Ovanhu ova li ve linyenga meenghedi da yoolokafana kwaasho Jesus a popya nokwa ninga she likolelela ketaleko lavo. Osho osha li she limonikila mo nawa meumbo limwe muGalilea. Omufarisai wedina Simon okwa li a shiva Jesus keumbo laye, tashi dulika opo a mone Jesus omolwoikumwifilonga ididilikwedi oyo a longa. Jesus okwa li a tambula ko eshivo olo opo a yandje oundombwedi kwaavo tava ka kala po, ngaashi ashike pomhito imwe a li a tambula ko eshivo loku ka lya pamwe novafendelifi nosho yo novalunde.

Ashike Jesus ka li a tambulwa ko ngaashi hashi ningilwa ovaenda. Okwa li a enda momifitu muPalestina, neemhadi daye oda li da toka noda kaka, nosha li onghedindjikilile yokukosha eemhadi dovaenda nomeva matalala shi li euliko lokutambula ko ovaenda. Ashike Jesus hasho a li a yakulwa ngaho. Ka li yo nokuli a xupitwa opo a ulikilwe kutya okwa tambulwa ko. Onghedindjikilile vali imwe, oyo okuvaeka eexwiki domweenda nomaadi shi li euliko kutya okwa tambulwa ko. Natango hasho a li ningilwa ngaho. Ndele mbela okwa li ngoo a tambulwa ko?

Ova li va hovela okulya, novaenda ova li ve li omutumba poshitaafula. Ofimbo va li tava li, omwe uya omukainhu oo a li ina shivwa. Okwa “li a shiivika moshilando ashishe kutya omulunde.” (Lukas 7:37) Ovanhu aveshe inava wanenena novalunde, ashike omukainhu oo okwa li e na onghedi yokukalamwenyo inai koshoka, tashi dulika a li ombwada. Otashi dulika a li a uda kombinga yomahongo aJesus, mwa kwatelwa eshivo olo kutya ‘aveshe ovo hava longo nova lolokifwa, nava ye kuye opo va tulumukifwe.’ (Mateus 11:28, 29) Otashi dulika a li e linyengifwa keendjovo daJesus nosho yo koilonga oyo a longa, nokwa li e mu mona.

Okwa li e uya poshitafula a dilila konima yaJesus, ndele ta tu eengolo peemhadi daye. Okwa hovela okulila, nomahodi aye okwa li taa pononokele keemhadi daJesus noku a pushula ko neexwiki daye. Okwe mu xupita keemhadi daye noku di vaeka nomaadi edimba liwa oo e uya nao. Simon okwa li ta tale noku mu tokola, ndele te lipopile ta ti: “Omulumenhu ou ngeno okwa li omuprofeti shili, ngeno okwa didilika kutya omukainhu ou te mu kumu okwa tya ngahelipi. Ngeno oku shii kutya omulunde.” — Lukas 7:39.

Eshi Jesus a didilika osho Simon ta diladila, okwa tya kuye: “Simon, onda hala oku ku lombwela sha.” Simon okwa nyamukula a ti: “Eewa Muhongi, popya.” Opo nee Jesus okwa twikila ko ta ti: “Opa li ovalumenhu vavali va lya oikolo komulumenhu wonhumba; umwe okwa lya oikolo yeedenari 500, ofimbo mukwao 50. Ndele eshi va li va nyengwa oku i shunifa, okwe va dimina po aveshe. Mbela olyelye womwaava vavali ta ka kala e mu hole unene?” Otashi dulika Simon a nyamukula a fa ehe na ohokwe, ta ti: “Ondi wete kutya oyou a diminwa po oikolo ihapu.” — Lukas 7:40-43.

Jesus okwa li a dimina osho Simon a popya. Opo nee okwa tala komukainhu, ndele ta ti ku Simon: “Omukainhu ou mu wete ou? Onde uya meumbo loye ndele ino pa nge omeva okulikosha keemhadi. Ndele omukainhu ou okwa tutika eemhadi dange nomahodi nokwe a pushula ko neexwiki daye. Ove ino xupita nge, ndele omukainhu ou, okudja ngoo eshi nde uya omu, ina efa okuxupita eemhadi dange. Ove ino vaeka omutwe wange omaadi, ndele omukainhu ou okwa vaeka eemhadi dange omaadi edimba liwa.” Jesus okwa li a mona kutya omukainhu oo okwa hala okweefa po onghedi yaye oyo inai koshoka. Opo nee okwa weda ko a ti: “Omatimba aye nonande  omahapu, okwa dimwa po, osheshi oku hole nge unene. Ndele ou a diminwa po manini, ohole yaye oinini.” — Lukas 7:44-47.

Jesus ka li ta popile onghedi inai koshoka. Ponhele yaasho okwa li a hala okukwafela ovanhu va ude ko kutya omunhu oo a nyona enyono la kwata moiti ota dulu okulidilulula nokwaalukila kuKristus opo a mone etulumuko. Omukainhu oo okwa li e udite a tulumukwa eshi Jesus e mu lombwela a ti: “Omatimba oye okwa dimwa po. . . . Eitavelo loye ole ku xupifa; inda nombili.” — Lukas 7:48, 50.