• ODULA OMO A DALWA: 1941

• OSHILONGO OMO A DALELWA: BENIN

• ONAKUDIWA: A LI A HOMBOLA OMBADA NOKWA LI HA PATANEKE EENDOMBWEDI DAJEHOVA

ONGHALAMWENYO YANGE YONALE:

Onda dja muCotonou, oshilando shinene muBenin. Onda putukila mongeleka yaKatolika, ashike kanda li handi i kongeleka pandjikilile. Ovakatolika vahapu ovo va li moshitukulwa shetu ova li ve na ovakulukadi vahapu, molwaashi okuhombola ombada osha li paveta pefimbo opo. Naame lwanima, onda ka hombola ovakainhu vane.

Eshi pa li pa holoka ongudu yomahololodiladilo mo 1970 nasha, onda li handi diladila kutya otai ka etela oshilongo ouwa. Onda li handi i yambidida pauyadi nonda hovela okukufa ombinga moinima yopapolitika. Ongudu yomahololodiladilo oya li i tonde Eendombwedi daJehova molwaashi kada li hadi kufa ombinga moinima yopapolotika. Onda li umwe womwaavo hava hepeke Eendombwedi. Eshi Eendombwedi dovatumwa da li da tewa mo moshilongo mo 1976, onda li nda tomhwa kutya itadi alukile mo vali.

NGHEE OMBIBELI YA LUNDULULA ONGHALAMWENYO YANGE:

Ehololomadiladilo ola xula mo 1990. Onda li nda kumwa eshi ovatumwa vEendombwedi va alukila mo moshilongo. Onda li nda hovela okudiladila kutya kashiimba Kalunga oku li pamwe novanhu ava. Pefimbo opo, onda li handi ka longela konhele imwe. Omulongi pamwe naame mupe okwa li Ondombwedi, nokwa li a hovela oku tu udifila. Okwa ulikila nge eevelishe dOmbiibeli odo tadi holola kutya Jehova oKalunga kohole nomuyuki. (Deuteronomion 32:4; 1 Johannes 4:8) Omaukwatya oo okwa li a kuma nge. Onda li nda hala okulihonga shihapu kombinga Jehova, onghee onda li nda tambula ko ekonakonombiibeli.

Lwanima, onda li nda hovela okuya kokwoongala kwEendombwedi daJehova. Onda li nda kuminwa ohole yavo eshi nda mona kutya kave na okatongo koukwamuhoko, ile kopanghalafano. Eshi nda kala handi endafana nEendombwedi, onda li ndi shi liwetele mo kutya ovo va li ovashikuli vashili vaJesus. — Johannes 13:35.

Onda li nda mona kutya opo ndi longele Jehova, onda pumbwa okufiya po ongeleka yaKatolika. Osho kasha li shipu kwaame okuninga, molwaashi onda li nda tila kutya vamwe otave ke shi tila ngahelipi. Konima yomido donhumba, kekwafo laJehova, okwa pa nge ouladi nonda li nda dja mo mongeleka oyo.

Ashike opa li elunduluko imwe linene olo nda li nda pumbwa okuninga. Eshi nda konakona Ombiibeli, onde lihonga kutya Kalunga ina hokwa okuhombola ombada. (Genesis 2:18-24; Mateus 19:4-6) Momesho aye, ohombo yange yotete oyo ashike ya li ya fimana. Onghee, onda li nda shangifa ohombo yange oyo paveta, ndele handi lekele ovakulukadi vange vakwao, nokuunganeka va kale tava mono eemhumbwe davo dopainiwe. Lwanima, ovakulukadi vange vavali vonale ova li va ninga Eendombwedi daJehova.

OUWA OO NDA MONA:

Nonande omukulukadi wange okwa twikila okukala Omukatolika, okwa fimaneka etokolo lange lokulongela Jehova. Atushe otu wete kutya onda ninga omushamane e li xwepo.

Onda li handi diladila kutya ohandi dulu okuxwepopaleka eenghalo domoshitukulwa shetu okupitila mopolotika, ashike eenghendabala odo oda li doshimha. Paife ondi wete kutya Ouhamba waKalunga oo ashike u li ekandulepo lomaupyakadi ovanhu. (Mateus 6:9, 10) Ohandi pandula neenghono Jehova eshi a ulikila nge nghee handi dulu okukala nda hafa shili monghalamwenyo.

