‘Diinineni eendjovo dange’

“Ngeenge omwa diinine eendjovo dange, nye ovahongwa vange shili, notamu ka shiiva oshili, noshili otai ke mu mangulula.” — JOHANNES 8:31, 32.

Osho tashi ti: Outumbulilo “eendjovo” daJesus owa hala okutya omahongo aye, oo haa di kodjo inene. Jesus okwa ti: “Tate ou a tuma nge okwa lombwela nge osho ndi na okupopya naasho ndi na okuhonga.” (Johannes 12:49) Eshi a li ta ilikana kuXe womeulu, Jehova Kalunga, okwa ti: “Eendjovo doye odo oshili.” Okwa li ha tofa luhapu mEendjovo daKalunga opo a yambidide ehongo laye. (Johannes 17:17; Mateus 4:4, 7, 10) Onghee hano, Ovakriste vashili ohava ‘diinine eendjovo daye,’ sha hala okutya, ove di tambula ko di li Eendjovo daKalunga, Ombiibeli, di li “oshili” nodi li ekanghameno leitavelo lavo nosho yo oilonga yavo.

Nghee Ovakriste votete va kala metwokumwe noshili: Omushangi wOmbiibeli Omukriste, Omuyapostoli Paulus, okwa popya shi na sha nanghee Jesus a li a fimaneka Eendjovo daKalunga. Okwa shanga a ti: “Omishangwa adishe oda nwefwa mo kuKalunga, notadi dulu okuhonga.” (2 Timoteus 3:16) Ovalumenhu ovo hava nangekwa po va honge Ovakriste vakwao, ‘ehongo lavo oli na okukala la kanghamena keendjovo di shii okulineekelwa.’ (Titus 1:7, 9) Ovakriste votete ova li va ladipikwa va henuke ‘omahongo opanhu nosho yo omatomhafano oipupulu oo a kanghamena keenghulunghedi dovanhu nokomadiladilo oo taa dana onghandangala mounyuni, ndele hakuKristus.’ — Ovakolossi 2:8

Oolyelye hava ningi ngaho kunena?: She likolelela kembo lo-Vatican ledina Dogmatic Constitution on Divine Revelation, olo la li hali longifwa mo 1965 nola tofwa mo mOkatikisa kOngeleka yaKatolika la ti: “Ongeleka [yaKatolika] ihai likolelele ashike kOmishangwa Diyapuki opo i shiive keshe shimwe osho sha hololwa. Onghee hano, omifyuululwakalo diyapuki nosho yo Omishangwa Diyapuki odi na okutambulwa ko nokufimanekwa shi fike pamwe.” Oshifo shedina Maclean’s osha tofa mo ominista yokoToronto, shaCanada, oyo ya pula ya ti: “Omolwashike twa pumbwa ewi ‘lomuhololimadiladilo’ oo a li ko omayovimido avali a pita e tu wilike? Otu na omadiladilo etu a denga mbada, ashike otaa ngushuluka molwaashi otu na oku a yambidida naJesus nosho yo nOmishangwa.”

O-New Catholic Encyclopedia oya popya shi na sha nEendombwedi daJehova, ya ti: “Oda tala ko Ombiibeli i li odjo yeitavelo lado noi li ewiliko lado.” Efimbo opo la di ko, omulumenhu umwe moCanada okwa li a teta melaka Ondombwedi yaJehova imwe ofimbo ya li tai mu lombwele kutya oyo lyelye. Okwa ulika kOmbiibeli, ndele ta ti: “Ondi mu shii, molwaashi ohamu longifa Ombiibeli.”