Ngeenge owa hala okukala kaume kaKalunga, ou na okukala melongelokalunga olo Kalunga a hokwa. Jesus okwa ti kutya “ovailikani vashili” otava ka longela Kalunga metwokumwe ‘noshili.’ (Johannes 4:23, 24) Ope na ashike onghedi imwe aike i li mondjila yokulongela Kalunga. (Ovaefeso 4:4-6) Elongelokalunga lashili otali twala komwenyo waalushe, nelongelokalunga loipupulu otali twala mehanauno. — Mateus 7:13, 14.

Oto dulu okumona mo elongelokalunga lashili mokutala kovanhu ovo ve li mulo. Molwaashi Jehova omuwa, ovanhu ovo tave mu longele ove na okukala vawa. Ngaashi ashike omwoongo muwa hau ima eengongo diwa, elongelokalunga lashili ohali ningi ovanhu vawa. — Mateus 7:15-20.

Ookaume kaJehova ova fimaneka Ombibeli neenghono. Ove shii kutya Ombibeli oya dja kuKalunga. Ohava pitike osho tai ti shi va wilike monghalamwenyo yavo, shi kandule po omaupyakadi avo, noku va kwafela ve lihonge kombinga yaKalunga. (2 Timoteus 3:16) Otava kendabala okulonga osho tava udifa.

 Ookaume kaJehova ohava ulike kutya ove holafane. Jesus okwa ulika kutya oku hole ovanhu moku va honga kombinga yaKalunga nomokuvelula ovo va li tava yahama. Ovo ve li melongelokalunga lashili navo ove na okuulika kutya ove hole vakwao. Ngaashi Jesus, ihava dini eehepele ile ovanhu vomihoko dimwe di lili. Jesus okwa ti kutya ovanhu otava ka koneka ovahongwa vaye okupitila mohole oyo ve ninafane. — Johannes 13:35.

Ookaume kaKalunga ova fimaneka edina laKalunga, Jehova. Ngeenge umwe ta anye okulongifa edina loye, mbela omunhu a tya ngaha ota ka kala tuu kaume koye kopofingo? Ahawe! Ngeenge otu na kaume, ohatu longifa edina laye nohatu popi navamwe oinima iwa kombinga yakaume oo. Hano ovo va hala okukala ookaume kaKalunga ove na okulongifa edina laye nove na okupopya navakwao kombinga yaye. Jehova okwa hala tu shi ninge. — Mateus 6:9; Ovaroma 10:13, 14.

Ngaashi Jesus, ookaume kaKalunga ohava longo ovanhu kombinga yOuhamba waKalunga. Ouhamba waKalunga oo epangelo lomeulu olo tali ka ninga edu oparadisa. Ookaume kaKalunga ohava tukulilafana onghundana ei iwa i na sha nOuhamba waKalunga navakwao. — Mateus 24:14.

Eendombwedi daJehova otai kendabala okukala di li ookaume kaKalunga. Oda fimaneka Ombibeli nodi holafane. Ohadi longifa nohadi fimaneke edina laKalunga nosho yo ohadi hongo vamwe kombinga yOuhamba waKalunga. Eendombwedi daJehova otadi tula moilonga elongelokalunga lashili kombada yedu kunena.