• ODULA OMO A DALWA: 1977

• OSHILONGO OMO A DALELWA: BRAZIL

• ONAKUDIWA: OMUFITA WONGELEKA YOPENTEKOSTE

ONGHALAMWENYO YANGE YONALE:

Onda putukila komunghulo woshilando Itu, moSão Paulo State. Moshitukulwa osho, omwa li mwa shiivikila ominyonena dihapu.

Onda li handi longifa eenghono unene nokanda li nda koshoka paenghedi. Kakele kaasho, onda li handi kufa ombinga mokupitifa oingangamifi. Lwanima, onda li nda didilika kutya onghalamwenyo ya tya ngaho otai twalifa nge modolongo ile ndi fye, onghee onda li nde i efa po. Opo nee onda li nda ya mongeleka yOpentekoste, ndele lwanima handi ningi omufita.

Onda li ndi udite kutya ohandi dulu okukwafela shili ovanhu okupitila mokuudifa kwange mongeleka. Onda li nokuli handi udifa moprograma koradio yomoshitukulwa, nokungaho onda li nda shiivika nawa momudingonoko. Ndele onda ka didilika kutya ongeleka aishe kai na ko nasha nonghalonawa yoilyo yayo, nokaya li nokuli i na ko nasha nokufimaneka Kalunga. Onda li ndi wete kutya ongeleka otai lalakanene ashike okulikola oimaliwa. Onda li nda tokola okufiya po ongeleka oyo.

NGHEE OMBIIBELI YA LUNDULULA ONGHALAMWENYO YANGE:

Eshi nda hovela okukonakona Ombiibeli nEendombwedi daJehova, onda li nda mona okudja pehovelo kutya oda yooloka ko komalongelokalunga amwe. Opa li oinima ivali ya kumwifa nge. Shotete, Eendombwedi daJehova ihadi popi ashike kutya odi hole Kalunga nosho yo ovanhu vakwao, ndele ohadi shi ulike. Oshitivali, ihadi kufa ombinga meepolotika ile moita. (Jesaja 2:4) Oinima oyo ivali oya tomha nge kutya onda mona elongelokalunga lashili, ondjila ya finana oyo tai twala komwenyo waalushe. — Mateus 7:13, 14.

Onda li nda didilika kutya ngeenge onda hala okuhafifa Kalunga, onda pumbwa okuninga omalunduluko manene. Onda li nda pumbwa okuyandja elitulemo lihapu koukwaneumbo wange. Onda li yo nda pumbwa okukala omulininipiki neenghono. Kasha li shipu okuninga omalunduluko oo a pumbiwa, ashike kekwafo laJehova, onda pondola. Omukulukadi wange okwa li a kuminwa omalunduluko oo. Okwa li a hovela okukonakona Ombiibeli tete kwaame, ndele paife okwa ninga exumokomesho meendelelo. Diva otwa li twa mona kutya atushe otwa hala okuninga Eendombwedi daJehova. Atushe otwa li twa ninginifwa mefiku limwe.

OUWA OO NDA MONA:

Ame nomukulukadi wange otwa hafa eshi twa kwafela ounona vetu vatatu va pange oukaume wopofingo naJehova. Oukwaneumbo wetu owa hafa. Ohandi pandula Jehova eshi a nanena nge koshili oyo tai hangwa mEendjovo daye, Ombiibeli. Ohai lundulula shili onghalamwenyo yovanhu. Ame ondi li oumbangi waasho.

• ODULA OMO A DALWA: 1957

• OSHILONGO OMO A DALELWA: AUSTRALIA

• ONAKUDIWA: ONDA PITA MEENGHALO DIDJUU ESHI NDA LI OKAANA

ONGHALAMWENYO YANGE YONALE:

Onda kulila moNewcastle, koNew South Wales. Otwa dalwa tu li vaheyali, ame oshiveli. Tate oha longifa eenghono noku li ongholwe, ofimbo meme naye ha longifa eenghono. Meme okwa li ha hepeke nge palutu noku ula nge omalaka mai. Okwa li ha lombwele nge alushe kutya ame omunhu mwii nohandi ka pya moheli. Omatilifo a tya ngaho okwa li haa tilifa nge neenghono.

