“Kaleni mu holafane”

“Ohandi mu pe oshipango shipe kutya kaleni mu holafane, ndele kaleni mu holafane ngaashi ame nda kala ndi mu hole. Kungaho, ovanhu aveshe otava ka shiiva kutya nye ovahongwa vange ngeenge omu holafane.” — JOHANNES 13:34, 35.

Osho tashi ti: Kristus okwa lombwela ovashikuli vaye va kale ve holafane ngaashi a li e va hole. Mbela Jesus okwa li e va hole monghedi ya tya ngahelipi? Okwa li e hole ovanhu aveshe, nonande opa li oukwamuhoko nosho yo okatongo ke na sha novakainhu pefimbo laye. (Johannes 4:7-10) Ohole yaJesus oya li ye mu linyengifa a yambe po efimbo laye, eenghono daye nosho yo ouwa waye opo a kwafele vamwe. (Markus 6:30-34) Xuuninwa, Kristus okwa li a ulika ohole monghedi ya denga mbada. Okwa ti: “Aame omufita muwa; omufita muwa oha yandjele eedi daye omwenyo waye.” — Johannes 10:11.

Nghee Ovakriste votete va li va dulika koshipango shokuholafana: Mefelemudo lotete, Ovakriste ova li have liifana ‘omumwatate’ ile “omumwameme.” (Filemon 1, 2) Ovanhu vomoiwana aishe ova li va tambulwa ko meongalo lopaKriste, molwaashi ova li va itavela kutya “kape na eyooloko pokati kOmujuda nOmugreka. Aveshe ove na Omwene umwe.” (Ovaroma 10:11, 12) Konima yoPentekoste 33 O.P., ovahongwa muJerusalem “ova li va landifa po oinima yavo nokutukulilafana oimaliwa she likolelela keemhumbwe dakeshe umwe.” Mbela ova li ve shi ninga nelalakano lashike? Opo ovo opo va ninginifwa va dule okukala muJerusalem nokutwikila ‘okudiinina ehongo lovayapostoli.’ (Oilonga 2:41-45) Oshike she ve linyengifa va ninge ngaho? Omido 200 lwaapo konima yefyo lovayapostoli, Tertullian okwa ka tofa mo osho vamwe va popya kombinga yOvakriste, a ti: “Kava li tuu ve holafane . . . nova li nokuli ve lilongekida okufya ponhele yavakwao.”

Oolyelye hava ningi ngaho kunena? Embo ledina The History of the Decline and Fall of the Roman Empire (1837) ola popya kutya oule womafelemido, ovo va kala tave liti kutya Ovakriste “ova kala tava hepekafana neenghono, shi dulife osho va li va ningilwa kwaavo vehe fi [ovaitaveli].” Pamakonakono oo opo a ningwa ko U.S, okwa didilikwa kutya ovanhu vahapu ovo ve li momalongelokalunga, vahapu ovo have liti kutya Ovakriste, ove na oukwamuhoko. Ovo hava i kongeleka moshilongo shimwe luhapu ihava kala ve na ko nasha navakwao veitavelo limwe moshilongo shikwao, nokungaho ihava dulu okukwafelafana ile ihava kala ve na ehalo okukwafela ovaitaveli vakwao ngeenge pa holoka omhumbwe.

Mo 2004, konima eshi Florida sha li sha dengwa koikungulu yomhepo inhe ya landulafana, omunashipundi wokomitiye yokuungaunga neenghalo dopaulumomhumbwe okwa li a ninga omakonakono opo a shilipaleke kutya oipumbiwa yavo otai longifwa nawa. Okwa ti kutya Eendombwedi daJehova odo adike da li da unganekwa nawa, nokwa li a popya kutya ota ka yandja oipumbiwa keshe oyo Eendombwedi da pumbwa. Pehovelo lo 1997, ongudu yEendombwedi daJehova di na omiti, oikulya nosho yo oikutu oya li ya ya ko-Democratic Republic of Congo i ka kwafele ovamwaxe Ovakriste nosho yo ovanhu vamwe ovo va li momhumbwe. Eendombwedi dikwao koEuropa oda li da yandja oikwafa i na ongushu yeedola daAmerika emiliyona limwe.