“Keshe osho wa hala ndi ku ningile shiivifile nge ashike, ohandi ka kala nda hafa oku shi ninga.” Otashi dulika u ongaonge okulombwela omunhu oo uhe shii nande onale ile omushiivikile wahamakasha eendjovo odo. Ashike otashi dulika to ka kala wa manguluka oku di lombwela kaume koye kopofingo. Oshi li paushitwe kookaume kopofingo okuningilafana oinima.

Ombibeli otai ulike kutya Jehova oha ningile alushe ovalongeli vaye osho tashi va etele ehafo. Pashihopaenenwa, ohamba David, oyo ya li ya hafela ekwatafano lopofingo naye oya ti: “Oilonga inene Ove wa longa, Omwene, Kalunga kange, noikumifi yoye neemhangela kufye . . . ndele yo ihapu, itai [dulu] okuvalwa.” (Epsalme 40:6) Kakele kaasho, Jehova oha ningile ouwa nokuli naavo inave mu shiiva, ha ‘yadifa omitima davo oipalwifa nehafo.’ — Oilonga 14:17.

Molwaashi Jehova oha kala a hafa ngeenge ta longele ouwa vamwe, oshi shii okuudiwa ko okukala a teelela ovo va hala okukala ookaume kaye va kale hava longo osho tashi ‘hafifa omutima waye.’ (Omayeletumbulo 27:11) Ndele oshike u na okuninga kondadalunde opo u hafife Kalunga? Ombibeli otai nyamukula tai ti: “Inamu dimbwa okulonga ouwa nokutukula muayo mu i kwete, osheshi omayambo a tya ngaha Kalunga e a hokwa.” (Ovaheberi 13:16) Ndele mbela osho osha hala kutya okulonga ouwa nokutukulilafana navamwe osho ashike sha pumbiwa opo tu hafife Jehova?

Ombibeli oya ti: “Kape na ou ta dulu okuwapalela Kalunga, [ngeenge] kape neitavelo.” (Ovaheberi 11:6) Shididilikwedi, Abraham ‘okwa ka ifanwa kaume kaKalunga’ konima eshi a “itavela Kalunga.” (Jakob 2:23) Jesus Kristus naye okwa divilika kutya osha fimana ‘okwiitavela muKalunga’ ngeenge otwa hala okuhafela omanangeko noupuna aKalunga. (Johannes 14:1) Ndele ongahelipi to dulu okukala neitavelo olo Kalunga a teelela kwaavo ta nanene kuye? Tameka okukala ho konakona pandjikilile Eendjovo daKalunga, Ombibeli. Osho otashi ke ku kwafela u ‘shiive ehalo laye’ noto ke lihonga nghee u na oku mu ‘hafifa muaishe.’ Opo nee, eshi eshiivo loye lashili lokushiiva Jehova tali hapupala nokutula moilonga oiteelelwa yaye youyuki oyo we lihonga, otashi ka pameka eitavelo loye muye nota ka ehena popepi naave shi dulife nale. — Ovakolossi 1:9, 10.