Meme okwa li ha denge nge nokumonifa nge oshiponga, naasho osha li hashi faulifa nge luhapu kofikola. Eshi nda li ndi na omido 11, onda li nda kufwa po povadali vange nokutwalwa konhele yepangelo, nolwanima okongeleka. Eshi nda wanifa omido 14, onda li nde livaka mo monhele oyo. Kanda li nda hala okushuna keumbo, onghee onda kala handi di momapandavanda aKings Cross, moshitukulwa shaSydney.

Eshi nda li handi di momapandavanda, onda li nda hovela okulongifa oingangamifi, okunwa omalodu, okutala omafano oipala nokuninga ombwada. Oshimoniwa shimwe osha li sha tilifa nge neenghono. Onda li handi di monhele yamwene wokalaba umwe. Konguloshi imwe, opa li pe uya ovalumenhu vavali ve uya oku mu talela po. Okwa li a lombwela nge ndi ye konduda yokunangala, ashike onda li ndi udite eenghundafana davo. Mwene wokalaba okwa li ta ningi omalongekido opo a landife nge po kovalumenhu ovo. Ova li va udafana kutya otava holeke nge meendongelwa doshikepa nokutwala nge koJapan ndi ka longe mombaa. Onda li nda tila neenghono, ndele handi nuka mekende londuda nokufaduka po ndi ka konge ekwafo.

Onda li nda shakena nomulumenhu oo a li ta talele po moSydney, nonda li nde mu yelifila onghalo yange, handi diladila kutya pamwe ota pe nge oimaliwa. Ponhele yaasho, okwa li a shiva nge konhele oko ha kala opo ndi ke likoshe nokulya sha. Shihokwifa, inandi dja po vali puye. Konima yodula, otwa ka hombola.

NGHEE OMBIIBELI YA LUNDULULA ONGHALAMWENYO YANGE:

Eshi nda hovela okukonakona Ombiibeli nEendombwedi daJehova, onda li handi kwatwa komaliudo e lili noku lili. Onda li nda handuka eshi nde lihonga kutya Satana oye omweetifi wowii, molwaashi onda kala handi hongwa alushe kutya Kalunga oye he tu ningifa tu kale hatu mono oixuna. Onda li ndi udite nda pepelelwa eshi nde lihonga kutya Kalunga iha handukile ovanhu moku va tula moheli, ehongo olo la kala hali tilifa nge neenghono omido adishe odo.

Onda li nda kuminwa nghee Eendombwedi hadi ningi omatokolo a kanghamena komafinamhango Ombiibeli. Ohadi kala metwokumwe neitavelo lado. Onda li handi tu eemhata, ashike kashi na nee mbudi kutya onda popya ile onda ninga shike, Eendombwedi oda li hadi ungaunga naame nohole nosho yo nefimaneko.

Eshongo lange linene olo nda kala handi kondjo nalo, okukala ndi udite ndihe na oshilonga. Onda kala ndi udite ngaho oule wefimbo, nokonima eshi nda ninginifwa ndi li umwe womEendombwedi daJehova. Onda li ndi shii kutya ondi hole Jehova, ashike onda li nda tomhwa kutya ke na efiku a kale e hole omunhu ngaashi ame.

Onda li nda lundulula omadiladilo ange konima yomido 15 okudja eshi nda ninginifwa. Moshipopiwa shimwe osho sha li tashi yandjwa mOlupale lOuhamba lEendombwedi daJehova, omupopi okwa li a kundafana Jakob 1:23, 24. Eevelishe odo oda faafanifa Eendjovo daKalunga nesipili omo hatu dulu okulitala ko ngaashi Jehova he tu tale ko. Onda li nda hovela okulipula kutya osho nde litala ko mbela osha yooloka ko kwaasho Jehova e wete mwaame. Potete, kanda li nda hala oku shi itavela. Onda li ndi udite kutya itandi dulu okuteelela Jehova a kale e hole nge, molwaashi oshihapu unene.

