Okuninga kaume kaKalunga oshinima shiwa ku he na vali osho to dulu oku shi ningilwa. Kalunga ote ke ku honga nghee to dulu okukala nelao nowa amenwa; ote ke ku mangulula komaitavelo mahapu a puka nosho yo koilonga iyahameki. Ota ka pwilikina omailikano oye. Ote ke ku kwafela u kale nombili yokomwenyo nosho yo elineekelo. (Epsalme 71:5; 73:28) Kalunga ote ke ku yambidida momafimbo oudjuu. (Epsalme 18:19) Natango vali, Kalunga ote ku pe oshali yomwenyo waalushe. — Ovaroma 6:23.

Eshi to ehene popepi naKalunga oto ehene popepi nookaume kaKalunga. Navo yo otava ningi ookaume koye. Doshili, vo otava ka kala ve li ngaashi ovamwanyoko ovalumenhu novakainhu. Otava ka kala va hafa oku ku honga kombinga yaKalunga notave ke ku kwafela noku ku twa omukumo.

Fye katu fike pamwe naKalunga. Eshi to pange oukaume naKalunga, ou na okukala wu udite ko oshinima eshi sha fimana. Oukaume naKalunga kau li ngaashi oukaume pokati koomakula. Ye omukulunhu kokulekule nomunandunge noku na eenghono di dule detu kokule. Ye oku na oufemba wokukala e li Omupangeli wetu. Hano ngeenge otwa hala okukala ookaume kaye, otu na okupwilikina kuye, nokulonga osho te tu lombwele tu longe. Eshi otashi ke tu etela alushe ouwa. — Jesaja 48:18.