Omolwashike u na okukendabala u kale ho lombwele ovadali voye omaliudo oye wa manguluka? (Omayel 23:26) Omolwaashi Jehova okwe va pa oshinakuwanifwa va kale tave ku file oshisho nokukala tave ku pe ewiliko. (Eps 127:3, 4) Itashi ka kala shipu kuvo oku ku kwafela ngeenge owe va holeke omalipulo noisho yoye aishe. Kakele kaasho, ito ke lihonga sha moimoniwa tai kwafa oyo va mona monghalamwenyo yavo. Ndele mbela osha puka okukala ino lombwela vamwe kombinga yoinima yonhumba? Hasho naanaa, shimha ashike ito lombwele ovadali voye oipupulu. — Omayel 3:32.

Ongahelipi to dulu okupopya novadali voye? Kendabala okuhoolola efimbo olo tali mu wapalele amushe. Ngeenge osho oshidjuu, oto dulu okushangela omudali umwe onhumwafo, u mu lombwele omaliudo oye. Ndele mbela ongahelipi ngeenge ova hala mu kundafane oshinima osho ino hala okukundafana? Dimbuluka kutya ovadali voye ova halelela oku ku kwafela. Va tala ko ve li ovakwafi voye, ndele hangaashi ovatondi. Ngeenge owa ningi eenghendabala u kale ho kundafana novadali voye wa manguluka, otashi ke ku etela ouwa monghalamwenyo yoye aishe, noto ka mona omwenyo waalushe. — Omayel 4:10-12.

TALENI OKAVIDIO EFIMBO LOUNYASHA WANGE — ONGAHELIPI HANDI DULU OKUPOPYA NOVADALI VANGE?, NDELE TAMU KUNDAFANA OMAPULO TAA SHIKULA:

• Esther naPartik ova li va didilika shike shi na sha navo vene?

• Oshike to dulu okulihonga koshihopaenenwa shaJesus?

• Ovadali voye ova ulika ngahelipi kutya ove na ko nasha naave?

• Omafinamhango Ombiibeli elipi taa dulu oku ku kwafela u kale ho popi novadali voye?