavelo lado li na sha nomudo oo kOmishangwa.

Jon: Osho naanaa, ohandi kala nde ku kuminwa alushe shi na sha naasho, molwaashi keshe osho ho popi osha kanghamena komishangwa. Kashi fi ashike omadiladilo oye, nonande okwa li handi lipula kutya omolwashike sha kitakana. Omolwashike Kalunga ine tu yelifila ashike okupitila mOmbibeli kutya Jesus ota ka hovela okupangela meulu okudja mo 1914?

Cameron: Epulo loye oliwa shili, Jon. Oshoshili kutya ope na oinima ihapu oyo ya futama pamishangwa. Ndele omolwashike Kalunga a shangifa Ombibeli monghedi oyo tai pula eenghendabala opo ovanhu ve i ude ko? Ongahelipi ngeenge onde uya tu kundafane kombinga yaasho oshikando tashi landula?

Jon: Osho otashi ka kala shiwa.