Ngaashi ashike Jehova a li a unganeka Ovaisrael, okwa unganeka yo oshiwana shaye kunena opo shi longe ehalo laye. Mounyuni aushe, oitaimbelewa, oikandjo, omaongalo neengudu doilonga yomomapya, otava longele kumwe aveshe opo onghundana iwa i udifwe. Ohatu udifile ovanhu aveshe, mwa kwatelwa naavo hava popi elaka limwe li lili. — Eh 14:6, 7.

Mbela owa diladila ngoo nale okulihonga elaka limwe opo u kwafele vamwe ve lihonge oshili? Nokuli nonande ku na efimbo lokulihonga elaka limwe li lili, oto dulu okulongifa epandja lo JW Language u lihonge etwalemo li li paunafangwa. Ngeenge owe li longifa moukalele, naave oto ka kala wa hafa ngaashi Ovakriste vomefelemudo lotete ovo va li va hafa eshi ovanhu vokoitukulwa imwe va li va kumwa eshi va uda ‘oinenelonga yaKalunga’ momalaka avo vene. — Oil 2:7-11.

TALENI OKAVIDIO NINGA KAUME KAJEHOVA — UDIFA MELAKA LOSHINAILONGO, NDELE TAMU KUNDAFANA OMAPULO TAA SHIKULA:

• Onaini to dulu okulongifa epandja lo JW Language?

• Oinima imwe ilipi i li ko JW Language?

• Omalaka elipi haa popiwa kovanhu vomoshitukulwa sheni?

• Oshike u na okuninga po ngeenge omunhu oo a ulika ohokwe metumwalaka lOuhamba oha popi elaka limwe li lili? — od 100-101 okat. 39-41