‘Onghundana ei iwa yOuhamba otai ka udifwa’

“Onghundana ei iwa yOuhamba otai ka udifilwa ounyuni aushe opo ovanhu vomoiwana aishe ve i ude, opo nee exulilo tali uya.” — MATEUS 24:14.

Osho tashi ti: Omushangi wEvaengeli Lukas okwa ti kutya Jesus “okwa ya moilando noilando nosho yo momikunda nomikunda, ta udifa onghundana iwa yOuhamba waKalunga.” (Lukas 8:1) Jesus ye mwene okwa ti: “Ondi na yo okuudifila oilando imwe onghundana iwa yOuhamba waKalunga, molwaashi eshi osho nda tuminwa.” (Lukas 4:43) Okwa li a tuma ovahongwa vaye va ka udife onghundana iwa moilando nomomikunda, nolwanima okwa li e va lombwela a ti: “Otamu ka yandja oundombwedi kombinga yange . . . kombada yedu alishe.” — Oilonga 1:8; Lukas 10:1.

Nghee Ovakriste votete va li va udifa: Ovahongwa vaJesus ova li va ninga diva ngaashi Jesus e va lombwela. Ombiibeli oya ti: “Ova twikila efiku keshe okuhonga ovanhu noku va udifila onghundana iwa kombinga yaKristus Jesus motembeli nosho yo eumbo neumbo nopehe na okusholola.” (Oilonga 5:42) Aveshe meongalo ova li va kufa ombinga mokuudifa. Omunandjokonona Neander okwa ti kutya “Celsus, omushangi wotete oo a li omhinge nOukriste, okwa li a yemba oushili oo kutya, ovanailonga vomundele, ovahondji veenghaku, ovalongi voipa, ovanhu ovo inava hongwa novongaho ve dulike kovanhu aveshe, ova li ovaudifi vevaengeli ovaladi.” Jean Bernardi okwa shanga membo laye ledina The Early Centuries of the Church, a ti: “[Ovakriste] ova li ve na okuya noku ka popya keshe pamwe nosho yo nakeshe umwe. Momapandavanda nomoilando, meenhele daaveshe nomomaumbo. Kutya nee otava tambulwa ko ile hasho. . . . Fiyo okominghulo dounyuni.”

Oolyelye hava ningi ngaho kunena? Omupristeri waAnglican wedina David Watson okwa ti: “Okudopa kwongeleka okuudifa nokuhonga ye litula mo osho sha ninga ovanhu va kale vehe na ohokwe mokulongela Kalunga kunena.” José Luis Pérez Guadalupe okwa popya membo laye ledina Why Are the Catholics Leaving? kombinga yoilonga yovaudifi vEvaengeli nomalongelokalunga amwe a ti kutya “ihava i eumbo neumbo.” Ndele okwa popya kombinga yEendombwedi daJehova a ti: “Ohadi i eumbo neumbo tadi shi ningi noukeka.”

Jonathan Turley okwa popya oshinima shihokwifa noshi li paushili moshishangomwa shedina Cato Supreme Court Review, 2001-2002 a ti: “Ngeenge owa tumbula Eendombwedi daJehova, ovanhu vahapu ohava diladila diva kovaudifi tave uya komaumbo avo peevili itadi wapalele. Keendombwedi daJehova, okuudifa eumbo neumbo kaku fi ashike okuxumifa komesho eitavelo lado, ndele oku li oshitukulwa sha fimanenena sheitavelo lado.”

Mbela owa didilika ngoo ovo ve na edidiliko olo?

She likolelela koiteelelwa yopaMishangwa oyo ya kundafanwa moitukulwa ei ya pambafana, mbela oolyelye kunena to diladila kutya ove na edidiliko lOvakriste vashili? Nonande ope na eengudu omayovi omilongo odo tadi liti kutya Ovakriste, kaleka momadiladilo osho Jesus a lombwela ovashikuli vaye a ti: “Hakeshe umwe ou ta ti kwaame, ‘Omwene, Omwene,’ ta ka ya mOuhamba womeulu, ndele ou ha longo ehalo laTate womeulu oye ashike ta ka ya mo.” (Mateus 7:21) Okudidilika mo ovo tava longo ehalo laTate, sha hala kutya, ovo ve li Ovakriste vashili nokweendafana navo, otashi ke ku etela omanangekonoupuna aalushe koshi yOuhamba waKalunga. Ohatu ku shivi u pule Eendombwedi daJehova, odo de ku pa oshifo eshi, ouyelele muhapu u na sha nOuhamba waKalunga nomanangekonoupuna oo tau ka eta. — Lukas 4:43.