Ombibeli otai ti kutya Satana ota “hongaula ounyuni aushe.” (Ehololo 12:9) Satana neendemoni daye inava hala tu itavele Eendjovo daKalunga, Ombibeli. Vo otava kendabala okwiitavelifa ovanhu kutya oonakufya ove na omwenyo pamwe pe lili mouhamba weemhepo. Natu tale nhumbi have shi ningi.

Omalongelokalunga mahapu ohaa hongo kutya keshe omunhu oku na omwenyo (mOshiingilisha, soul) oo hau i mouhamba weemhepo konima yefyo lolutu. Vo ohava ti kutya olutu ohali fi ndee omwenyo (soul) ihau fi. Natango vo otava tu omufindo kutya omwenyo (soul) ihau dulu okufya, kutya wo ihau fi.

Ndele Eendjovo daKalunga hasho tadi hongo ngaho. Ombibeli otai ulike kutya omwenyo (soul) omunhu, kau shi shimwe shi li meni lomunhu. Pashihopaenenwa, mokuhepaulula eshito laAdam, Ombibeli otai yelifa: “Ndele Omwene Kalunga okwa mele omunhu mondwi yedu ndele okwa fudila meyulu laye omufudo womwenyo. Osho ngaha omulumenhu okwa ninga omwenyo u nomwenyo [a living soul, “NW”].” (Genesis 2:​7) Hano Adam kakwa li a pewa omwenyo (soul); ye okwa li omwenyo (soul).

 Oinamwenyo nayo oya ifanwa eemwenyo. — Epsalme 74:19. — Genesis 1:20, 21, 24, 30.

Shaashi oshitya shOmbibeli “omwenyo” (soul) otashi ti omunhu ye mwene, itashi tu kumwifa okuuda kutya eemwenyo ohadi dulu okufya. Omishangwa otadi ti:

• “Omwenyo [soul] tau nyono u nokufya.” — Hesekiel 18:4.

• “Ndee Simson ta ti: ‘Omwenyo [soul] wange nau fye pamwe nOvafilisti.’ ” — Ovatokolipangeli 16:30, NW.

• Inashi kelelwa efiku leshabata . . . okulonga ouwa ile okulonga owii? Okuxupifa omwenyo [soul] ile oku u dipaa?” — Markus 3:4.

Omishangwa dimwe otadi ulike kutya eemwenyo otadi dulu okudimwa po (Numeri 15:31), okudipawa keongamukonda (Josua 10:37), okupondwa (Job 7:15, NW), nokufya omeva (Jona 2:5). Hano omwenyo (soul) ohau fi.

Ngeenge to lesha Ombibeli okudja ketameko fiyo okexulilo, ito ka mona mo nande etumbulo “omwenyo ihau fi.” Omwenyo womunhu (human soul) kau shi omhepo. Ehongo lomwenyo ihau fi kali fi ehongo lOmbibeli. Olo ehongo laSatana neendemoni daye. Jehova oha tondo  oipupulu aishe yopamalongelokalunga. — Omayeletumbulo 6:16-19; 1 Timoteus 4:1, 2.

Onghedi imwe nghee Satana ha pukifa ovanhu omokupitila movapopi neemhepo. Omupopi neemhepo omunhu oo ha dulu okutambula omatumwalaka sha yukilila okudja mounyuni weemhepo. Ovanhu vahapu, mwa kwatelwa ovapopi neemhepo vo vene, ova itavela kutya omatumwalaka aa ohaa di keemhepo doonakufya. Ndele ngaashi twe shi mona mOmbibeli, eshi itashi dulika. — Omuudifi 9:5, 6, 10.

Hano, omatumwalaka aa ohaa di koolyelye? Okeendemoni do vene! Eendemoni ohadi dulu okukonakona omunhu manga e na omwenyo; do odi shii nhumbi omunhu kwa li ha popi, nhumbi ye a li, naasho kwa li ha ningi, nosho yo osho kwa li e shii. Onghee kudo oshi li shipu okuhopaelela ovanhu ovo va fya. — 1 Samuel 28:3-19.

Onghedi ikwao nghee Satana ha xumifa komesho oipupulu shi na sha noonakufya oyo okupitila momahokololo oipupulu. Omahokololo a tya ngaha luhapu ohaa ningifa ovanhu va amuke ko koshili yOmbibeli. — 2 Timoteus 4:4.

