Ohashi pula eenghendabala opo u pange oukaume naumwe; ohashi pula eenghendabala opo u kale nakaume. Eenghendabala doye dokuninga nokukala kaume kaKalunga otadi ka nangekwa noupuna. Kwaavo va itavela muye, Jesus okwa ti: ‘Oshili otai mu mangulula.’ (Johannes 8:32) Otashi ti ngahelipi?

Oto dulu okuhafela emanguluko paife. Oto dulu okukala wa manguluka ko komahongo oipupulu nosho yo koipupulu oyo ya tandavelifwa kuSatana. Oto dulu okukala wa manguluka ko koku he na eteelelo oko kuyadi mokukalamwenyo kwovanhu omamiliyona ovo ve he shii Jehova. (Ovaroma 8:22) Ookaume kaKalunga ova mangululwa ‘koumbada wefyo.’ — Ovaheberi 2:14, 15.

Oto dulu okuhafela emanguluko mounyuni upe waKalunga. Kali fi tuu emanguluko likumwifa olo to dulu okuhafela! MOparadisa kombada yedu otamu ka kala emanguluko lokumanguluka ko koita, komikifi nosho yo komunyonena. Emanguluko lokumanguluka ko koluhepo nondjala. Emanguluko lokumanguluka ko koukulupe nefyo. Emanguluko lokumanguluka ko koumbada, omafininiko nouhenouyuki. Ombibeli otai ti shi na sha naKalunga: “Oto kamutulula eke loye ndee to palula oinamwenyo aishe kohokwe yoye.”—Epsalme 145:16.

 Ookaume kaKalunga otava ka kala nomwenyo fiyo alushe. Omwenyo waalushe oo oshali i na ondilo oyo Kalunga ta yandje kwaaveshe tava kongo oukaume naye. (Ovaroma 6:23) Diladila ashike nghee omwenyo u he na exulilo tau ka tya kwoove!

Oto ka kala u na efimbo lokuninga oinima ihapu. Otashi dulika wa hala okulihonga okushika oshishikomwa shonhumba. Ile tashi dulika wa hala okulihonga okufaneka ile wa hala okulihonga u ninge omuhongi woipilangi. Otashi dulika wa hala okulihonga shi na sha noinamwenyo noimeno. Ile tashi dulika wa hala oku ka talela po u ka mone oilongo nosho yo ovanhu ve lili naku lili. Okukala nomwenyo fiyo alushe otaku dulu okuninga oinima aishe ei i kale tai shiiva!

Oto ka kala u na efimbo okupanga oukaume novanhu vahapu. Okukala nomwenyo fiyo alushe otaku shi ningi tashi shiiva u shiive vahapu ovo va ninga ookaume kaKalunga. Oto ka shiiva oitalenti yavo nosho yo omaukwatya avo mawa notava ka ninga yo ookaume koye. Oto ka kala u va hole navo otava ka kala ve ku hole. (1 Ovakorinto 13:8) Okukala nomwenyo u he na exulilo otaku ke ku pa efimbo opo u pange oukaume nakeshe umwe kombada yedu! Ndele komesho yaaishe, oukaume woye naJehova otau ka kula nokukala wa kola inashi monika nande onale eshi omafelemido taa piti po. Kala kaume kaKalunga fiyo alushe!