MOmaandaxa eshi Jesus a dja mo muJerusalem, okwa li a shuna kuBetania osho shi li koushilo wOmhunda yEemono. Oufiku aushe okwa kala keumbo lookaume kaye, Lasarus, Maria naMarta.

Ongula mo 11 Nisan, Jesus novahongwa vaye ova li va shuna kuJerusalem opo a ka kale motembeli oshikando shaye shaxuuninwa. Naalo olo la li efiku laxuuninwa loukalele waye ofimbo ina dana oshivilo shOpaasa, ina dika po Edimbuluko lefyo laye, nokonima okwa li ta ka hepekwa nokudipawa.

Fimbo ve li mondjila tava di kuBetania, osho sha li kombinga ikwao yOmhunda yEemono, va finda kuJerusalem, Petrus okwa li a mona omuti oo wa li wa fingwa kuJesus, ndele ta ti: “Omuhongi, tala, omukwiyu winya wa finga owa fya.” — Markus 11:21.

Mbela omolwashike Jesus a li a finga omuti oo u fye? Okwa yandja enyamukulo, a ti: “Oshili ohandi mu lombwele, ngeenge omu na eitavelo nokamu na omalimbililo, itamu ka ninga ashike ngaashi nda ningila omukwiyu, ndele nande ngeno omwa lombwele omhunda ei, ‘Litumba po ndele to liumbile mefuta,’ otashi ka ningwa. Oinima aishe oyo tamu i indile mu na eitavelo, otamu ke i pewa.” (Mateus 1:21, 22) Kungaho, okwa li a endulula oshitwa osho a li popya nale kombinga yeitavelo olo tali dulu okulundulula omhunda. — Mateus 17:20.

Eshi Jesus a finga omukwiyu ndele tau fi, okwa li a hala okuhonga oshilihongomwa shi na nanghee sha fimana okukala neitavelo muKalunga. Okwa ti: “Oinima aishe oyo tamu i indile, kaleni mu na eitavelo kutya omwe i pewa, notamu ka kala mu i na.” (Markus 11:24) Osho oshi li oshilihongomwa sha fimana kovashikuli aveshe vaJesus. Osho osha li tashi ka kwafela ovayapostoli omolwomapataneko oo va li tava ka shakeneka. Ashike natango ope na ekwatafano pokati kokufya kwomukwiyu nosho yo eitavelo.

Ngaashi ashike omukwiyu oo, oshiwana shaIsrael osha li shi na eholokepo tali limbililike. Ovanhu vomoshiwana osho ova li va ninga ehangano naKalunga, notashi dulika va li tava monika va fa hava dulika kOmhango yaye. Ashike oshiwana ashishe osha ulika kutya kasha li shi na eitavelo noinashi imika oiimati iwa. Kasha li nokuli sha tambula ko Omona waKalunga. Onghee hano, eshi Jesus a finga omukwiyu oo ihau imi u fye, okwa li a ulika nghee exulilo lovanhu ovo ihava imike oiimati novehe fi ovadiinini tali ka kala.

Jesus novahongwa vaye ova li va fika diva muJerusalem. Okwa li a ya kotembeli nokuhovela okuhonga, ngaashi he shi ningi shito. Ovapristeri ovakulunhu novakulunhu voshiwana ova li va yeleka Jesus, tashi dulika va li ve na momadiladilo osho a li a ningila ovakumaani voimaliwa, eshi va ti: “Okeenghonopangelo dalyelye to longo oinima ei? Nolyelye e ku pa eenghonopangelo odo?” — Markus 11:28.

Jesus okwa nyamukula a ti: “Naame onda hala oku mu pula, ndele ngeenge omwa nyamukula nge, naame ohandi ke mu lombwela kutya okeenghonopangelo dalyelye handi longo oinima ei. Eninginifo laJohannes ola dja meulu ile omovanhu? Nyamukulei nge.” Pomhito oyo ovapataneki vaye ovo va li tava yelekwa. Ovapristeri novakulunhu ova kundafana osho tava ka nyamukula, tava ti: “Ngeenge otwa ti, ‘Omeulu,’ ota ka tya, ‘Omolwashike hano inamu mu itavela?’ Ongahelipi ngeenge otwa ti, ‘Omovanhu’?” Ova li va tila ongudu yovanhu “molwaashi ongudu aishe oya li ya tala ko Johannes e li omuprofeti washili.” — Markus 11:29-32.

 Ovo va li tava pataneke Jesus ova li va nyengwa okunyamukula osho shi li mondjila. Opo nee ova nyamukula tava ti: “Katu shi shii.” Onghee Jesus okwe va nyamukula a ti: “Naame itandi mu lombwele kutya okeenghonopangelo dalyelye handi longo oinima ei.” — Markus 11:33.