Konima yomafiku manini, onda li nda lesha omushangwa oo wa lundulula onghalamwenyo yange. Ovelishe oyo oya li muJesaja 1:18, omo Jehova a tofwa mo ta ti: ‘Tu yeni tu ka hokololeni . . . Omatimba eni nande naa tilyane ngaashi ohonde, otaa ka toka ngaashi outokele weemhawe.’ Onda li ndi udite Jehova a fa ta popi naame ta ti: “Vicky ila u hokololele nge. Ondi ku shii, ondi shii omatimba oye, ondi wete osho shi li momutima woye nondi ku hole.”

Onguloshi oyo inandi dula okukofa. Onda li ndi na natango omalimbililo kutya Jehova oku hole nge ngoo, ashike onda li nda hovela okudiladila kombinga yekuliloyambo laJesus. Lwanima, onda ka mona kutya Jehova okwa kala te lididimikile nge efimbo lile, eshi a ulikila nge kutya oku hole nge meenghedi dihapu. Ndele, onda fa ashike nda li handi mu lombwele kutya: “Ohole yoye kainene itai fiki ko kwaame. Eyambo lOmona woye inali wana okukufa po omanyono ange.” Osha fa ashike nda li handi shunifile Jehova ekuliloyambo laye. Ashike paife, eshi handi ndi dilonga koshali yekuliloyambo, onda hovela okukala ndi udite kutya Jehova oku hole nge.

OUWA OO NDA MONA:

Ondi udite nda koshoka, ndi na omwenyo nohandi hafele onghalamwenyo. Ohombo yange oya xwepopala, nonda hafa eshi handi dulu okulongifa oshimoniwa shange ndi kwafele vamwe. Paife ohandi hovele okukala ndi udite nda ehena popi elela naJehova.

• ODULA OMO A DALWA: 1974

• OSHILONGO OMO A DALELWA: RUSSIA

• ONAKUDIWA: OMUSHIKI WEENGALO ODO HADI NINGI OMAWEELELO NEENGHONO

ONGHALAMWENYO YANGE YONALE:

Onda dalelwa moVotkinsk, omo mwa dalelwa omutoti womaimbilo a fimana wedina Pyotr Ilich Tchaikovsky. Oukwaneumbo wetu owa li wa hepa. Tate okwa li e na omaukwatya mawa mahapu, ashike okwa li ongholwe, nomolwaasho meumbo omwa li hamu kala alushe muhe na ombili.

Kanda li handi lihongo nawa, nokonima yeedula, onda li ndi udite ndihe na oshilonga. Onda li nde litongola ko kovanhu, nokanda li nde lineekela vamwe. Onda li handi kala ndi na ostresa ngeenge handi i kofikola. Pashihopaenenwa, ngeenge nda li ndi na okuyandja olaporta, luhapu kanda li handi dulu okuyelifa nokuli nomautumbulilo mapu oo handi dulu okupopya omafimbo amwe. Eshi nda dja mondodo onhihetatu, odjapo yange oya li ya shangwa ngaha: “Okwa ngabekwa moitya, iha dulu okupopya omadiladilo aye.” Eendjovo odo oda li da teya nge omukumo noda ningifa nge ndi kale ndi udite ndihe na oshilonga neenghono. Onda li nda hovela okulipula kombinga yelalakano longhalamwenyo yange.

Eshi nda li ndi na eedula omulongo nasha, onda li nda hovela okunwa oikunwa yoalkoholi. Potete, onda li handi kala ndi udite nawa ngeenge nda nwa. Ngeenge nda li nda nwa shihapu, eliudo lange ola li hali nyenyetele nge. Onghalamwenyo yange oya li ya fa ihe na eityo. Onda li nda polimana neenghono, nomafimbo amwe kanda li handi piti mo meumbo oule womafiku. Onda li nda hovela okudiladila okulidipaa.

Eshi nda wanifa eedula 20, onda li nda mona epepelelo lopakafimbo. Onda li nda shiiva eengalo odo hadi ningi omaweelelo neenghono. Omusika oyo oya li ya ndjange ka nge, nonda konga ovo have i pwilikine. Onda li nda kulika eexwiki dange, handi tyuulwa momatwi nokudjala ngaashi ovashiki veengalo ovo nda lenga. Mokweendela ko kwefimbo, onda ka kala ndi na oikala yokuhenakonasha nonda ninga omuhandunhu, naluhapu onda li handi tanguna noukwaneumbo wetu.

