Satana neendemoni daye inadi hala u longele Kalunga. Ngeno okwa li tadi dulu, oda hala okuningifa keshe umwe a pilamene Kalunga. Ongahelipi hadi kendabala oku shi ninga? Onghedi imwe okupitila melongelokalunga loipupulu. (2 Ovakorinto 11:13-15) Elongelokalunga oloipupulu ngeenge ihali hongo oshili okudja mOmbibeli. Elongelokalunga loipupulu ola fa oimaliwa yoikengelela — otashi dulika i monike ya fa yoshili, ndele kai na ongushu yasha. Otai dulu oku ku twala moshiponga sha kula.

Ounaipupulu womalongelokalunga kau na fiku nau ka hafife Jehova, Kalunga koshili. Eshi Jesus a li kombada yedu opa li ongudu yomalongelokalunga oo kwa li a hala oku mu dipaa. Okwa li tava diladila kutya onghedi yavo yokulongela Kalunga oya li mondjila. Ova ti: “Otu na Tate umwe aeke, Kalunga.” Mbela Jesus okwe shi dimina? Ahawe! Okwe va lombwela ta ti: “Nye omu na xo yeni, Satana.” (Johannes 8:41, 44) Kunena ovanhu vahapu otava diladila kutya otava longele Kalunga, ndele paushili otava longele Satana neendemoni daye! — 1 Ovakorinto 10:20.

 Ngaashi ashike omuti wa nyonauka hau ima oiimati ii, elongelokalunga loipupulu ohali ningi ovanhu vamo va kale tava ningi oinima ii. Ounyuni kunena ou yadi omaupyakadi omolwoinima ii oyo tai ningwa kovanhu. Ope na onyata yoipala, omalwoodi, omavako, omafininiko, omadipao nomakwatonghonga. Vahapu ovo hava ningi oinima ii ove na elongelokalunga, ndele elongelokalunga lavo ihali ve linyengifa va longe osho shiwa. Itava dulu okukala ookaume kaKalunga okuninga tava efa po okuninga oinima ii. — Mateus 7:17, 18.

Omalongelokalunga oipupulu ohaa longo ovanhu va ilikane koikalunga. Kalunga ota ti inatu ilikana oikalunga. Eshi oshi li pandjele. Ngeenge umwe oo iha popi naave ndele oha popi ashike nefano loye mbela oto ka kala tuu we shi panda? Mbela omunhu a tya ngaho ota dulu tuu okukala kaume koye kashili? Ahawe, ita dulu. Jehova okwa hala ovanhu va popye naye, hanoihongwafano ile nomafano, oo e he na omwenyo. — Exodus 20:4, 5.

Omalongelokalunga oipupulu ohaa hongo kutya okudipaa vamwe pefimbo loita oshi li mondjila. Jesus okwa ti kutya ookaume kaKalunga ove na okukala ve holafane. Itatu dulu okudipaa ovanhu tu va hole. (Johannes 13:35) Nokuli kufye nokudipaa ovanhu ovo vai osha puka. Eshi ovatondi vaJesus kwa li ve uya oku mu kwata, ina pitika ovahongwa vaye va lwe opo ve mu amene. — Mateus 26:51, 52.

Omalongelokalunga oipupulu ohaa hongo kutya ovakolokoshi otava ka hepekwa momundilo woheli. Ndele Ombibeli otai hongo kutya oulunde ohau twala mefyo. (Ovaroma 6:23) Jehova oKalunga kohole. Mbela Kalunga omunahole ota kala nokuhepeka ovanhu fiyo alushe? Hasho nandenande! MOparadisa otamu ka kala ashike elongelokalunga limwe alike, olo la hokiwa kuJehova. (Ehololo 15:4) Omalongelokalunga aeshe oo e likolelela koipupulu yaSatana otaa ka xula po.