Efiku limwe muJerusalem, Jesus okwa li a popya naXe, Jehova, nokwa li a nyaneka pomutenya oipupulu yovawiliki vomalongelokalunga vopefimbo laye. (Johannes 8:12-30) Osho a popya pomhito oyo otashi tu hongo nghee tu na okukonakona omahongo oo e li apeshe e na sha naKalunga kunena. Jesus okwa ti: “Ngeenge omwa diinine eendjovo dange, nye ovahongwa vange shili, notamu ka shiiva oshili, noshili otai ke mu mangulula.” — Johannes 8:31, 32.

“Ngeenge omwa diinine eendjovo dange.” Eshi Jesus a popya eendjovo odo, okwa tula po omufikamhango oo tau ufa kutya elongelokalunga lonhumba otali hongo “oshili,” ile hasho. Ngeenge wa udu etumbulo kombinga yaKalunga, lipula kutya, ‘Mbela eshi otashi tu ngoo kumwe neendjovo daJesus nosho yo Omishangwa Diyapuki dikwao?’ Hopaenena ovo va li va uda omuyapostoli Paulus ta hongo, ndele tava “konakona noukeka efiku keshe va tale ngeenge osho va lombwelwa [oinima oyo va li tave lihongo] oshoshili tuu” — Oilonga 17:11.

Marco, Rosa naRaymonde ovo va tumbulwa moshitukulwa shotete shomoitukulwa ei ya pambafana, ova konakona noukeka osho va itavela mokukonakona Ombiibeli nEendombwedi daJehova. Mbela oshike ve lihonga?

Marco: “Omuhongi wetu wOmbiibeli okwa longifa Omishangwa opo a nyamukule omapulo aeshe oo omukulukadi wange naame twa li tu na. Ohole yetu yokuhola Jehova oya hovela okukula, nafye otwa panga yo oukaume wa kola tu li ovalihomboli.”

Rosa: “Potete, onda li ndi shii Ombiibeli embo ashike loufilosofi olo tali kendabala okuyelifa kombinga yaKalunga tali longifa omadiladilo opanhu. Ndele mokweendela ko kwefimbo, onda li nda mona kutya Ombiibeli otai nyamukula omapulo ange. Paife onda tala ko Jehova e li omunhu wolela nohandi dulu oku mu lineekela.”

Raymonde: “Onda li nda ilikana Kalunga a kwafele nge ndi lihonge kombinga yaye. Diva konima yaasho, ame nomushamane wange otwa li twa hovela okukonakona Ombiibeli. Hauxuuninwa, otwa li twe lihonga oshili kombinga yaJehova! Otwa li twa hafa neenghono okushiiva kutya Kalunga omunhu a tya ngahelipi.”

Ombiibeli inai nyaneka ashike pomutenya oipupulu oyo ya popiwa kombinga yaKalunga, ndele otai holola yo oshili i na sha nomaukwatya aye mawa. Oi li Eendjovo daye da nwefwa mo, notai tu kwafele “tu shiive oinima oyo twa pewa kuKalunga pafilonghenda laye.” (1 Ovakorinto 2:12) Omolwashike ito konakona ove mwene u tale nghee Ombiibeli tai dulu okunyamukula omapulo oo haa pulwa luhapu, ndele okwa fimana e na sha naKalunga, elalakano laye nosho yo onakwiiwa yetu? Lesha omanyamukulo omapulo amwe oo to i opo pa shangwa “Omahongo Ombiibeli >Omapulo opaMbiibeli a nyamukulwa” ko www.pr418.com/kj. Oto dulu yo okupula ekonakonombiibeli okupitila ko-Web site, ile u pule umwe womEendombwedi daJehova. Otwe lineekela kutya ngeenge owa ningi ngaho, oto ka mona kutya oshipu okukala u hole Kalunga shi dulife osho wa li wa diladila.