Konima eshi Jesus a nyumuka, okwa li a ninga omalongekido opo ovayapostoli vaye 11 ve ke mu shakeneke komhunda yaGalilea. Opa li yo ovahongwa 500 lwaapo, navamwe vomuvo ovovo va li inava itavela kutya Jesus okwa nyumuka. (Mateus 28:17; 1 Ovakorinto 15:6) Ashike osho Jesus a li a popya pomhito oyo osha li sha tomha keshe umwe a itavele kutya okwa nyumuka.

Jesus okwa yelifa kutya Kalunga okwe mu pa eenghonopangelo adishe meulu nosho yo kombada yedu. Jesus okwe va lombwela a ti: “Indeni mu ka ninge ovanhu vomoiwana aishe ovahongwa, noku va ninginifa medina laXe nolOmona nolomhepo iyapuki; va hongeni okudiinina oinima aishe oyo nde mu lombwela.” (Mateus 28:18-20) Jesus okwa li e na omwenyo nokwa li e na natango ehalo lokuudifa onghundana iwa.

Ovashikuli aveshe vaJesus, ovalumenhu, ovakainhu nounona, ova pewa oshilonga shokuninga ovanhu ovahongwa. Otashi dulika ovapataneki va kendabale okuya moshipala oilonga yavo yokuudifa nokuhonga, ashike Jesus okwe va shilipaleka a ti: “Onda pewa eenghonopangelo adishe meulu nokombada yedu.” Mbela osho otashi ka etela ovashikuli vaye ouwa washike? Okwe va lombwela a ti: “Taleni! Ondi li pamwe nanye alushe fiyo omomafiku axuuninwa ounyuni ou.” Jesus ina tya kutya keshe oo ta ka kufa ombinga moilonga yokuudifa onghundana iwa ota ka dula okulonga oikumwifilonga. Ashike otava ka kala ve na ekwafo lomhepo iyapuki.

Jesus okwa li e lihololela ovahongwa vaye “momukokomoko womafiku 40” eshi a nyumuka. Nonande kava li ve mu dimbulula, okwa li e “ve lihololela luhapu opo va tomhwe filufilu kutya oku na omwenyo,” nokwa li e va honga “kombinga yOuhamba waKalunga.” — Oilonga 1:3; 1 Ovakorinto 15:7.

Eshi ovayapostoli va li natango muGalilea, Jesus okwa li e va lombwela va shune kuJerusalem. Eshi a ka ongala pamwe navo oko, okwe va lombwela a ti: “Inamu dja mo muJerusalem, ndele kaleni mwa teelela osho nde mu lombwela, osho Tate e mu udanekela. Ndele Johannes okwa ninginifa momeva, ashike nye mafiku otamu ka ninginifwa nomhepo iyapuki.” — Oilonga 1:4, 5.

Lwanima, Jesus okwa ka shakena vali novayapostoli vaye. “Okwe va twala kuBetania,” osho sha li koushilo wolufilu lOmhunda yEemono. (Lukas 24:50) Nonande Jesus okwa li e va lombwela keshe shimwe shi na sha nokuya kwaye, ova li natango va itavela kutya Ouhamba waye otau ka dikwa po kombada yedu. — Lukas 22:16, 18, 30; Johannes 14:2, 3.

Ovayapostoli ova li va pula Jesus va ti: “Omwene, ouhamba waIsrael oto u tungulula tuu pefimbo eli?” Jesus okwe va nyamukula a ti: “Tate womeulu oye aeke e na oufemba wokuufa kutya efimbo peni oinima tai ka ningwa, ndele nye efimbo olo inamu pumbwa oku li shiiva.” Okwa li a divilika vali oilonga oyo ve na okulonga, a ti: “Otamu ka pewa eenghono ngeenge omwa tililwa omhepo iyapuki, opo nee otamu ka yandja oundombwedi kombinga yange muJerusalem, muJudea nomuSamaria ashishe nosho yo kombada yedu alishe.” — Oilonga 1:6-8.

Ovayapostoli ova li naJesus kOmhunda yEemono eshi a ya meulu. Okwa li a uvikwa diva koshilemo moipafi yavo. Konima eshi Jesus a nyumuka, okwa li e na olutu lopambelela. Ashike eshi Jesus a ya meulu okwa ya mo e li oshishitwa shopamhepo. (1 Ovakorinto 15:44, 50; 1 Petrus 3:18) Ofimbo ovayapostoli ovadiinini va li tava tale keulu eshi Jesus ta i, puvo opa li pe uya “ovalumenhu vavali va djala oikutu itoka.” Ovalumenhu ovo ova li ovaengeli ve li molupe lopambelela,  nova pula va ti: “Ovalumenhu nye Ovagalilea, omolwashike mwa fikama tamu tale keulu? Jesus ou a kufwa po punye a ya meulu, ota ka aluka naanaa ngaashi mwe mu mona eshi ta i meulu.” — Oilonga 1:10, 11.

Eshi Jesus a ya meulu, ovahongwa vaye ovadiinini ovo ashike va li ve mu mona. Sha faafana, “ota ka aluka naanaa ngaashi” a ile meulu, sha hala kutya ovashikuli vaye ovadiinini ovo ashike tava ka didilika mo okukala po kwaye meenghono dOuhamba.

Ovayapostoli ova li va shuna kuJerusalem. Momukokomoko womafiku a shikula ko, ova li va ongala pamwe novahongwa vamwe, mwa kwatelwa “Maria ina yaJesus novamwainamati vaJesus.” ( Oilonga 1:14) Ongudu oyo oya li tai ilikana. Oshinima shimwe osho va li tava ilikanene osho okuhoolola omuhongwa umwe a pingene po Judas Iskariot opo ovayapostoli va kale natango 12. (Mateus 19:28) Ova li va hala omuhongwa oo a mona oilonga yaJesus nosho yo enyumuko laye. Osho osho sha li oshikando shaxuuninwa mOmbiibeli mwa popiwa okuumba oshihoololifo opo ku talike kutya ehalo laKalunga olilipi. (Epsalme 109:8; Omayeletumbulo 16:33) Matias, oo tashi dulika a li umwe womovahongwa 70 ovo Jesus a li a tuma, oye a li a hoololwa, “nokwa li a valulilwa pamwe novayapostoli 11.” — Oilonga 1:26.

Konima yomafiku omulongo eshi Jesus a ya meulu, Oshivilo shOvajuda shOpentekoste 33 O.P. osha li sha hovela. Ovahongwa 120 lwaapo ova li va ongala monduda yopombada muJerusalem. Ohaluka ova uda epopomo la dja meulu la fa omhepo inene. Omalaka a fa omundilo okwa li a wila kombada yakeshe umwe oo a li po. Ovahongwa aveshe ova li va hovela okupopya omalaka a yoolokafana. Ova li va tililwa omhepo iyapuki ngaashi Jesus a li e va udanekela. — Johannes 14:26.