MuAfrika omu na omahepu mahapu kombinga yovanhu ovo va monika ve nomwenyo konima eshi va fya. Luhapu ovanhu va tya ngaha ohava monika kokule nonhele opo kwa li hava kala nale. Ndee lipula nee ove mwene: ‘Oshopandunge ngoo ngeenge omunhu oku na eenghono okunyumuka koufi, ndee ta alukile konhele i li kokule novaneumbo laye nookaume kaye?’

Natango, tashi dulika omunhu oo a monika mbela ina fa ashike omunhu winya a fya? Pashihopaenenwa, ovakalele Ovakriste vavali ovo kwa li tava udifa momukunda umwe ova mona omuxungu oo a kala noku va shikula eevili donhumba. Eshi ve mu pula, ova uda kutya omulumenhu okwa li e shii umwe womovakalele ava okwa li omumwaina oo a fya eedula donhumba da pita po. Paushili, ye okwa li a puka, ndele okwa anya okwiitavela kutya okwa puka. Diladila nee ehokololo olo omuxungu ou a ka lombwela ookaume kaye novashiinda vaye!

Pe he na omalimbililo ove ou shii oinima i lili oyo ovanhu va mona, va uda, ile va twa eendjodi. Oimoniwa ya tya ngaha i he shi yopaushitwe luhapu ohai tilifa ovo have i mono. Marein, oo a kala mOuninginino waAfrika, okwa kala alushe ha udu ondaka yainakulu te mu ifana oufiku. Mokuhaluka, Marein okwa li ha ingida nokupendula ovaneumbo vaye aveshe. Hauxuuninwa, ye okwa kanifa eendunge daye.

Hano, ngeenge oonakufya ove na omwenyo shili, ngeno oshi li ngoo pandunge va tilife ovaholike vavo? Paushili hasho. Eendemoni odo di li odjo yomatumwalaka a tya ngaha taa yahameke.

Ndele ongahelipi komatumwalaka oo a fa taa yandje ekwafo notaa yandje ehekeleko? Pashihopaenenwa, Gbassay, wokuSierra Leone, okwa li ta vele. Ye okwa twa ondjodi omo a holokelwa kuxe. Ye okwe mu lombwela a ye komuti wonhumba, ta kufa ko efo, te li lumbakanifa nomeva ndee ta nu. Ye kakwa li e na okulombwela umwe fimbo ine shi ninga. Ye osho a ninga ndee ta veluka.

Omukainhu umwe okwa ti kutya omulumenhu waye okwe mu holokela oufiku konima eshi a fya. Omukainhu okwa ti kutya omulumenhu okwa li a fewa nokwa djala nawa.

 Omatumwalaka nomamoniko a tya ngaha okwa fa mawa notaa kwafele. Mbela ohaa di kuKalunga? Ahowe, ihaa di kuye. Jehova oye “Kalunga koshili.” (Epsalme 31:5, NW) Ye ita dimine nande oku tu pukifa. Eendemoni odo ashike hadi shi ningi.

Ndele oku na tuu eendemoni diwa? Ahowe. Nonande da fa tadi kwafele oikando imwe, adishe odii. Eshi Ondiaboli ya popya naEva, okwa li ya fa i na ombili. (Genesis 3:1) Ndele oshidjemo osha li shike kuEva eshi a pwilikina kuyo ndee ta ningi osho ye mu lombwela? Ye okwa fya.

Ove ou shii kutya kashi li oshinima shi he shiivike ngee omunhu mwii ta ningi oukaume naavo a hala okupukifa nokukotokela. “Omayoo omatoka, omutima oulaula,” eyeletumbulo limwe lOshiafrika osho tali ti. Ndee Eendjovo daKalunga otadi ti: “Satana mwene ote lifefa omwengeli wouyelele.” — 2 Ovakorinto 11:14.

Kalunga iha kwatafana vali novanhu kombada yedu tashi pitile meendjodi, momamoniko ile meendaka odo hadi di mounyuni weemhepo. Ye ote va wilike noku va longa tashi pitile mOmbibeli, oyo tai dulu okuninga omunhu a kale a “wanenena oshilonga keshe shiwa.” — 2 Timoteus 3:17.

Hano eshi Jehova te tu londwele tu kondjife omakoto Ondiaboli, ye ote shi ningi shaashi oku tu hole. Ye oku shi shii kutya eendemoni ovatondi tava eta oshiponga.