“Kave fi oshitukulwa shounyuni”

“Ounyuni ou va tonde molwaashi kave fi oshitukulwa shounyuni.” — JOHANNES 17:14.

Osho tashi ti: Molwaashi Jesus ka li oshitukulwa shounyuni, kali ha kufa ombinga meenhamanana dopanghalafano nodopapolotika dopefimbo laye. Okwa yelifa a ti: “Ouhamba wange kau fi oshitukulwa shounyuni ou. Ngeno owa li oshitukulwa shounyuni ou, ovashikuli vange ngeno ova lwa opo ndiha yandjwe momake Ovajuda. Ashike Ouhamba wange kau fi womounyuni ou.” (Johannes 18:36) Okwa ladipika yo ovashikuli vaye va henuke oikala, okupopya nelihumbato olo la tokolwa mEendjovo daKalunga. — Mateus 20:25-27.

Nghee Ovakriste vonale va li vehe fi oshitukulwa shounyuni: Pamushangi umwe woinima i na sha nelongelokalunga, Jonathan Dymond, Ovakriste vonale “ova li va anya okuya [moita]; kashi na nee mbudi kutya ova li va hangwa koilanduliko ilipi, kutya nee okushekwa, ile okutulwa modolongo, ile nokuli va dipawe. Ova li va hoolola okumona oixuna ponhele yokunyona po omufika wavo wokuhe na ombinga. Elihumbato lavo nalo ola li yo le va yoolola ko. Ovakriste ova li va lombwelwa kutya: “Ohashi va kumwifa eshi ihamu longo vali owii pamwe navo, nomolwaasho have mu popile mowii.” (1 Petrus 4:4) Omunandjokonona Will Durant okwa shanga a ti kutya “Ovapaani ova li hava kala va kenyanana Ovakriste omolwelihumbato lavo liwa nosho yo etilokalunga.”

Oolyelye hava ningi ngaho kunena? O-New Catholic Encyclopedia oya popya shi na sha nokuhenombinga kwopaKriste ya ti: “Osha puka paenghedi okuhakufa ombinga moita.” Oshitukulwa shi li moshifo shedina Reformierte Presse osha popya kombinga yo-African Rights, ehangano loufemba womunhu, shi na sha nomadipao opamihoko oo a ningilwe moRwanda mo 1994, kutya eengeleka adishe oda kufa ombinga, “kakele kEendombwedi daJehova.”

Eshi kwa li taku kundafanwa omadipao opefimbo laNazi, omuhongi umwe wofikola yopombada okwa ti kutya “kapa li ongudu ile ehangano lonhumba lovakwashiwana la tokola oipupulu, omahepeko nosho yo omadipao.” Konima eshi a ninga ekwatafano no-United States Holocaust Memorial Museum, okwa ti: “Paife onda mona enyamukulo.” Okwa shiiva kutya Eendombwedi daJehova oda li da diinina eitavelo lado nonande oda li tadi hepekwa.

Ongahelipi shi na sha nelihumbato lado? Oshifo shedina U.S. Catholic osha ti kutya “ovakulunhu vahapu veedula dopokati Ovakatolika itava tu kumwe nomahongo ongeleka moinima i na sha nokukala pamwe ovanhu inava hombola nosho yo omilele kondje yohombo.” Oshifo osho osha tofa mo omudiakoni umwe wongeleka, oo a ti: “Eepersenda dihapu dovanhu ovo handi mono, eepersenda 50 lwaapo, ove li nale pamwe fimbo inava ya mohombo.” O-The New Encyclopædia Britannica oya ti kutya Eendombwedi daJehova “ohadi diinine omifikamhango da denga mbada dopaenghedi.”