Jehova ita ka pitika ovanhu vai va nyonaune po Oparadisa. Ookaume kaye ovo ashike tava ka kala mo. Oshike tashi ka ningilwa ovanhu vai? Opo u mone enyamukulo, konakona ehokololo loshili laNoa. Noa okwa li ko omido omayovi da ka lupuka. Okwa li omulumenhu muwa oo a kendabala alushe neenghono okulonga ehalo laJehova. Ndele ovanhu vakwao kombada yedu ova kala tava longo oilonga ii. Hano Jehova okwa lombwela Noa kutya Ye ota ka eta eyelu opo a hanaune po ovakolokoshi ovo aveshe. Okwa lombwela Noa a tunge ongulu yomomeva opo a ha fye nosho yo ovaneumbo laye eshi Eyelu tali ke ya. — Genesis 6:9-18.

Noa noukwaneumbo waye okwa tunga ongulu yomomeva. Noa okwa kala yo ta londwele ovanhu kutya otaku uya Eyelu, ndele inava pwilikina kuye. Ova twikila okulonga oilonga ii. Konima eshi ongulu yomomeva ya pwa, Noa okwa twala oinamwenyo mongulu yomomeva, naye pamwe noukwaneumbo ova ya mo. Opo nee Jehova okwa eta oshikungulu shinene. Odula oya loka omafiku 40 omutenya noufiku. Omeva okwa yelula edu alishe. — Genesis 7:7-12.

 Ovakolokoshi ova kanifa eemwenyo davo, ndele Noa noukwaneumbo waye ova xupifwa. Jehova okwe va pitifa mEyelu ve li meameno noku va twala medu la kosholwa oukolokoshi. (Genesis 7:22, 23) Ombibeli otai ti kutya efimbo otali ke uya vali omo Jehova ta ka hanauna po ovo inava hala okulonga osho sha yuka. Ovanhu vawa itava ka hanaunwa po. Otava ka kala fiyo alushe mOparadisa kombada yedu. — 2 Petrus 2:5, 6, 9.

Kunena ovanhu vahapu otava longo oilonga ii. Ounyuni ouyadi omaupyakadi. Jehova efimbo nefimbo oha tumu Eendombwedi daye okulondwela ovanhu, ndele vahapu inava hala okupwilikina eendjovo daJehova. Inava hala okulundulula eenghedi davo. Inava hala okutambula ko osho Kalunga ta ti shi na sha naasho shi li mondjila ile naasho sha puka. Oshike tashi ka ningilwa ovanhu va tya ngaha? Mbela onava ka lunduluke ngoo kohainga? Vahapu itava ka lunduluka nandenande. Efimbo otali uya eshi ovakolokoshi tava ka hanaunwa po noitava ka kala po vali. — Epsalme 92:8.

Edu itali ka hanaunwa po; otali ka lundululilwa moparadisa. Ovo va panga oukaume naKalunga otava ka kala fiyo alushe mOparadisa kombada yedu. — Epsalme 37:29.