Nonande Jesus okwa kala ta hepekwa nokushekwa, eenghendabala daPilatus doku mu mangulula kada li da kuma ovapristeri ovakulunhu nosho yo ovashikuli vavo. Kava li va hala nande oshinima shonhumba shi ye moshipala efyo laJesus. Ova ingida va ti: “Mu valela komuti! Mu valela komuti!” Pilatus okwa nyamukula a ti: “Mu kufeni po ndele tamu ke mu valela nye vene, shaashi ame inandi mu mona ondjo yasha.” — Johannes 19:6.

Ovajuda kava li va tomha Pilatus kutya Jesus okwa wana okufya omolwetomheno li na sha noinima yopapolotika, ndele ongahelipi shi na sha netomheno lopalongelokalunga? Ova li va endulula etomheno olo va li va popya mOmhangu yoPombada yOvajuda kutya Jesus ota sheke Kalunga. Ova ti: “Metwokumwe nomhango yetu, okwa wana okufya molwaashi ote liti kutya omona waKalunga.” (Johannes 19:7) Pilatus opo ashike a li te shi udu lwotete pomhito oyo.

Pilatus okwa li a shuna mombala yaye nokwa li ta kendabala okumona onghedi imwe yokumangulula Jesus oo a kala ta ungaungiwa naye nai nokwa tuwa ondjodi komukulukadi waye. (Mateus 27:19) Pilatus okwa li a limbililwa eshi a uda etomheno olo lipe kOvajuda kutya Jesus “omona waKalunga.” Okwa li e shii kutya Jesus okwa dja kuGalilea. (Lukas 23:5-7) Ashike okwa li a pula Jesus a ti: “Owa dja peni?” (Johannes 19:9) Mbela Pilatus okwa li ta diladila kutya Jesus okwa li ko nale, tashi dulika monghedi imwe i lili?

Pilatus okwa li a uda kuJesus kutya oku li ohamba, ashike Ouhamba waye kau fi oshitukulwa shounyuni ou. Opo Jesus aha yelife osho a li a popya nale, okwa li ashike a mwena. Eshi Jesus a anya oku mu nyamukula, osho osha li sha ehameka Pilatus, ndele ta pula Jesus ta ti: “Ino hala okupopya naame? Ku shi shii kutya ondi na eenghonopangelo doku ku mangulula nosho yo doku ku valelifa komuti?” — Johannes 19:10.

Jesus okwe mu nyamukula a ti: “Ngeno kwa li wa pewa eenghonopangelo kuKalunga dokupangela, ngeno ku di na. Nomolwaasho omunhu ou a yandja nge kwoove oye unene e na ondjo.” (Johannes 19:11) Jesus ka li ashike e na omunhu umwe auke momadiladilo. Ndele ponhele yaasho, okwa li ta popi kombinga yaKajafas, ovayambididi vaKajafas naJudas Iskariot kutya ovo unene ve na ondjo i dule yaPilatus.

Pilatus okwa li a kwatwa koumbada omolweendjovo daJesus, elihumbato laye notashi dulika a kala ko nale, nokwa li natango a kendabala oku mu mangulula. Ashike nande ongaho, Ovajuda ova li va tilifa natango Pilatus. Ove mu ningila omatilifo va ti: “Omulumenhu oo ngeenge owe mu mangulula, ku fi vali kaume kOmukesari. Keshe oo te liti kutya ohamba oku li omhinge nOmukesari.” — Johannes 19:12.

Ngoloneya okwa li a twala natango Jesus pondje, e li omutumba kolukalwatokolo laye, nokulombwela ovanhu ta ti: “Taleni, ohamba yeni oyo ei!” Ashike Ovajuda kava li va sholola. Ova li va ingida tava ti: “Mu kufa po! Mu kufa po! Mu valela komuti!” Pilatus okwa tya kuvo: “Omwa hala ndi dipae ohamba yeni?” Ovajuda ova kala tava mono oixuna oule wefimbo koshi yepangelo laRoma, ashike ovapristeri ovakulunhu ova popya nouladi tava ti: “Fye katu na ohamba, ndele otu na Omukesari.” — Johannes 19:14, 15.

Omolwoumbada wokutila Ovajuda, Pilatus okwa li a yandja Jesus a ka dipawe. Ovakwaita ova li va dula Jesus elapi loluvala lopeepela ndele tave mu dike oikutu yaye yokombada. Jesus okwa li e na okulitwika omuti waye womahepeko eshi a li ta i.

Osha li ongula yEtitano, 14 Nisan. Jesus okwa  kala oupafi okudja ongula yEtine nokwa kala ta hepekwa. Okwa kala a wililwa po koudjuu womuti womahepeko nokwa li a kanifa eenghono. Onghee ovakwaita ova li va fininika omweendanandjila, Simon, oo a dja kuKirene osho shi li muAfrika, opo e mu humbatele ko komuti womahepeko fiyo okonhele oko ta ka dipaelwa. Ovanhu vahapu ova li ve va shikula, navamwe ova li tave lidenge va nyika oluhodi nokulipula kutya oshike tashi ningwa po.

Jesus okwa li a lombwela ovakainhu ovo va li tava lili a ti: “Oukadona nye vomuJerusalem, inamu lila molwange, ndele lileni molweni nomolwovana veni; osheshi taleni, efimbo otali uya eshi ovanhu tava ka tya, ‘Omukainhu ongadji, nomukainhu oo ina dala nosho yo oo ina nyamifa ota kala a hafa.’ Opo nee otava ka lombwela eemhunda, ‘Wileni kufye!’ noikulundudu, ‘Tu tuvikileni!’ Ngeenge oinima ei otave i ningi fimbo omuti mutalala, oshike tashi ka ningwa po ngeenge owa kukuta?” — Lukas 23:28-31.

Jesus okwa li ta popi oshiwana shOvajuda. Osha li sha fa omuti oo wa kukuta ashike natango outalala ngoo kanini, molwaashi Jesus opo a li nOvajuda vamwe ova li ve na eitavelo muye. Ngeenge ova kufwa mo moshiwana osho, otapa ka kala ashike ovo va fa oshiwana sha kukuta pamhepo notava ka kala va fa omuti wa fya. Opa li tapa ka kala elilaano linene eshi Kalunga a li ta ka longifa ovakwaita vaRoma opo va hanaune po oshiwana osho.