Ovajuda ova li va ya kuJesus ofimbo a li natango muJerusalem. Vamwe ova li va hala okulihonga shihapu kombinga yaye, ofimbo vamwe va li va hala oku mu yeleka. Umwe womuvo okwa li omunongo womhango, nokwa li a pula Jesus a ti: “Omuhongi, ondi na okuninga shike opo ndi ka fyuulule omwenyo waalushe?” — Lukas 10:25.

Jesus okwa li a mona kutya omulumenhu oo ka li a hala shili okukwafelwa. Otashi dulika li a hala Jesus a nyamukule monghedi oyo tai udifa nai Ovajuda. Jesus okwa li a mona kutya omulumenhu oo oku na etaleko la tya ngahelipi. Opo nee okwe mu nyamukula monghedi oyo tai ulike osho ta diladila.

Jesus okwa pula a ti: “MOmhango omwa shangwa shike? Ou i udite ko ngahelipi?” Omulumenhu oo okwa li e shii Omhango yaKalunga, nokwa li a nyamukula she likolelela kuyo. Okwa li a tofa muDeuteronomion 6:5 nosho yo muLevitikus 19:18, a ti: “‘Hola Jehova Kalunga koye nomutima woye aushe, nomwenyo woye aushe, neenghono doye adishe, neendunge doye adishe’ nosho yo ‘hola mukweni ngaashi u lihole mwene.’” (Lukas 10:26, 27) Mbela olo olo la li enyamukulo?

Jesus okwa li a nyamukula omulumenhu oo a ti: “Owa nyamukula mondjila; twikila okuninga ngaho opo u ka mone omwenyo waalushe.” Mbela eenghundafana opo da li da xulila opo? Omulumenhu oo ka li ashike a hala enyamukulo ngahenya, ashike okwa li “a hala okulimonikifa kutya ye omuyuki,” nokwa li a hala okuulika kutya oku li mondjila nonokutya osho ha ungaunga ngaho novanhu vakwao. Opo nee okwa pula a ti: “Olyelye naanaa omukwetu?” (Lukas 10:28, 29) Epulo olo ola li tali monika lipu ashike olomoule. Ngahelipi mbela?

Ovajuda ova li va itavela kutya outumbulilo “omukwetu” owa yukifwa ashike kwaavo hava diinine omifyuululwakalo dOshijuda, nediladilo olo ola fa tali yambididwa kuLevitikus 19:18. Ova li va fika pexulifodiladilo kutya kashi li “pamhango” okweendafana novanhu ovo vehe fi Ovajuda. (Oilonga 10:28) Ngeenge omulumenhu oo nosho yo ovahongwa vaJesus va li va ungaunga nawa nOvajuda vakwao, ova li have litale ko ovayuki. Ashike kava li hava ungaunga nawa naavo vehe fi Ovajuda, molwaashi kava li ve va tala ko ve li ‘ovakwao.’

Jesus okwa li ta ka lundulula ngahelipi etaleko lomulumenhu oo nosho yo lOvajuda nopehe na oku va udifa nai? Okwa li e va lombwela ehokololo a ti: “Omulumenhu wonhumba okwa li ta di muJerusalem a finda kuJeriko ndele ta hangika kovanyeki, ove mu dula oikutu aishe, tave mu denge ndele tave mu fiye po e na okamwenyo kanini.” Jesus okwa weda ko a ti: “Ndele omupristeri umwe oo a li ta ende mondjila oyo, eshi e mu mona, okwa ya nondjila imwe i lili. Natango, Omulevi umwe naye eshi e uya ponhele oyo, okwe mu mona nokwa ya nondjila imwe i lili. Ndele Omusamaria umwe oo a li naye ta ende mondjila oyo, eshi e uya ponhele oyo, okwe mu mona nokwe mu kenukila.” — Lukas 10:30-33.

Omulumenhu oo a li ta hokololelwa ehokololo kuJesus okwa li e shii kutya ovapristeri vahapu nOvalevi ovo hava kwafele kotembeli ohava di muJeriko. Opo va shune kuJeriko okudja kotembeli, ova li ve na okweenda oshinano sheekilometa 23. Ondjila oyo oya li ya nyika oshiponga molwaashi ohai kala ovanyeki. Ngeenge ovapristeri nOvalevi ova hange Omujuda e li moshiponga, mbela itave mu kwafele? Mehokololo olo, Jesus okwa ulika kutya inave mu kwafela. Omulumenhu Omusamaria, oo a li e tondike kOvajuda, oye a li e mu kwafela. — Johannes 8:48.

Omusamaria okwa li a kwafela ngahelipi Omujuda  oo a li a dengwa? Jesus okwa ti: “Okwa ya puye, te mu tile omaadi nomaviinyu poipute yaye ndele te i mange. Opo nee okwe mu londeka koshinamwenyo shaye ndele te mu twala meumbo lovaenda e ke mu file oshisho. Mefiku la landula ko, okwa kufa eedenari mbali, ndele te di pe mwene weumbo olo, nokwa tya kuye: ‘Mu fila oshisho, nongeenge owa longifa shihapu shi dulife pwaasho, ohandi uya ndi shi fute eshi handi aluka.’” — Lukas 10:34, 35.

Konima eshi a popya ehokololo olo, Omuhongi Munenenene, Jesus, okwa pula omulumenhu epulo a ti: “Olyelye womwaava vatatu to diladila kutya oye omukwao womulumenhu oo a li a hangika kovanyeki?” Omulumenhu oo ka li a nyamukula epulo a yukilila kutya “Omusamaria,” ndele ponhele yaasho okwa nyamukula a ti: “Oyou e mu fila onghenda.” Jesus okwa li a yelifa oshilihongomwa shehokololo laye a ti: “Inda u ka ninge yo sha faafana.” — Lukas 10:36, 37.

Onghedi oyo yokuhonga oya li ya denga mbada. Ngeno Jesus okwa li a lombwela omulumenhu oo kutya ovo vehe fi Ovajuda ovakwao, mbela ngeno omulumenhu oo nosho yo Ovajuda ovo va li tava pwilikine ove shi tambula ko ngoo? Otashi dulika ngeno inave shi tambula ko. Ponhele Jesus a yandje ehokololo li li paunafangwa, okwa li a yandja efaneko olo tali kwafele ovapwilikini va ude ko, nenyamukulo kepulo kutya, “Olyelye naanaa omukwetu?” ola li la yela nawa. Omunhu oo ha ulike kutya omukwetu shili oyoo ha ulike ohole noha kenukile vamwe ngaashi ashike Omishangwa de tu lombwela tu ninge.