Konima eshi Jesus a yandja Eudifo lokOmhunda, okwa ya koshilando shaKapernaum nokwa li a shakenekwa kovakulunhu Ovajuda. Ova li va tumwa komulumenhu oo a dja meputuko lihe fi lavo, oo a li omukulunhu wetangakwaita laRoma noha ifanwa omunefele.

Omupiya womukulunhu wetangakwaita laRoma okwa li ta ehamenene nokwa li e li pokufya. Nonande omunefele oo ka li Omujuda ,okwa li a konga ekwafo kuJesus. Ovajuda ova li va lombwela Jesus kutya omupiya womulumenhu oo okwa “nangala keumbo ta vele ombada, ndele ota vele neenghono,” tashi dulika a li ta ehamenene. (Mateus 8:6) Ovakulunhu Ovajuda ova li va indila Jesus kutya omunefele oo okwa wana okukwafelwa, va ti: “Oku hole oshiwana shetu nokwe tu tungila oshinagoga.” — Lukas 7:4, 5.

Jesus okwa li a ya diva pamwe novakulunhu Ovajuda keumbo lomukulunhu wetangakwaita laRoma. Eshi va li pokufika, omukulunhu wetangakwaita okwa tuma ookaume kaye ve ke mu lombwele tava ti: “Omufimanekwa, ino lihepeka osheshi ame inandi wana oku ku tambula meumbo lange. Onda mona yo kutya inandi wana okuuya kwoove.” (Lukas 7:6, 7) Eendjovo odo otadi ulike kutya omulumenhu oo okwa li omulininipiki nokwa li a yooloka ko kOvaroma ovo va li hava ungaunga novapika nonyanya. — Mateus 8:9.

Nopehe na omalimbililo, omunefele okwa li e shi shii kutya Ovajuda ihava endafana naavo vehe fi Ovajuda. (Oilonga 10:28) Omukulunhu wetangakwaita tashi dulika e na osho momadiladilo, okwa li a lombwela ookaume kaye va lombwele Jesus tava ti: “Popya ashike ondjovo ndele omupiya wange ta veluka.” — Lukas 7:7.

Jesus okwa li a kumwa eshi a uda eendjovo davo, ndele ta ti kuvo: “Ohandi mu lombwele, muIsrael inandi mona mo nande oumwe e na eitavelo la kola la tya ngaho.” (Lukas 7:9) Mondjila yavo yokushuna keumbo lomunefele, ookaume kaye ova li va mona kutya omupiya oo a li ta vele neenghono okwa veluka.

Eshi Jesus a velula omupiya oo, okwa li a longifa omhito oyo opo a ulike kutya ovanhu ovo vehe fi Ovajuda nove na eitavelo otava ka nangekwa noupuna, a ti: “Vahapu otava ka dja koushilo nokouninginino, ndele tava kala omutumba poshitaafula naAbraham, Isak naJakob mOuhamba womeulu.” Ongahelipi shi na sha nOvajuda ovo vehe na eitavelo? Jesus okwa ti otava “ka umbilwa pondje momilaulu, omo tava ka lilaana nokulikwesha komayoo.” — Mateus 8:11, 12.

Onghee hano, Ovajuda ovo inava tambula ko omhito yotete yokukala oshitukulwa shOuhamba waKristus otava ka hanaunwa po. Ashike ovo vehe fi Ovajuda otava ka kala omutumba poshitaafula shaye ve li “mOuhamba womeulu.”