OISHO ohai hange ovanhu aveshe, nokuli novapiya vaKalunga. Omupsalme umwe okwa ti: ‘Ondi noshisho shoudjuu meni lange.’ (Epsalme 94:19) Jesus naye okwa ti pefimbo lexulilo ‘oisho’ yonghalamwenyo otai dulu oku shi ningifa shidjuu okulongela Jehova. (Lukas 21:34) Ongahelipi shi na sha naave? Mbela naave owa wililwa po koupyakadi wopashimaliwa, koupyakadi moukwaneumbo ile oto lipula shi na sha noukolele woye? Ongahelipi Jehova ta dulu oku ku kwafela u lididimike?

Itatu dulu okulididimikila oisho kufye vene. Omuyapostoli Paulus okwa shanga a ti: ‘Mwaaishe otu li po twa fininikwa, twa limbililwa; notwa natwa poshi.’ Natango okwa weda ko a ti: ‘Inatu patekena, ndele inatu kanifa eteelelo noinatu nyonwa po.’ Oshike hashi tu kwafele tu lididimike? ‘Eenghono’ odo hatu pewa kuJehova Kalunga, Omunaenghono adishe. — 2 Ovakorinto 4:7-9.

Diladila ashike kunghee tashi dulika wa li wa pewa ‘eenghono’ da tya ngaho monakudiwa. Mbela oto dimbuluka oshipopiwa tashi tu omukumo osho sha li she ku linyengifa u kale u na olupandu lomoule omolwohole yaJehova i na oudiinini? Mbela eitavelo loye momaudaneko aJehova kala li hali pamekwa eshi kwa li ho hongo ovanhu kombinga yeteelelo lOparadisa? Ngeenge tu li pokwoongala kwopaKriste nokuyandja omatyekosha, ohatu mono eenghono opo tu dule okulididimikila oisho yonghalamwenyo nohatu mono ombili yopamadiladilo opo tu longele Jehova twa hafa.

Paushili woovene, otashi dulika u kale udite wa wililwa po. Pashihopaenenwa, Jehova ote tu pula tu konge tete Ouhamba notu kale tu na elandulafano lokuninga oinima yopamhepo. (Mateus 6:33; Lukas 13:24) Ndelenee ongahelipi ngeenge owa wililwa po komapataneko, kokuhe na oukolele ile komaupyakadi omoukwaneumbo? Ile ongahelipi ngeenge oilonga yoye yokulikongela omboloto ohai ku pula efimbo neenghono doye dihapu noiho mono efimbo lokuya kokwoongala? Otashi dulika u udite wa wililwa po eshi to longifa eenghono doye nefimbo linini okuungaunga neenghalo da tya ngaho. Ile otashi dulika u lipule kutya Jehova okwa teelela u longe shihapu.

Jehova oku udite ko eenghalo detu. Ina teelela tu longe shihapu shi dulife pwaasho hatu dulu okulonga. Oku shii yo kutya ohashi pula efimbo opo tu veluke palutu notu efe po omaliudo mai. — Epsalme 103:13, 14.

Pashihopaenenwa, tala nghee Jehova a li a fila oshisho omuprofeti Elia. Mbela Jehova okwa li a handukila Elia noku mu shunifa koshilonga shaye eshi a li a teka omukumo nokuya onhapo mombuwa omolwoumbada? Hasho nandenande. Jehova okwa li a tuma omweengeli waye oikando ivali a ka pendule Elia newi longhenda noku mu pa eendja a lye. Ndele nande ongaho, natango konima yomafiku 40, Elia okwa kala e na oshisho nokwa tila. Oshike vali Jehova a ninga po opo e mu kwafele?  Shotete, Jehova okwa li a ulika kutya ota dulu oku mu amena. Oshitivali, okwa li e mu hekeleka ‘nondaka i li pedu noitalala, NW.’ Xuuninwa, Jehova okwa li e mu shilipaleka kutya ope na ovalongelikalunga ovadiinini omayovi ovo tave mu longele. Okudja opo, Elia okwa ka kala vali omuladi moshilonga shaye shouprofeti. (1 Eehamba 19:1-19) Oshike hatu lihongo moshimoniwa shaye? Eshi Elia a li a wililwa po koisho, Jehova okwa li a ungaunga naye nelididimiko nosho yo nolune. Jehova iha lunduluka, nokunena ohe tu file oshisho monghedi ya faafana.

Kala u na ondjele ngeenge to diladila osho u na okuningila Jehova. Ino yelekanifa osho to dulu okuninga paife naasho wa kala ho ningi monakudiwa. Natu shi faneke ngaha: Omutondoki oo a efa po okuninga omadeulo oule weemwedi ile womido donhumba ita dulu vali okutondoka onhapo oyo a li ha tondoka nale. Ndele oku na okuhovela okuninga omadeulo kanini nakanini fiyo osheshi ta dulu vali okutondoka onhapo yaye yonale. Ovakriste ova fa ovatondoki. Ovakriste ohava ningi omadeulo ve na elalakano liwa momadiladilo. (1 Ovakorinto 9:24-27) Omolwashike ito litulile po elalakano lopamhepo olo tashi dulika to dulu okuhanga? Pashihopaenenwa, otashi dulika u litulile po elalakano lokukala pokwoongala oshivike keshe. Pula Jehova e ku kwafele u hange elalakano loye. Eshi to ende to pame vali pamhepo, oto ‘makele nokutala ouwa wOmwene apa u fike.’ (Epsalme 34:8) Dimbuluka kutya Jehova okwa lenga keshe osho to longo moilonga yaye to linyengifwa kohole, kashi na nee mbudi kutya oshidinifa shi fike peni. — Lukas 21:1-4.

Jehova okwa pameka ngahelipi June opo a alukile kuye? June okwa ti: “Onda kala nokwiilikana kuJehova a kwafele nge. Opo nee efiku limwe oshitenyakadona shange osha lombwela nge kutya modoolopa yetu otamu ka ningilwa oshoongalele. Onda li nda tokola okuya koshoongalele osho. Onda li ndi udite ehafo linene eshi nda alukila koshiwana shaJehova. Oshoongalele osho osha li sha kwafela nge ndi alukile kuJehova. Paife ohandi longele vali Jehova ndi na ehafo linene. Onghalamwenyo yange oi na eityo. Paife ondi shi shii kutya itandi dulu okulitukula ko kuye ile ndi kale kwaame mwene. Onda pandula neenghono eshi nda dula okwaalukila kuJehova.”