Jakob okwa li e shii kutya Jehova okwa wana okulongelwa oye aeke nonande ka li natango a yandja omhango oyo ya kelela okulongela oikalunga. (Ex 20:3-5) Onghee hano, konima eshi Jehova a li e mu lombwela a shune kuBetel, Jakob okwa li a lombwela keshe oo a li pamwe naye a ekeleshi oihongwafano yaye. Jakob okwa li a hanauna po oihongwafano, mwa kwatelwa outenda vomomatwi ovo va li hava djalwa ve li onga oiketi. (Gen 35:1-4) Nopehe na omalimbililo, Jehova okwa li a hafela eenghatu daJakob.

Pefimbo letu, ongahelipi hatu dulu okulongela Jehova oye aeke? Otu na okuhenuka oshinima keshe osho shi na ekwatafano noikalunga ile noumhulile. Osho osha kwatela mo okweekelashi oshinima keshe shi na ekwatafano noumhulile nosho yo okukonakona nawa omalihafifo etu. Pashihopaenenwa, lipula kutya: ‘Mbela ohandi hafele okulesha omambo ile okutala eemuvi odo hadi ulike oinima ngaashi oifalakanena, oishitukila ile oinima i na eenghono di dule dopaushitwe? Mbela omalihafifo ange okwa kwatela mo oinima oyo tai ulike kutya oumhulile, oulodi nokufinga ovanhu inai nyika oshiponga?’ Otu na okukala kokule noshinima keshe osho Jehova e tonde. — Eps 97:10.

TALENI OKAVIDIO “KONDJIFENI ONDIABOLI,” NDELE TAMU KUNDAFANA OMAPULO TAA SHIKULA:

• Oupyakadi ulipi wa holoka monghalamwenyo yomukonakonimbiibeli wedina Palesa?

• Omolwashike shi li pandunge okukonga ekwafo kovakulunhuongalo ngeenge ope na umwe a kufa ombinga moumhulile?

• Ovo va hala Jehova e va amene ove na okumanguluka ko filufilu kushike?

• Palesa okwa katuka onghatu yopandunge ilipi?

• Omeenghedi dimwe dilipi to dulu okuhenuka enwefemo leendemoni moshitukulwa sheni?