Onda li nda diladila kutya okupwilikina keengalo odo hadi ningi omaweelelo neenghono otashi ka etela nge ehafo, ndele inashi etela nge ehafo. Osha li sha lundulula nge. Eshi nda li nda uda oinima imwe ii oyo hai ningwa kovashiki veengalo ovo nda fimaneka, onda li ndi wete nda kengelelwa.

Natango onda li nda diladila okulidipaa, nopomhito ei onda li nda tokola shili. Oshinima osho sha ya nge moshipala oshosho kutya onda li nda diladila nghee tashi ka kuma meme. Okwa li e hole nge neenghono, nokwa ningila nge oinima ihapu. Onghalo oya li idjuu neenghono. Kanda li vali nda hala okukala momwenyo, ashike kanda li handi dulu okulidipaa.

Opo ndiha yandje elitulemo kwaasho, onda li nda hovela okulesha oishangomwa yOshirussia yelaka lomufika wopombada. Onda li nda lesha ependafule limwe la longa mongeleka. Ombadilila, onda li ndi udite nda hala okuningila sha Kalunga nosho yo ovanhu vakwetu. Onda li nda mbubulila Kalunga omutima wange meilikano, oshinima osho inandi ninga nande onale. Onda pula Kalunga a ulikile nge nghee handi dulu okukala nonghalamwenyo i na elalakano. Eshi nda li handi ilikana, onda li ndi udite nda pepelelwa neenghono. Ndele osho sha li shi kumwifa neenghono, oshosho sha ka ningwa po konima yaasho. Konima ashike yeevili mbali, peumbo letu opa li pa kongholwa kOndombwedi yaJehova imwe, ndele tai pula nge ndi konakone Ombiibeli. Onda li ndi wete kutya olo ola li enyamukulo leilikano lange. Olo ola li efiku lotete monghalamwenyo yange nda hafa.

NGHEE OMBIIBELI YA LUNDULULA ONGHALAMWENYO YANGE:

Nonande osha li shidjuu neenghono, onda li nda ekelashi oinima aishe oyo nda li ndi na i na ekwatafano neengalo odo handi ningi omaweelelo. Ashike eengalo odo oda kala momadiladilo ange oule wefimbo. Ngeenge nda li handi ende ponhele tapa shikwa eengalo odo, osha li hashi dimbulukifa nge diva onakudiwa. Kanda li nda hala okulumbakanifa oinima ii yomonakudiwa noinima iwa oyo paife tai mene omidi momadiladilo nomomutima wange. Onghee onda li handi henuka eenhele da tya ngaho. Ngeenge nda li handi kwatwa keamo lokudiladila kombinga yonakudiwa yange, onda li handi ilikana nda mana mo. Okuninga ngaho okwa kwafela nge ndi kale ndi na “ombili yaKalunga oyo i dule eendunge adishe.” — Ovafilippi 4:7.

Eshi nda konakona Ombiibeli, onde lihonga kutya Ovakriste ove na oshinakuwanifwa shokuudifila vamwe kombinga yeitavelo lavo. (Mateus 28:19, 20) Onda li nda itavela kutya kandi na efiku ndi ninge ngaho. Mokweendela ko kwefimbo, oinima ipe oyo nda li handi lihongo oya etela nge ehafo linene nosho yo ombili yokomutima. Onda li ndi shii kutya vamwe ova pumbwa yo okulihonga kombinga yoshili oyo. Nonande onda li ndi na oumbada, onda li nda hovela okulombwela vamwe kombinga yaasho handi lihongo. Onda li nda kumwa molwaashi okulombwela vamwe kombinga yOmbiibeli, osha ningifa nge ndi kale ndi na omukumo. Osha findila yo eitavelo lipe momutima wange.

OUWA OO NDA MONA:

Paife otwa hafa mohombo yetu, nonda hafa eshi nda kwafela ovanhu vahapu ve lihonge kombinga yOmbiibeli, mwa kwatelwa okandenge kange nameme. Okulongela Kalunga nokukwafela vamwe ve lihonge kombinga yaye osha kwafela nge ndi kale ndi na onghalamwenyo i na eityo.