Jesus okwa hangwa opo a endulula omalombwelo e na sha neilikano, ndele opa li yo noikundafanwa imwe oyo ya li hai endululwa luhapu pefimbo loukalele waye. Eshi Jesus a li ta longo oikumwifilonga muGalilea, okwa li a lundilwa kutya okwa li te i longo keenghono domupangeli weendemoni. Natango okwa ka lundilwa muJudea.

Eshi Jesus a ta mo ondemoni momulumenhu oyo ya li ye mu ningifa aha popye, ongudu yovanhu oya li ya kumwa. Ashike ovo va li tave mu lundile kava li va kumwa. Ova li ve mu lundila tava ti: “Eendemoni ote di te mo naBelsebul, omupangeli weendemoni.” (Lukas 11:15) Vamwe ova li tava pula oumbangi u na sha naapo a dja, moku mu pula e va ulikile edidiliko okudja meulu.

Eshi Jesus a mona kutya ova li va hala oku mu yeleka, okwa li e va nyamukula ngaashi a li a nyamukula ovo va li tave mu lundile muGalilea. Okwa li a popya kutya keshe ouhamba we litukula otau ke lipilukila po, a ti: “Ngeenge Satana naye okwe lipilukila po, ongahelipi ouhamba waye tau dulu okukala po?” Jesus ine va lila okafima koluko, okwe va lombwele a ti: “Ngeenge eendemoni ohandi di te mo neenghono daKalunga, osha hala okutya Ouhamba waKalunga owe uya ndele inamu shi didilika.” — Lukas 11:18-20.

Eshi Jesus a popya kombinga ‘yeenghono daKalunga’ otashi dulika ovapwilikini vaye va dimbuluka osho sha ningilwe nale mondjokonona yOvaisrael. Ovo va li mombala yaFarao nova li va mona eshi Moses ta longo oikumwifilonga, ova li va ingida va ti: “Eshi omunwe waKalunga!” Osha li yo ‘omunwe waKalunga’ oo wa shanga Oipango Omulongo koipelende yomamanya. (Exodus 8:19; 31:18) Sha faafana, “omunwe waKalunga” ile tu tye omhepo yaye iyapuki ile eenghono daye, odo tadi kwafele Jesus a te mo eendemoni nokuvelula ovanhu. Onghee Ouhamba waKalunga owa umba ko ovapataneki ovo, molwaashi Ohamba yOuhamba, Jesus, oyo ya nangekwa po oyo ya li tai longo oikumwifilonga oyo.

Jesus oku na eenghono dokuta mo eendemoni naasho oshi li oumbangi kutya oku dule Satana, ngaashi ashike omulumenhu omunaenghono e dule oo ha pashukile nokupangela ombala. Jesus okwa li yo a endulula efaneko li na sha nokuta mo omhepo ya nyata momunhu. Ngeenge omunhu ina yadifa omutima waye noinima oyo ya yuka, omhepo oyo ya nyata otai mu alukile neendemoni heyali, nonghalo yaye yaxuuninwa ohai kala ii neenghono i dule yotete. (Mateus 12:22, 25-29, 43-45) Onghee osha li pandunge okweendafana noshiwana shaIsrael.

Omukainhu umwe oo a uda osho Jesus a li ta popi okwa li e linyengifwa a tye: “Omukainhu oo e ku humbata moshidalelo shaye nokwe ku nyamifa ota kala a hafa!” Ovakainhu Ovajuda ova li hava kala va halelela okuninga ina yomuprofeti, unene tuu yaMessias. Onghee omukainhu oo okwa li ta diladila kutya Maria okwa hafa eshi e li ina yomuhongi. Jesus okwa li a lombwela omukainhu oo odjo yehafo lashili, a ti: “Ovo tava kala va hafa ovovo hava pwilikine eendjovo daKalunga noku di diinina.” (Lukas 11:27, 28) Jesus ka li a popya kutya Maria oku na okufimanekwa monghedi ye likalekelwa. Ashike ehafo lashili ohali di mokukala omupiya omudiinini waKalunga, ndele hamolwaashi wa pamba omunhu wonhumba ile wa pondola sha.

Ngaashi ashike Jesus a li a ninga muGalilea, okwa li a hanyena ovanhu ovo va li tava pula edidiliko okudja meulu. Okwa ti itava pewa edidiliko lasha kakele “kedidiliko lomuprofeti Jona.” Jona okwa li a yandja edidiliko eshi a li medimo loshi omafiku atatu nosho yo eshi kala ta udifa nouladi,  nosha li she linyengifa Ovaninive ve lidilulule. Jesus okwa ti: “Ndele tala, ou e li apa okwa fimanenena e dule Jona.” (Lukas 11:29-32) Jesus oku dule Salomo mounongo, oo ounongo waye wa ningifa ohambakainhu Isabel i pwilikine kuye.

Opo nee Jesus okwa weda ko a ti: “Omunhu ngeenge a tema olamba, ihe i holeke ile e i tule koshi yoshimbale, ndele ohe i tula koshikwatelwalamba.” (Lukas 11:33) Otashi dulika a li a hala okutya eshi ta hongo nota longo oikumwifilonga moipafi yovanhu ovo osha fa ashike ta holeke ouyelele wolamba. Molwaashi kava li tava yandje elitulemo, ova li va pitililwa po koinima ihapu i na sha noilonga yaye.

Jesus opo ashike a hangwa a ta mo ondemoni oyo ya li ya ningifa omulumenhu aha popye. Naasho osha li sha ningifa ovanhu va fimaneke Kalunga nokulombwela vamwe osho ta longo. Opo nee Jesus okwa li a londwela ovapataneki vaye, a ti: “Onghee hano, lungama opo ouyelele oo u li mwoove uha ninge omulaulu fokofoko. Ngeenge olutu loye alishe oli li mouyelele, alishe otali ka kala la yela ngaashi olamba tai minikile.” — Lukas 11:35, 36.