Metivali lomafiku 11 Aprili, Ovakriste vahapu ovo inave lipyakidila vali otave ke uya kEdimbuluko. Navo ova li va hovela okutondoka mefiyafanepo lomwenyo ndele tava sholola omolwomatomheno onhumba, oo amwe omuo a kundafanwa mokambo Alukila kuJehova. (Heb 12:1) Ashike nande ongaho, ove na ondilo koshipala shaJehova, oo e ve lilandela nohonde yOmona waye. (Oil 20:28; 1Pet 1:18, 19) Ongahelipi hatu dulu oku va kwafela va alukile keongalo?

Ovakulunhuongalo ohava kongo omhito opo va kwafele Ovakriste ovo inave lipyakidila vali ngaashi ashike omufita oo ha kongo eedi odo da fiya po oshiunda. (Luk 15:4-7) Osho otashi ulike kutya Jehova omunahole nokunakonasha. (Jer 23:3, 4) Atusheni otu na okutwa omukumo ovanhu ovo inave lipyakidila vali ndele havakulunhuongalo ashike. Eenghendabala odo hatu ningi opo tu va ulikile onheni ohadi hafifa Jehova nohatu ka mona ondjabi. (Omayel 19:17; Oil 20:35) Onghee hano, lipula kutya oolyelye to ka twa omukumo nopehe na okwoongaonga.

TALENI OKAVIDIO TWA OMUKUMO OVO INAVE LIPYAKIDILA VALI, NDELE TAMU KUNDAFANA OMAPULO TAA SHIKULA:

• Eenghatu dilipi Abbey a katuka konima eshi a shakeneka Ondombwedi oyo ehe shii nale?

• Omolwashike tu na okupopya novakulunhuongalo ngeenge ohatu diladila okukwafela umwe oo ine lipyakidila vali?

• Abbey okwa li e lilongekida ngahelipi opo a ka talele po Laura oshikando oshitivali?

• Abbey okwa ulika ngahelipi elididimiko nosho yo ohole eshi a li ta kendabala okutwa Laura omukumo?

• Oshike hatu lihongo mefaneko laJesus olo tali hangwa muLukas 15:8-10?

• Omanangekonoupuna elipi Abbey a mona eshi a kala nokuninga eenghendabala opo a kwafele Laura?