Okudja eshi Samuel a li okamatyona, okwa kala ha di noha longo ketwalihangano, oko ovanhu va li hava i va ka longele Jehova. Mbela ou shii kutya osha enda ngahelipi opo Samuel a kale ha di metwalihangano? Tete natu ude kombinga yaHanna, meme waSamuel.

Oule wefimbo, Hanna okwa li a halelela okumona nande okaana kamwe, ashike ka li ha mono ounona. Onghee hano, okwa li a ilikana kuJehova a mana mo. Okwa li a udaneka kutya ngeenge okwa dala okaana okamati, ote ke ka twala ketwalihangano laJehova oko ka kale haka di nokulonga. Jehova okwa li a uda eilikano laHanna, opo nee Hanna okwa ka dala okaana okamati. Okaana oko okwe ka luka Samuel. Eshi Samuel a wanifa eedula nhatu ile nhee lwaapo, Hanna okwe mu twala ketwalihangano opo a ka kale ta longele Kalunga ngaashi naanaa a li a udaneka.

Pefimbo opo, Eli oye a li omupristeri omukulunhu metwalihangano. Eli okwa li e na ovanamati vavali ovo navo va li hava longo yo ketwalihangano. Dimbuluka kutya etwalihangano ola li onhele yokulongela Kalunga, novanhu ovo hava longo oko ova li ve na okukala ve na elihumbato liwa. Ashike ovanamati vaEli ova li hava ningi oinima ii neenghono. Samuel okwa li he va mono eshi tava ningi ngaho. Mbela Samuel naye okwa li ha ningi oinima ii ngaashi ovanamati vaEli?— Hasho nandenande. Okwa kala ta longo osho sha yuka, ngaashi naanaa a hongwa kovadali vaye.

Mbela oto diladila kutya Eli okwa li e na okuninga po shike kombinga yovanamati vaye vavali?— Okwa li e na oku va handukila. Okwa li yo e na oku va ta mo metwalihangano laKalunga vaha kale tava longo mo vali. Molwaashi Eli ina ninga po sha, Jehova okwa li e mu handukila nosho yo ovanamati vaye vavali. Jehova okwa li a tokola oku va katukila onghatu.

Fiku limwe konguloshi, fimbo Samuel a li a nangala, okwa uda omunhu te mu ifana ta ti: ‘Samuel!’ Opo nee okwa lotokela kuEli, ndele Eli okwa ti: ‘Inandi ku ifana ame.’  Osho osha ningwa vali lwoikando ivali. Eshi sha ningwa oshikando oshititatu, Eli okwa lombwela Samuel kutya ngeenge okwa udu vali ondaka tai mu ifana na tye ashike: ‘Jehova popya, ohandi pwilikine.’ Samuel osho a ninga. Opo nee Jehova okwa ti kuye: ‘Lombwela Eli kutya ohandi ka handukila oukwaneumbo waye omolwoinima ii oyo tava ningi.’ Mbela eshi wa tala osha li ngoo shipu kuSamuel okulombwela Eli etumwalaka la tya ngaho?— Ahowe, kasha li shipu. Nande Samuel okwa li a tila, okwa ninga naanaa ngaashi Jehova e mu lombwela. Osho Jehova a popya osha ka wanifwa. Ovana vaEli ova ka dipawa, na Eli okwa ka fya yo.

Samuel okwe tu tulila po shili oshihopaenenwa shiwa. Okwa li ha longo osho sha yuka nonande okwa li ha mono vamwe tava ningi oinima ii. Ongahelipi shi na sha naave? Mbela naave owa hala okukala ho longo osho sha yuka ngaashi Samuel? Ngeenge owa kala to ningi ngaho, oto ka hafifa Jehova nosho yo ovadali voye.