Jesus okwa li a dula okuudifila omukainhu Omusamaria molwaashi okwa li a hovela eenghundafana naye. Ongahelipi hatu dulu okuxwepopaleka ounghulungu wetu ngeenge hatu hovele eenghundafana novanhu ovo tuhe shii?

• Popya monghedi youkaume eshi to popi novanhu. Nonande Jesus okwa li a loloka, okwa li a hovela eenghundafana mokupula ashike omeva okunwa. Oto dulu okuhovela mokupopifa nohamu, ndele to popi kombinga yonghalo yomhepo ile kombinga yoshinima vali shimwe. Kaleka momadiladilo kutya elalakano letu okuhovela eenghundafana, onghee hano popya kombinga yoshinima osho omunhu e na ohokwe musho. Ngeenge ina ulika ohokwe, ino sholola. Kendabala okupopya vali naumwe. Pula Jehova e ku pe ouladi. — Neh 2:4; Oil 4:29.

• Kendabala okukonga omhito u popye kombinga yonghundana iwa, ashike ino kala wa endelela. Kaleka eenghundafana paushitwe. Ngeenge ino lungama, otashi dulika omunhu a handuke, ndele ta xulifa po eenghundafana. Ino nyemata ngeenge eenghundafana oda xulu ofimbo ino mona omhito yokuyandja oundombwedi. Ngeenge oho kala wa tila okupopya kombinga yonghundana iwa, kendabala okuhovela eenghundafana nopehe na elalakano lokuyandja oundombwedi. [Dana nokukundafana vokavidio 1.]

• Kendabala okukonga omhito yokuyandja oundombwedi mokupopya tashi di komutima kombinga yeitavelo loye, notashi dulika shi linyengife omupwilikini a pule a yelifilwe. Jesus okwa li a popya kombinga yoshinima shihokwifa osho sha ningifa omukainhu a pule omapulo. Eshi a li ta nyamukula omapulo omukainhu oo, okwa li ta popi kombinga yonghundana iwa. [Dana nokukundafana okavidio 2, ndele to dana vali okavidio 3 noku ka kundafana.]