Opaasa yaJesus ya xuuninwa oya li tai ka kala ididilikwedi. Molwaashi okwa li e li pokufya, okwa li a ninga omalongekido opo a lye ouvalelo wOpaasa pamwe novayapostoli vaye, nokudika po edano lipe lokomudo, Ouvalelo wOmwene. Onghee okwa li a tuma Petrus naJohannes va ka longekide onduda omo tave ke i danena. (Luk 22:7-13; tala efano kombada yokafo.) Osho otashi tu dimbulukifa kutya otwa pumbwa okulilongekidila Edimbuluko olo tali ka kala ko mo 27 Marsa. Omaongalo otashi dulika a ninga omalongekido e na sha nomupopi, omadidiliko nosho tuu. Ndele mbela oshike osho tu na okuninga pauhandimwe opo tu lilongekidile Edimbuluko?

Longekida omutima woye. Lesha nokudilonga kelesho lOmbiibeli li na sha nEdimbuluko. Elandulafano li na sha nelesho lOmbiibeli otali hangwa mokambo Konakona Omishangwa keshe efiku. Opo u mone elandulafano le lixwa po, tala mokambo Okalongifwambo kokukonakona Eendjovo daKalunga etukulwa 16. (Tala yo okafo kaAprili 2020 Onghalamwenyo yoPakriste noilonga yokuudifa.) Omaukwaneumbo otaa dulu okumona ouyelele oo tava dulu okulongifa pelongelokalunga loukwaneumbo wavo u na sha nanghee ekuliloyambo la fimana, mokutala mo-Watch Tower Publications Index ile Melongifwambo lokukonga omauyelele moishangomwa yEendombwedi daJehova.

Shiva vamwe ve uye va ongale pamwe nafye. Kufa ombinga pauyadi moshikonga shokushiva ovanhu. Diladila kombinga yaavo to dulu okushiva, ngaashi omalishuneko, ovakonakonimbiibeli vonale, ovashiivikile nosho yo ovapambele. Ovakulunhuongalo ove na okushilipaleka kutya ova shiva ovo inave lipyakidila vali. Dimbuluka kutya ngeenge omunhu ke li moshitukulwa sheni, oto dulu okumona efimbo nonhele opo Edimbuluko tali ka ningilwa moshitukulwa shavo. Inda ko jw.org pepandja lopehovelo, ndele to findi opo pa shangwa KOMBINGA YETU, opo nee to findi opo pa shangwa “Edimbuluko.”

Oshike vali tu na okuninga opo tu lilongekide?